О.Баасанхүү: Ж.Алтан, Ш.Батхүү нарын жараахайнуудын ард нуугдсан хүмүүст хариуцлага тооцох хэрэгтэй

“Эрдэнэт” үйлдвэрийн асуудлаар УИХ-ын гишүүн О.Баасанхүү өнөөдөр мэдээлэл хийлээ. Мэдээллийн эхэнд тэрбээр ”Эрдэнэт” үйлдвэрийн “Стандарт” банкинд төлөх өрийн тухай мэдээлэл  хэвлэлүүдээр зөрүүтэй мэдээлэгдэж байна. "Жаст групп” ХХК нь Стандарт банкнаас 2007 онд 20 сая ам.долларын, 2009 онд 30 сая ам.долларын, 2010 онд “Нэмэлт гэрээ” байгуулж 75 сая.ам доллар болж нэмэгдүүлсэн байна. 2010 онд дахин 27 сая ам.долларын “Зээлийн гэрээ” байгуулсан. Улмаар 2011 оны 12 дугаар сарын 20-ны өдөр  дахин “Нэмэлт гэрээ” байгуулан зээлийн хэмжээг 34 сая ам.доллар болгож нэмэгдүүлсэн байна.  Дээрхийг нэгтгэвэл, 2007-2011 онд “Жаст групп” ХХК Стандарт банкнаас нийт 172 сая ам.долларын зээл авчээ.

Тухайн үед дээрх таван удаагийн зээлийг авахад  “Эрдэнэт” үйлдвэрийн ерөнхий захирал Ч.Ганзориг, тус үйлдвэрийн хуулийн хэлтсийн дарга Б.Мөнхжаргал, мөн үйлдвэрийн санхүүгийн хэлтсийн дарга Г.Галбаатар,  Төрийн өмчийн хорооны дарга асан Д.Сугар нар 172 сая ам.долларын гэрээний баталгаан дээр  гарын үсэг зурсан байгаа юм.

Арбитрын шүүхээс “Эрдэнэт” үйлдвэрт хамаарах 51 сая ам.доллар дээр нэмээд хүү, торгууль, шүүхийн зардлыг нэмэгдэж  2017 оны арваннэгдүгээр сарын байдлаар 109 сая ам.доллар төлөх шийдвэр гаргасан. Төрийн банкинд Жастыг төлөөлөөд “Алтжин”-гийн Г.Алтангийн хүү Эдвардсүрэн гэдэг нөхөр нэхэмжлэл гаргаад 51 тэрбумыг хувь хүн төл гэдэг шийдвэр гаргуулсан.

Өөрөөр хэлбэл Ш.Батхүүгийн зээлсэн 172 сая ам.доллараас 51-ийг нь хасахаар 121 сая ам.доллар өнөөдөр Төрийн банк төлөх нөхцөл байдал үүсээд байгаа. "Стандарт" банк нь  одоо Хятадын компанид зарагдчихсан. Арбитрын шүүхийн шийдвэрт бичсэнээр өр төлбөрийг төлөхгүй бол хүү, торгууль нэмэгдсээр байна гэдгийг тусгасан байгаа юм.  Өрөө төлөхгүй бол хүү торгууль зогсохгүй гэсэн үг.

"Стандарт" банк 500 мянган ам.доллараас дээш үнэлгээ бүхий “Эрдэнэт” үйлдвэрийн хөрөнгийн мэдээллийг авахыг хүссэн байдаг. Үүнийг нь өгөөгүй учраас Стандарт банк 2017 оны есдүгээр сарын 25-нд шүүхэд гомдол гаргаж улмаар арваннэгдүгээр сарын 17-ны өдөр  “Эрдэнэт” үйлдвэрийн хөрөнгийг битүүмжлэх нь зөв гэсэн захирамж шүүх  гаргасан. Монгол Улсыг ийм хүнд байдалд оруулсан хууль бус этгээдүүдтэй хүмүүстэй хариуцлага тооцох хэрэгтэй. Ж.Алтан, Ш.Батхүү нарын жараахайгаас гадна тухайн үед "Стандарт" банк яагаад дээрх огцом гэрээнүүдийг хийж байсан юм бэ гэдгийг тогтоох хэрэгтэй.

Тухайн үед зээлийн шугамыг хэн нээв. Зээлийн өөрчлөлтийг хэн гаргав.Энэ бүхнийг нуун дарагдуулсан, санаатайгаар төөрөгдүүлсэн,  Монгол Улсыг шүүх дээр ялагдуулахад хүргэсэн хүмүүстэй ч хариуцлага тооцох хэрэгтэй. Гарын үсэг хуурамч болохоос биш Хадгаламж банк 172  сая ам.доллар авсан гэдэг нь нотлогдчихоод байгаа. Энэ их мөнгийг Монголын төр төлөхгүй ээ. Үүний оронд  ажил хийж амьдарч буй олон залуусын цалингийн зээлийн хүүг төлсөн нь дээр.

“Эрдэнэт” өнгөрсөн онд 300 орчим тэрбум төгрөгийн цэвэр ашигтай ажилласан байна. Үүний 50 хувиас дээш мөнгөөр өр төлөх гэж байгаа нь маш буруу. Тэгээд ч боломжгүй. Яагаад гэвэл Арбитрын шүүхийн шийдвэрээр зээлийн хүү өдөр хоногоор нэмэгдэж байна" гэлээ.

Ш.Адъяамаа