Н.Энхбаярыг Триатлоны холбооны “Хүндэт Ерөнхийлөгч”-өөр сонгоё

Манай улсад жудогийн спорт хөгжөөд олон арван оны нүүр үзсэн ч 2008 оны Бээжингийн олимпод Н.Түвшинбаяр аварга болсноос хойш жудогийн спортоор хичээллэгсэдийн тоо хэд дахин өссөн судалгаа бий. Үүн лугаа Монгол Улсын гурав дахь Ерөнхийлөгч, МАХН-ын дарга Н.Энхбаяр Триатлоны тэмцээний 45 наснаас дээш насны ангилалд 60 настайдаа амжилт гаргасан цагаас хойш энэ спорт хүмүүсийн сонорт хүрч байна. Уг нь энэ спорт манай улсад хөгжөөд 14 жилийн нүүр үзэж байгаа ч нийт хүмүүсийн үгийн санд триатлон гэх үг төдийлөн байсангүй, зөвхөн спорт сонирхогчдын хүрээнд л энэ үгийг мэддэг байсан гэхэд хэтийдэхгүй. Харин 76 дугаартай Н.Энхбаяр гэх тамирчин триатлон гэх үгийг монголчуудын үгсийн санд байршуулж өгсөн явдал юм. Тэр угаасаа олон үгсийг монголчуудын үгсийн санд байршуулж өгсөн хүн л дээ. “Авлигын загалмайлсан эцэг”, “Дарангуйллын эзэн” “Албан тушаалын наймаачин”, “Улсаасаа баян Ерөнхийлөгч”  гээд олон үгийг бий болгосон ч энэ удаад хамаагүй өөр үгийг оруулж ирж байна. 

Олимпийн төрөлд багтсан энэ спортыг Монгол Улсад хөгжүүлэх үйлсэд хүчин зүтгэж яваа “Ironman” клубын захирал, дасгалжуулагч, Э.Уянга гэдэг бүсгүй байдгийг ч бид олж мэдлээ. Х.Булгантуяа хэмээх улстөрч бүсгүй ч энэ спортоор хичээллэдгийг олж мэдлээ. Ямартай ч Ерөнхийлөгч асан Н.Энхбаяр триатлоны спортыг Монгол Улсад хөгжихөд ихээхэн хувь нэмрээ оруулсан хүнээр тодорч байна.

Тэгэхээр энэхүү хувь нэмрийг өндрөөр үнэлж Триатлоны холбооны “Хүндэт Ерөнхийлөгч”-өөр өргөмжлөхөд болохгүй зүйл алга хэмээн хошин яриа ч газар авч байна. Ямар Гавьяат тамирчин өгөлтэй биш “Хүндэт Ерөнхийлөгч” бол болох л доо. “Амны билгээс ашдын билэг” гэдэг дээ, чихэнд чимэгтэй л үг. Нөгөө талаас нэгэн жарны босгоор давж байгаа МАХН-ын дарга “нас бол тоо” гэдгийг харуулж чадлаа гэх хүн ч бий. Спорт, уйгагүй хөдөлмөр бол хүнийг ямар хэмжээнд байлгаж чаддагийг ч харууллаа хэмээн халаглаж байгаа хүнтэй ч таарав. Түүнээс бус өдгөө УИХ-ын дугуй танхимд сууж байгаа цор цор хийсэн банди нарыг гаргаад уралдуулах юм бол түргэн тусламж дуудах хэрэгтэй болох нь дамжиггүй. Аягүй бол хүн амины хэрэгт орно гэх чимээ ч сонсогдов.  

Үүнээс гадна МАХН-ын дарга Н.Энхбаярын тэмцээнд оролцсон дугаар нь 76 гэсэн тоо байх юм. Ирэх аравдугаар сард Хэнтий аймагт буюу УИХ-ын 42 дугаар тойрогт нөхөн сонгууль болохоор улс төрийн намууд нэр дэвшигчдээ дотооддоо сунгаж байгаа. УИХ-ын гишүүн Д.Гантулга бүрэн эрхээсээ түдгэлзсэн учир өнөөдөр УИХ 75 гишүүнтэйгээр үйл ажиллагаа явуулж буй. Тодотговол 76 дахь нөхрийг сонгох сонгууль хоёрхон сарын дараа болно. Ийм цаг мөчид Триатлоны тэмцээнд оролцсон Н.Энхбаярт 76 гэсэн тоо таарсан нь билэгдэлт түмний таашаалд нийцэж байгаа бол түүнийг эсэргүүцэгчдийн дургүйцлийг хүргээд байна. Тодотгож хэлбэл, өдгөө ч түүнээс айж явдаг, айдсандаа өлгийтэй байгаа нөхдөд таатай санагдахгүй байгаа бололтой. Аргагүй л дээ “Дарангуйллын эзэн” нэр зүүж явсан хүн шүү дээ.

Өнөөдөр лидер хэмээн өөрийгөө цоллуулах болсон бүх нөхөд ямар нэгэн хэмжээгээр Н.Энхбаяраар хөтлүүлж, дэмжүүлж их улс төрд хөл тавьсан төдийгүй түүний “далайсан газар далд орж далласан газар далд орж” явсан гэхэд хэтийдсэн хэрэг болохгүй. Н.Энхбаяр нь эдгээр нөхдийг мөнгөөр, “авлигын сүлжээний тор сүлжих” гэж оруулж ирсэн ч гэдэг. Аль нь ч бай түүнээс айдаг байсан туйлын үнэн.

Өдгөө УИХ-ын гишүүн нэр зүүчихээд цор цор гээд байгаа банди нарын хувьд бол тэнгэрт суугаа “үүлэн бурхан” байв. Тэдний хувьд бол Н.Энхбаярын зураг байхад л хангалттай, бараг л зурганд нь мөргөж явсан цаг байсныг ч нэртэй устай өгүүлэх хүн олон байдаг юм билээ.

Тэгэхээр Тритлоны тэмцээнд 76 дугаартай оролцож айрагдсан 60 настай Н.Энхбаярт тааламжгүй л хандах байх. Харин өдгөө ч иргэдийн дунд нэр нөлөөгөө алдаагүй байгаа түүнд бол билгэдэлтэй л санагдах байх даа. Юу ч бай Н.Энхбаяр Триатлоны спортыг Монгол Улсад хөгжүүлэхэд томоохон хувь нэмэр оруулсан нь яах аргагүй үнэн шүү.

С.Ууганбаяр

www.zindaa.mn