Монголд буй “Гэр бүлийн мөрдлөгийн газар” захиалгадаа дарагджээ

Гэр бүл гэдэг хамгийн чухал, хамгийн нандин харилцаа байх ёстой. Тиймээс хүн бүр гэр бүлээ аз жаргалтай, бат бөх байлгахыг эрмэлздэг. Гэвч сүүлийн үед Монгол хосуудын дунд гэр бүл салалт зонхилж байгаа гэх мэдээлэл чих дэлсэх боллоо. 2017 оны байдлаар  өдөрт 10 хос гэрлэлтээ цуцлуулдаг гэсэн судалгаа гарчээ. Гэр бүл цуцлалтын тоо жилд дунджаар 269-өөр нэмэгдэж байгаа аж. Гэр бүл салалтын шалтгааныг маш олон талаас тайлбарладаг. Үүнд, соёлын ялгаа, харь орны хүнтэй гэрлэсэн, хоёр өөр гэр бүлийн хүмүүжил, гэр бүлийн гишүүд хариуцлагаа бүрэн ухамсарлаагүй байдал, гэрлэх хүнээ сайн таньж мэдээгүй, санхүүгийн хомсдол, цалин орлого, амьдралын баталгаа, шилжилт хөдөлгөөн, архидалт, муу зуршил, гэр бүлээс гадуурх харилцаа, хууралт, хүчирхийлэл, дарамт шахалт ордог байна.

Григорий Кулагин: Эмэгтэйчүүд илүү буулт хийдэг

Гэвч эдгээр шалтгаан дундаас хамгийн их зонхилох нь хууран мэхлэлт аж.   Хэн нэг нь байнга хуураад байвал мэдээж гэр бүл сална. Гэхдээ хэрэв мэдэхгүй бол амар тайван амьдрал үргэлжилнэ. Гэвч хууран мэхлэлт бүр хэзээ нэгэн цагт илэрдэг. Үүнд туслах мөрдөгчид ч гэж байдаг байна. Гэр бүлийн мөрдлөг хийдэг газрууд улс орон бүрт байдаг аж. Тухайлбал, бидний хамгийн сайн мэдэх ОХУ-д гэр бүлийн мөрдлөг хийдэг газрууд цэцэглэн хөгжөөд байгаа. Ганцхан жишээ дурдахад л хууран мэхлэлтийг илчилж буй “Брачное чтиво” нэвтрүүлэг юм. “Брачное чтиво” нэвтрүүлэг нь 2008 оноос Оросын DTV сувгаар гарч эхэлсэн бөгөөд гэр бүлээс гадуурх завхайрлыг илчилдэг. Тус нэвтрүүлэгт эхнэр юмуу нөхрөө үнэнч эсэхийг шалгахын хүссэн нэгэн мөрдөгч нарт ханддаг. Улмаар мөрдөгч нар бүрэн тоноглогдсон техник хэрэгсэлтэйгээр ажилдаа орж нууцалж байсан бүхий л нууцыг нь ил гаргаад ирдэг.  Тус нэвтрүүлгийн мөрдөгч Григорий Кулагин хэвлэлд өгсөн ярилцлагадаа “Бидний нэвтрүүлэг үзэгчдийг байлдан дагуулдаг. Зарим хүн бидний нэвтрүүлгийг садар самууныг сурталчилж, ёс суртахууныг уландаа гишгэсэн гэдэг. Гэвч бид хүмүүст үнэнийг мэдэхэд тусалдаг. Үнэнийг илрүүлэхэд цаг хугацаа шаардана. Бидэнтэй адил мөрдлөг хийдэг газрууд улс орон бүрт бий.  Бид үйлчлүүлэгчдийг хайх шаардлага байдаггүй. Өөрсдөө л хүрээд ирдэг. Мөн манай цахим шууданд маш олон хүмүүс ханддаг. Манайд хандаж буй эмэгтэй, эрэгтэй хүмүүсийн тоо тэнцүү байдаг. Олон удаагийн мөрдлөгөөс ажиглахад хосуудын харилцаанд эмэгтэйчvvд нь илүү буулт хийх хандлагатай нь ажиглагдсан.  Мөрдөгчийн ажил маш хүнд. Бид аль болох ажилдаа сэтгэл хөдлөлөөр хандахгүйг хичээдэг. Хосуудад хандаж хэлэхэд бие биедээ баяр баясгалан өг” хэмээсэн юм.

ОХУ-тай адилхан барууны ихэнх оронд ч гэсэн гэр бүлийн мөрдлөг хийдэг байгууллага болон хувийн мөрдөгч нар байдаг аж. Мөн чамгүй өндөр хөлстэй гэсэн мэдээлэл байгаа юм. Харин Япон улсад хүний эрхийг дээд зэргээр дээдэлдэг учир гэр бүлийн мөрдөгч нарыг төдийлөн хүлээн зөвшөөрдөггүй гэнэ.

Тэгвэл Монголд ч гэсэн захиалгаар гэр бүлийн болон хосын мөрдлөг хийдэг газар хэдийнэ бий болжээ. Энэ тухай зарууд интернэт орчинд утасны дугаартайгаа харагдана. Тус утасны дугаараар лавлахад “тус мөрдлөгийн товчоонд мэргэжлийн хамт олон ажилладаг. Ихэнхдээ цагдаагийн албанд ажиллаж байгаад тэтгэвэрт гарсан туршлагатай хүмүүс гэсэн юм. Тус мөрдлөгийн газар үйлчлүүлэгчдээ хайх шаардлага гардаггүй бөгөөд хангалттай захиалгад дарагддаг” гэх мэдээллийг өгсөн юм. Манайх шиг цөөхөн хүнтэй улсад энэ төрлийн мөрдлөгийн товчоо захиалгадаа дарагдаж байна гэдэг хачирхалтай.  Бид энэ талаарх дэлгэрэнгүй мэдээллийг удахгүй хүргэх болно.

Б.Янжиндулам

www.zindaa.mn