Хууль бусаар олгосон газруудыг цэгцлэх ажил үргэлжилж байна
Нийслэлийн Засаг дарга бөгөөд Улаанбаатар хотын Захирагч С.Батболдын авч хэрэгжүүлсэн нийтийн зориулалттай орон сууцны хороолол дунд болон ерөнхий боловсролын сургууль, цэцэрлэгийн ойр орчмын газарт орон сууц, конторын барилга барих зориулалтаар газар олгохыг хориглосон захирамж иргэдийн талархлыг хүлээгээд байгаа билээ.
Нийслэлийн Засаг даргын 2016-2020 оны үйл ажиллагааны хөтөлбөрт “Ухаалаг төлөвлөлт, ил тод газрын харилцаа” зорилт тусгагдсан бөгөөд эзэмшил газраа хуулийн хугацаанд ашиглаагүй, газар эзэмших эрх олгохдоо хууль тогтоомж зөрчсөн нь газрын наймаа дэлгэрэх, авилга, хээл хахуулийн үндэс болж байгааг хотын дарга анхааралдаа авч, хууль бус олгосон газруудыг цэгцлэх ажлыг шат дараатайгаар авч хэрэгжүүлж байна. Энэхүү үйл ажиллагааны хүрээнд 219 иргэн, хуулийн этгээдийн газар эзэмших эрхийг цуцалсан бөгөөд үүний дотор Нийслэлийн 29 болон 33 дугаар дунд сургуулийн хашаанд хууль бусаар олгосон газар, Богд хааны Ордон музейн хойд талд хууль бусаар олгосон газар гэх мэт ногоон байгууламж, нийтийн эзэмшлийн талбай дээр хууль бусаар олгосон газар эзэмших зөвшөөрлүүдийг хүчингүй болгосон юм.
Харин өчигдөр /2018.06.21/ Сүхбаатар дүүргийн 5 дугаар хорооны нутаг дэвсгэр, “Өгөөж Чихэр боов” ХК-ийн замын урд талын талбай буюу нийслэлчүүдийн нэрлэдгээр “Унагатай хөшөө”-тэй ногоон байгууламж дээр Сүхбаатар дүүргийн Засаг даргын 2010 оны 410 дугаар захирамжаар 1522м2 газрыг “Жи жи эй” ХХК-д үйлчилгээний зориулалтаар эзэмшүүлсэн нь Газрын тухай хуулийн 21.2.3, 33.1.1 мөн Хот байгуулалтын тухай хуулийн 24.1.6 дахь заалтыг тус тус зөрчсөн тул хотын дарга С.Батболд уг компанийн газар эзэмших эрхийн гэрчилгээг хүчингүй болгож, хуулийн дагуу холбогдох арга хэмжээг авч хэрэгжүүлэхийг Нийслэлийн Газрын албанд даалгалаа.
Цаашид Хотын дарга 2020 хүртэлх үйл ажиллагааны хөтөлбөртөө тусгагдсан нийслэлийн нутаг дэвсгэрийн газрын ашиглалт, хуваарилалттай холбоотой зорилтуудыг хэрэгжүүлэх үүднээс хууль бус газар олголттой тэмцэх үйл ажиллагаагаа эрчимтэй үргэлжлүүлэхээ илэрхийлээд, энэхүү үйл ажиллагаанд нийслэлийн иргэдийг хамтран ажиллахыг уриаллаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
Холбоотой мэдээ
Сэтгэгдэл ( 2 )
1-р хорооллын 11-р байрны урд хэсэгт баахан барилга байгууламж баригдсан. Одоо эмнэлгийн өргөтгөл барихаа зогсоо. Өнгөрсөн жил ЦАГДААГИЙН БАРИЛГЫН ӨРГӨТГӨЛ БАРЬСАН. Энд орон сууцны хороолол болхоос аж ахуйн газар байх байршил биш. Гэрээсээ гараад үүдэнд бөөн архичин, гэмт хэрэгт холбогдолтой хүмүүстэй эхлээд таарна, ахиад15 алхаад холхтлдсон цагдаа нартай таарна. Дахиад 15 алхаад эмнэлгийн өвчтөнгүүд зэрэглээд суусан байна. Ер нь өвчтэй хүн олны хөлийн газар сууж байх нь зөв үү. Халдварт өвчин гарвал яаж шийдэх вэ. Мэргэжлийн хүмүүс хариу өгөөрэй. Эмнэлэгтэй зэрэгцээд 99-р цэцэрлэг байна.
нийтийн эзэмшлийн зам талбай, автобусны буудал дээр байгаа 4-5 хүрэн, цагаан амбаарууд, ил худалдааг цэгцлэюж иргэдийг чөлөөтэй явах боломжийг бүрдүүлж өгөөч..., Ялангуяа Энхтайваны өргөн чөлөө 10, 1-р хорооллын зам талбай, автобусны буудлыг чөлөөлөх хэрэгтэй байна. Барс-2, хар хорин захын хоорондох ил худалдаа хар зах чиг боллоо. хариуцах эзэн алгаа.