Д.Сарангэрэл: Анх удаа энэ Засгийн газар утаатай тэмцэх зөв шийдлийг гаргасан

УИХ-ын Өргөдлийн байнгын хорооны намрын чуулганы хугацаанд хийж, гүйцэтгэсэн ажлын тайлангийн талаар  тус байнгын хорооны дарга дарга М.Оюунчимэг, Эрүүл мэндийн сайд Д.Сарангэрэл нар өнөөдөр мэдээлэл хийлээ. 

УИХ-ын намрын чуулганы хугацаанд 13 мянга 440 иргэнээс 9306 хуудас бүхий 1309 өргөдөл, нийслэлийн иргэдээс 823 буюу 62.8 хувь, хөдөө орон нутгийн иргэдээс 486 буюу  37.2 хувь ирүүлсэн байна. Үүнээс 5.6 хувь нь нийтийн эрх ашгийг төлөөлсөн, 80.5 хувь нь хувийн асуудлаар хандсан өргөдөл аж. Үүнээс УИХ-ын нэр дээр хаягласан өргөдөл 180 ирүүлжээ. 

УИХ-ын Өргөдлийн байнгын хороо намрын чуулганы хугацаанд 250 өргөдөл хүлээн авсны 197 өргөдлийг эцэслэн шийдвэрлэж, 59 өргөдөл шийдвэрлэгдэх шатанд байгаа аж.

УИХ-ын Өргөдлийн байнгын хорооны дарга М.Оюунчимэг:  Утааг бууруулах нэрийн дор 200 орчим тэрбум төгрөгийг салхинд хийсгэсэн

"Бид ирсэн өргөдөл бүхэнд хариуцлагатай, хянамгай хандаж байгаа.  Нийт өргөдлийг дөрвөн бүлэгт хуваасан. Ингэхдээ өнгөрсөн намрын ээлжит чуулганы хугацаанд дөрвөн удаа холбогдох хүмүүсийг оролцуулсан томоохон хэмжээний хэлэлцүүлгийг зохион байгуулсан. Эдийн засаг, нийгмийн том асуудлыг хөндсөн. Үүний үр дүнд нааштайгаар тодорхой асуудлыг шийдэж чадсан.  Манай байнгын хороо өнгөрсөн намырын чуулганы хугацаанд сайн ажилласан гэж дүгнэж байгаа. Бид араас нь  хэрэгжилтэд нь  байнга хяналт тавьж ажилласан. Агаарын бохирдлыг бууруулах чиглэлээр доривтой дуугарч чадсан. УИХ, Засгийн газар, Ерөнхийлөгч хүртэл  агаарын бохирдлын асуудалд анхаарал хандуулсан нь бидний ажлын үр дүн.  Өнгөрсөн хугацаанд 200 орчим тэрбум төгрөгийг агаарын бохирдол бууруулах чиглэлд  зарцуулсан байдаг.  Ямар ч хяналтгүйгээр зарцуулж ирсэн гэдгийг манай байнгын хороо ил гаргасан.  Ямар ч бодит үр дүнгүйгээр 200 орчим тэрбум төгрөгийг салхинд хийсгэсэн.  БНСУ-аас авах  урт хугацаатай зээлийг зөвхөн  агаарын бохирдлыг бууруулах чиглэлд зарцуулахаар болсон.

 Түүнчлэн Өргөдлийн байнгын хороо намрын чуулганы хугацаанд  тодорхой ажлууд зохион байгуулж ажилласан.  Тухайлбал, уул уурхайн үйл ажиллагааны улмаас эвдэрсэн газрын нөхөн сэргээх, хохирлыг нөхөн төлүүлэх хууль, тогтоомжийн хэрэгжилтийг хангах талаар Засгийн газарт үүрэг чиглэл өгсөн. Мөн хувь хүний орлогын албан татвар, нийгмийн даатгалын шитгэл, тэтгэврийн нас нэмсэн асуудлаар 6703 иргэнээс ирүүлсэн өргөдлийн дагуу Сангийн яам, Хөдөлмөр, нийгмийн хамгааллын яаманд албан бичиг хүргүүлж хамтарч ажилласан.

Ахмадын орон сууц, түрээсийн орон сууцны хөтөлбөрт онцгой анхаарал хандуулан ажиллалаа. Түрээсийн орон сууцны хөтөлбөр зохион байгуулалт, санхүүжилтийн хүрээнд зогсонги байдалд орсон. Энэ асуудлыг шийдвэрлэх талаар ажиллана" гэв. 

Эрүүл мэндийн сайд Д.Сарангэрэл: Утааны асуудлыг олон жил ярьсан даа. Өнөөдөр бол шийдэл нь гарсан 

  “УИХ-ын бүтцийн байгууллагаас Өргөдлийн байнгын хороо нь ард иргэдтэйгээ амьд холбоотой байдаг цорын ганц байнгын хороо. Энэ  утгаараа өнгөрсөн хугацаанд 13 мянга 440 иргэнээс 1309 өргөдөл хүлээн авсан. Өргөдлийн бүтцийг харахад бохирдолтой холбоотой асуудал нэлээд түлхүү байна. Агаарын болон орчны, хөрсний бохирдол, Туул голын бохирдол зэрэг нийгмийг бухимдуулсан, цочроосон бас шийдэл хүлээсэн асуудал болсон байна. Өнгөрсөн дөрвөн жилийн хугацаанд Өргөдлийн байнгын хороонд ирүүлсэн ихэнх өргөдөл агаарын бохирдол, утаатай холбоотой байсан. Утаатай холбоотой асуудлыг огт таслалдуулалгүй авч явсан. Олон ч үйл ажиллагаа явуулсан. Үр дүн нь гарч байгаа гэж би хэлнэ. Төр засаг ямар асуудалд анхаарал хандуулах ёстой вэ гэдэг хамгийн түрүүнд дохио өгдөг салбар нь Өргөдлийн байнгын хороо. Үүний илрэл болох төв цэвэрлэх байгууламжтай болох асуудлыг бид өнгөрсөн хугацаанд онцгойлон ярьсан. Бид утаа, өмхий хоёроосоо салж байж иргэд маань амгалан тайван амьдрах орчин нөхцөл бүрдэнэ. Утааны асуудлыг олон жил ярьсан даа. Өнөөдөр бол шийдэл нь гарсан гэж хэлнэ. Засгийн газар утаанаас салах үндсэн гурван чиглэлээ тодорхой болгосон. Ирэх оны дөрөвдүгээр сараас эхлэн утааны гол эх үүсвэр болсон түүхий нүүрс оруулахгүй болно. Энэ бол шийдэл. Төр засгийн түвшинд гол гол шийдвэрийг гаргахад Өргөдлийн байнгын хороо чухал нөлөөтэй гэдгийг тодотгон хэлмээр байна" гэлээ.

Ш.Адъяамаа