МАН-ын Бага хурал 52,8 хувийн ирцтэй хуралдаж байна

МАН-ын Бага хурал 200 орчим гишүүнтэйгээр 52.8 хувийн ирцтэй эхэлж, МАН-ын Ерөнхий нарийн бичгийн дарга Д.Амарбаясгалан сэтгүүлчдэд хурлын талаар мэдээлэл өгсөн юм.  Тэрбээр энэ удаагийн Бага хурлаар үндсэн хоёр асуудал хэлэлцэхээр төлөвлөснөө товч танилцуулсан. Нэгдүгээрт, УИХ-ын сонгуулийн 42 дугаар тойрогт болох нөхөн сонгуульд оролцох эсэх асуудлыг хэлэлцэж 100 хувийн саналаар нэр дэвшигч явуулах нь зөв хэмээн үзжээ. Хоёрдугаарт, энэ удаагийн хуралдаанаар зөвхөн 60 тэрбумын асуудал ч бус 2016 оны сонгуулийн үр дүнд намаас албан тушаал авсан хүмүүст хариуцлага тооцох, намын нэр хүндэд сэвтэй үйлдэл хийсэн, намын мөрийн хөтөлбөрийг хэрэгжүүлж ажиллаагүй алба хаагчтай хариуцлага тооцох, ийм системийг бий болгох тал дээр нухацтай ярилцана” хэмээлээ.

Мөнхүү Хэнтий аймагт болох нөхөн сонгуультай холбоотойгоор Сонгуулийн Ерөнхий хороо, Үндсэн хуулийн цэцэд албан тоот хүргүүлж, тайлбар авах зүй ёсны шаардлага байгааг хэлсэн бөгөөд МАН-ын аль ч шатнаас нөхөн сонгуульд өрсөлдөх бүрэн боломж бий гэлээ. Одоогоор Бага хурлын үйл ажиллагаа завсарлаад байна.

С.Ууганбаяр

www.zindaa.mn