С.Баярцогт нарыг үргэлжлүүлэн хорих эсэхийг өнөөдөр шүүнэ

Сангийн сайд асан С.Баярцогт, Татварын Ерөнхий газрын дарга асан Б.Ариунсан, "Эрдэнэс Монгол" -ын Гүйцэтгэх захирал асан Б.Бямбасайхан нарыг өнгөрөгч  дөрөвдүгээр сарын 1-ний өдөр сэжигтнээр баривчилсан билээ. 

Тэднийг Оюутолгойн гэрээ болон эрх зүйн баримт бичгүүдийг батлахдаа эрх мэдэл, албан тушаалаа урвуулан ашиглаж, хууль бус шийдвэрээр бусдад давуу байдалд олгосон байж болзошгүй гэх хэрэгт шалгаж буй бөгөөд  улмаар анхан шатны шүүхээс 30 хоног баривчлах шийдвэрийг гаргасан.

Тэгвэл тэднийг таслан сэргийлэх хугацаа өнөөдөр дуусгавар болж байгаа учир С.Баярцогт, Б.Ариунсан, Б.Бямбасайхан нарыг үргэлжлүүлэн хорих эсэхийг шийдэх шүүх хурал Чингэлтэй дүүргийн шүүхэд  дөнгөж сая эхэллээ. Тэд шүүх хуралд онлайнаар оролцоно.

Эрүүгийн хэрэг хянан шийдвэрлэх тухай хуулийн 14.10 дугаар зүйлийн 2-д "Хэргийн ээдрээ төвөгтэй байдлыг харгалзан яллагдагчийг цаашид цагдан хорих зайлшгүй шаардлагатай бол шүүх цагдан хорих таслан сэргийлэх арга хэмжээний хугацааг тухай бүр 1 сар хүртэл хугацаагаар сунгах ба яллагдагчийг цагдан хорих нийт хугацаа Эрүүгийн хуульд хорих ялын дээд хэмжээг 5 жил хүртэл хугацаагаар оногдуулахаар заасан гэмт хэрэгт 12 сар, Эрүүгийн хуульд хорих ялын дээд хэмжээг 5 жилээс дээш хугацаагаар оногдуулахаар заасан гэмт хэрэгт 18 сараас хэтэрч болохгүй гэж заасан байна. Тиймээс тэдний цагдан  хориог хуулийн дагуу сунгах боломжтой аж. 

Б.Алтжин