Жинхэнэ Солонгос амтыг мэдрүүлэх “Лоттериа” Монголд

Өмнөд Солонгос  улсын “Лоттериа”  түргэн хоолны сүлжээ ресторан Монголд өнөөдөр  салбараа нээлээ.

Дотооддоо 1300 гаруй салбартай тус ресторан 10 салбарыг манай улсад нээхээр төлөвлөөд байгаа бөгөөд нээлтийн ёслолын үеэр Солонгосын “Лотте” группын түргэн хоол хариуцсан “Lotte GRS”  компанийн төлөөлөгчид тууз хайчлан нээлтийн үйл ажиллагааг эхлүүлсэн байна.

Жинхэнэ Солонгос амт чанарыг мэдрүүлэхийн тулд сургагч багш нарыг авчран ажилчдаа дадлагажуулж буй тус рестораны нээлтийн ажиллагаанд ирсэн эхний 100 хүнд үнэгүй бургер ундаагаар бэлэг барьсан бөгөөд бүтээгдэхүүнүүдийн түүхий эдийн ихэнх хувь нь Солонгос улсаас ирж буй гэнэ.

Одоогоор долоон улсад үйл ажиллагаагаа явуулж буй тэд олон улсад 300 гаруй салбартай болсон байна. Бусад түргэн хоолны сүлжээ ресторануудаас ялгарах онцлог нь олон төрлийн мах ашиглан бүтээгдэхүүнээ үйлдвэрлэдэгт байдаг бөгөөд далайн гаралтай бүтээгдэхүүнээр үйлдвэрлэсэн амтат хоолнуудаар хэрэглэгчдэд үйлчлэх ажээ.

Улирал бүр менюгээ шинэчлэн яваандаа зөвхөн Монгол хүнд тусгайлан зориулсан меню гаргах зорилготой ажиллаж буй тус хамт олон ая тухтай орчинд амт чанартай хоолоор ийн хэрэглэгч олонд үйлчилж эхэллээ. 

Б.Болор