Дамийл багшийн нэрэмжит тэмцээн маргааш Арвайхээрт эхэлнэ
Өвөрхангай аймгийн Гучин-Ус сумын уугуул, “Мехико-1968” олимпийн наадмын хүрэл медальт, ард олондоо “Дамийл” хэмээн хүндлэгдсэн Монгол Улсын ардын багш, гавьяат тамирчин Чимэдбазарын Дамдиншаравын нэрэмжит чөлөөт бөхийн өсвөр үе, залуучуудын олон улсын нээлттэй тэмцээн 2018.05.23-нд Өвөрхангай аймгийн Арвайхээр хотын спорт хорооны зааланд эхэлнэ.
Тамирчид 2001 оны нэгдүгээр сарын 1-ээс 2003 оны арванхоёрдугаар сарын 31-нд төрсөн өсвөр үеийн хөвгүүдийн 42, 45, 55, 65, охидын 43, 49, 57, 65,
1998 оны нэгдүгээр сарын 1-ээс 2000 оны арванхоёрдугаар сарын 31-нд төрсөн эрэгтэйчүүдийн 57, 61, 65, 71, эмэгтэйчүүдийн 53, 57, 62, 66 кг гэсэн нийт 16 жинд (хоёр жингийн зөрүүтэй байж болно) өрсөлдөх юм.
Тэмцээний эхний өдөр буюу маргааш өсвөр үе, хоёр дахь өдөр залуучуудын ангиллын барилдаан болно.
Монгол хүн олимпийн наадмаас медаль хүртсэний 50 жилийн ойн хүрээнд болж буй тус тэмцээнийг “Асашёорюү” сан, “Шинэ Өвөрхангай” төсөл, Өвөрхангай аймгийн ЗДТГ, нутгийн зөвлөл, БТСГ, МЧБХ хамтран зохион байгуулж байгаа аж.
Д.Тамир
WWW.ZINDAA.MN
Холбоотой мэдээ
Сэтгэгдэл ( 0 )