Ж.Батзандан: Хөдөлмөрийн харилцаан дахь хүний эрхийн конвенциуд ноцтой зөрчигдөж байна

УИХ-ын гишүүн Ж.Батзандан өнөөдөр Монгол Улсын Хөдөлмөрийн хууль, Хөдөлмөрийн харилцаан дахь хүний эрхийн конвенциуд ноцтой зөрчигдөж байгаа талаар хэвлэлийн бага хурал хийлээ.

Ж.Батзандан: Хөдөлмөрийн харилцаанд эрх нь зөрчигдөж байгаа бүх хүн өргөдөл, гомдлоо ирүүлээсэй

Тэрбээр "Миний бие УИХ-ын гишүүн, Хүний эрхийн дэд хорооны гишүүний хувьд хэд хэдэн мэдээллийг хүргэх гэж байна. УИХ бол Монгол Улсын дотоод, гадаад бүх бодлогод анхаарлаа хандуулж ажиллах үүрэгтэй байгууллага. Гэвч хүний эрхийн асуудалд анхаарлаа хангалттай хандуулахгүй байгаа гэж би үзэж байгаа.

Монгол хүн бүр эрхэмсэг орших, Үндсэн хуульд заасан үндсэн эрх, эрх чөлөөгөө эдлэх эрхтэй. Сүхбатарын талбайд жагсан үсээ хусч буй эмэгтэйчүүд, өлсгөлөн зарлаж буй багш нар, эмч нарын зорилгыг дэмжиж буйгаа илэрхийлье. 500, 600-хан мянган төгрөгөөр сайн эмч, багш нарыг ажиллуулах боломжгүй. Иймд ард иргэдийн эрүүл мэндийг хамгаалдаг эмч нар, үр хүүхдүүдэд нь эрдэм ном сургадаг багш нарын цалинг эрс нэмэгдүүлэхийг эрх баригч намаас шаардаж байна. МАН сонгуульд оролцохдоо эмч, багш нарын цалинг хоёр дахин нэмэгдүүлнэ гэж амласан шүү дээ.

Хүний эрхийн үндэсний комиссын бүх илтгэл УИХ-д ирдэг. Эдгээр илтгэлд Хөдөлмөрийн харилцаан дахь ялгаварлан гадуурхалт, ажлын байран дахь бэлгийн дарамт хэрээс хэтэрч байгааг, УИХ, Засгийн газар эдгээр зөрчлийг арилгах чиглэлээр дорвитой арга хэмжээ авахгүй байгааг шүүмжилсэн байдаг. Гэвч Засгийн газар болон энэ чиглэлээр үйл ажиллагаа явуулдаг төрийн байгуулагууд дорвитой арга хэмжээ авахгүй байна. Ганц жишээ хэлэхэд, эрх баригч нам өнөөдрийг хүртэл Хүний эрхийн дэд хорооны даргыг томилж өгөөгүй.

Мөн тусгай чиг үүргийн байгууллагуудын ажилтан, албан хаагчдад илүү цаг болон амралтын өдөр ажилласан нэмэгдлийг олгохгүй байгаа талаар, өрх толгойлсон эмэгтэйчүүд болон эрэгтэйчүүдийн эрх онцгой зөрчигдөж байгаа талаар мэдээлэл ирсээр байна. Хүний эрхийн түгээмэл тунхаглал болон Хөдөлмөр эрхлэлтийн бодлогын тухай конвенцид өрх толгойлсон эмэгтэйчүүд, эрэгтэйчүүдийг илүү цагаар ажиллуулахыг, үр хүүхдээс нь салгаж, хол томилж ажилууллахыг хориглодог. Гэтэл манай улсад энэ эрх ноцтой зөрчигдөж байна.

Миний бие Гааль, Мэргэжлийн хяналт, Хилийн цэрэг, Гадаадын иргэн харъяатын байцаагч нараас ирүүлсэн өргөдөл гомдлын дагуу 6-р сарын дундуур НИЙТИЙН СОНСГОЛ зохион байгуулахаар бэлтгэл ажлаа хангаж байна. Хөдөлмөрийн харилцааны явцад эрх нь зөрчигдөж буй бүх хүн УИХ руу өргөдөл, гомдлоо ирүүлээсэй гэж хүсч байна." гэлээ.

WWW.ZINDAA.MN

Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэлүүд ( 1 )

зочин [ 66.181.161.5 ]      |     5-р сарын 18 -нд, 12:34 минутанд

Тэгээд тэмцээд зөв болгоочээ ардчисан намынхаан.адгийнхулчгаруудаа.танай намын буруу шүү ард түмэн салбар.салбараараа бөөн.бөөнөөрөө бүгд болохгүй байгаа нь ардчилалын бодлого алдаатай байгааг харуулж байнаа.ганц 1бус.улс орон даяараа бүх юмс болохгүй байнаа. Засаачээ.

Go to top of page