САЙХАН МЭДЭЭ: СХД-ийн 23-р хороонд шинэ сургууль сүндэрлэнэ

2018 оны 09 сарын 11

Сонгинохайрхан дүүргийн 23-р хороо нь нийслэлийн хэмжээнд сургууль, цэцэрлэггүй таван хорооны нэгээр нэрлэгдэж байсан юм. УИХ-ын гишүүн Н.Учралын сонгогдсон тойргийн хүрээнд СХД-ийн 23-р хороо багтаж байгаагийн хувьд тус хорооноос сонгогдсон УИХ-ын гишүүний үүргээ биелүүлж, өөрийн санал санаачлагаар хийж хэрэгжүүлж буй  640 хүүхдийн суудал бүхий Ерөнхий боловсролын сургуулийн барилгын ажлын шав тавих ёслол боллоо. УИХ-ын гишүүн Н.Учрал 2016 оны УИХ-ын сонгуульд нэр дэвшихдээ танилцуулж байсан мөрийн хөтөлбөрийн дагуу 2018 оны улсын төсөвт 23-р хорооны сургууль, цэцэрлэгийн барилгын ажлын төсвийг суулгуулж чадсанаар өнөөдөр энэхүү ажил эхэлж байгаа юм. 

 СХД-ийн 23-р хороо нь байгуулагдаад 11 жил болж байгаа, 13000 орчим хүн амтай томоохон хороо хэдий ч өдийг хүртэл сургууль цэцэрлэггүй байсан ба хүүхэд багачууд нь зэргэлдээх хороодын харьяаллын бус сургуулиудад суралцаж тэдгээр сургуулиуд нь ачааллаа дийлэхгүй гурван ээлжээр хичээллэж байгаа нь иргэдэд туйлын хүндрэлтэй байна. Дээрх сургууль ашиглалтад орсноор ачааллаа дийлэхгүй байгаа 62-р сургуулийн ачаалал буурахын зэрэгцээ 23-р хорооны 1300 орчим хүүхэд багачууд маань ойролцоо сургуульд хамрагдах бүрэн боломжтой болж байгаа юм.

Барилгын ажлын гүйцэтгэгчээр “Хүрэл Ордон” ХХК сонгогдсон ба байгалийн гэрлийг түлхүү ашиглаж эко загвар дизайн бүхий зураг төслийг гаргаж бүтээн байгуулалтын ажлыг нэг жил орчмын хугацаанд чанарын өндөр түвшинд гүйцэтгэх болно гэдгээ хэлж байлаа.  Улсын их хурлын гишүүн Н.Учрал 2016 оны улсын их хурлын сонгуульд нэр дэвшин өрсөлдөж байхдаа тус хороог сургууль цэцэрлэгтэй болгоно гэж амлаж байсан мөрийн хөтөлбөрөө хэрэгжүүлэн ажиллаж байгаадаа сэтгэл хангалуун байгаагаа илэрхийлж үлдсэн 2 жилийн хугацаанд бусад амласан амлалтаа хэрэгжүүлэн ажиллах болно гэдгээ хэлсэн юм.


WWW.ZINDAA.MN


Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top