”Эмэгтэйчүүдийн сарын тэмдэг” хэлбэлзэлтэй ирдэг нь ямар учиртай бэ?

ZINDAA.MN сайт эрхэм уншигч та бүхэндээ "Цэнэтэй асуулт, Үнэтэй хариулт" буланг тогтмол хөтлөн хүргэж байгаа билээ. Энэ булангаар иргэдийн мэдэхийг хүссэн аливаа асуултад бодит мэдээллээр хариулт өгөх юм. Энэ удаа эмэгтэйчүүдийн сарын тэмдгийн мөчлөг алдагддаг асуудлын талаар эмнэлэгийн байгууллагын өгсөн мэдээллийг хүргэе.


АСУУЛТ: Сарын тэмдгийн мөчлөг алдагдах нь эмэгтэйчүүдийн дунд түгээмэл тохиолддог асуудлуудын нэг. Хугацаанаасаа өмнө ирэх, ирэхгүй удах, үргэлжлэх хугацаа нь харилцан адилгүй байх нь бий. Бүсгүйчүүд үүний учир шалтгааныг мэдэхгүй "Яагаад" гэсэн асуултыг тээсээр явдаг.

ХАРИУЛТ: Юуны өмнө биений юмны мөчлөгөө зөв тодорхойлох хэрэгтэй. Биений юм анх ирсэн өдрөөс дараагийн ирэх өдөр хүртэлх хугацааг нэг мөчлөг гэж үзнэ. Хоорондоо хэд хоногийн зайтай ирж байгаагаар нь биений юмны үйл ажиллагаанд ямар нэг өөрчлөлт байгаа эсэхийг тодруулж болдог. Тиймээс эмэгтэй хүн бүр сарын тэмдгийн хуанли хөтөлж хэвших нь чухал юм. Энэ нь тийм ч түвэгтэй биш бөгөөд та тухайн оны календарь аваад түүн дээрээ биений юм ирсэн өдрүүдээ дугуйлаад тэмдэглэхэд л хангалттай.

Маш олон эмэгтэй биений юмыг сард нэг удаа буюу 30 хоноод ирэх ёстой гэсэн буруу итгэл үнэмшилтэй байдаг. Биений юмны мөчлөг 20-35 хүртэл хоногтой байж болох бөгөөд ихэнхи эмэгтэйнх дунджаар 28 хоногийн мөчлөгтэй байдаг. Гэхдээ хүнд бүрд адилгүй. Доод тал нь 4-6 удаагийн биений юм үзэгдсэн хугацааг тасралтгүй тэмдэглээд хоорондоо хэд хоногийн зайтай байгаагаар нь таны биений юм хэд хоногийн мөчлөгтэй вэ гэдгийг тооцож болно.

Биений юмны ирэх ёстой хугацаа 7 хоногийн дотор хойшоо, урагшаа хэлбэлзэж ирж болох бөгөөд үүнийг тогтмол, хэвийн мөчлөгтэй гэж үзнэ. 

Харин 20 хоногоос дотогш эсвэл 35 хоногоос дээш мөчлөгтэй эсвэл нэг удаа ирэхдээ 7 хоногоос дээш хугацаагаар үргэлжилдэг, өвдөлттэй ирдэг бол заавал мэргэжлийн эмчид хандаарай. Энэ нь умай, өндгөвч, тархины үйл ажиллагааны зохицуулга алдагдсантай холбоотой юм.

Сарын тэмдгийн мөчлөгийн өөрлөлтөд дараах хүчин зүйлс нөлөөлж болдог байна.

1. Байнгын сэтгэлийн дарамт, стресс  ба мэдрэлийн системийн өвчлөл

2. Ариун цэврийн хэрэглэлээс харшил өгөх

3. Удамшил

4. Жирэмснээс хамгаалах  эм, бэлдмэл хэрэглэх

5. Хэтэрхий хурц хоол хүнс хэрэглэх

Бүсгүйчүүддээ дахин сануулахад сарын тэмдэг гэнэт өөрчлөгдөж хэвийн бус болсныг анзаарсан даруйдаа мэргэжлийн эмчид хандаарай.

Сарын тэмдгийн хуанли хөтлөх энгийн арга

Та энгийн цаасан хуанли аваад сарын тэмдгийн мөчлөгийн хугацаагаа буюу эхэлсэн, дууссан өдрүүдийг тэмдэглэнэ.

Сарын тэмдэг ирсэн үед жирэмслэх боломжтой эхний өдрөө тодорхойлох

  • Тэмдэглэлээс хамгийн богино мөчлөгийн үргэлжилсэн өдрийг тодорхойлно
  • Нийт тооноос нь 18-ыг хасна.
  • Энэ сард таны сарын тэмдэг ирсэн эхний өдрөөс эхлэн хасаад гарсан тоогоор тоолоод гарсан өдрийг Y гэе.
  • Тэр Y өдөр нь тухайн сард таны жирэмслэх боломжтой эхний өдөр болно.

Сарын тэмдэг ирсэн үед жирэмслэх боломжтой сүүлийн өдрөө тодорхойлох

  • Тэмдэглэлээс хамгийн урт мөчлөгийн үргэлжилсэн өдрийг тодорхойлно.
  • Нийт гарсан өдрөөс 11–ийг хасна.
  • Энэ сард таны сарын тэмдэг ирсэн эхний өдрөөс эхлэн хасаад гарсан тоогоор тоолоод гарсан өдрийг Y гэе.
  • Тэр Y өдөр нь тухайн сард таны жирэмслэх боломжтой сүүлийн өдөр болно.

Д.Үржинбадам

WWW.ZINDAA.MN

 

Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэлүүд ( 0 )

Go to top of page