Таван давхраас унасан У.Галхүүг аймгийн удирдлагууд нь анхааралдаа авч эхэллээ

У.Галхүү 2014 онд барилгын компанид ажиллаж байх үедээ 5 давхраас унаж биедээ хүнд гэмтэл авсан бөгөөд одоогоор 69 хувийн хөдөлмөрийн чадвараа алдсан, 2 хүүхэд болон өндөр настай ээжийнхээ хамт амьдардаг аж.

Тиймээс аймгийн Засаг дарга Н.Ганбямба, ТЗУХ-ийн дарга Ж.Гантулга, НБХ-ийн дарга Г.Лхагвахатан, ЭМГ-ын дарга Ц.Гэрэлмаа, НДХ-ийн дарга Ц.Баярмаа, ХХҮГ-ын хэлтсийн дарга н.Хонгорзул, Нэгдсэн эмнэлгийн орлогч дарга К.Кульжан, Хэнтий цахилгаан түгээх сүлжээ салбарын дарга н.Ганчулуун нарын хамт У.Галхүүгийн гэрт очиж бодит байдалтай нь танилцжээ.

Үүний дагуу аймгийн Засаг дарга Н.Ганбямба холбогдох албаны дарга нарт доорхи үүрэг чиглэл өгчээ. Үүнд

· НДХ, ЭМГ хамтран У.Галхүүгийн биеийн байдлыг харгалзан үзэж 80 хувийн групп тогтоох,

· ХХҮГ тус иргэний гэр бүлийг хүнсний талонд хамруулах

· ТЗУХ болон НБХ-ийн дарга нар хамтран У.Галхүүгийн биед тохирсон ажлыг яаралтай судалж танилцуулах гэсэн гурван  үүрэг даалгаврыг өгч энэ 7 хоногтоо багтаан эргэж хариу мэдэгдэхийг даалгажээ.

Мөн иргэний шүүхэд хандаж нөхөн төлбөр гаргуулах, үйлдвэрийн осол гэдгийг тогтоолгох тал дээр, хууль эрх зүйн туслалцаа үзүүлэхийг ТЗУХ-ын дарга Ж.Гантулгад хариуцуулсан байна.

Мөн Хэнтий цахилгаан түгээх сүлжээ салбарын дарга н.Ганчулуун өнөөдрөөс эхлэн У.Галхүүгийн гэрийн цахилгааны төлбөрийг 60 хувь хөнгөлөх болсноо дуулгасан байна.

Б.Алтжин