Багш нар минь улс төрийн золиос боллоо

Багш нарын тэмцэл хаана хүрч, Монгол Улсын ирээдүй болсон хүүхэд багачууд сургууль цэцэрлэгтээ хэзээ явахыг өнөөдөр таах аргагүй боллоо. Учир нь багш нарын тэмцлийн галыг хөгжөөгчдийн эгнээ өдрөөс өдөрт хүрээгээ тэлсээр. Засгийн газраас багш нарын цалинг байгаа нөхцөлөө шавхаад 8-12 хувиар нэмчихсэн. Тиймээс эрх баригчид өнөөдрийн байдалд өөр боломж үгүй, цаашид шат дараалалтай нэмнэ гэдгээ ч удаа дараа тайлбарласан. Өөр боломж Монголын эдийн засагт байхгүйг тэмцлийг эхлүүлэгч, хавсран гүйцэтгэгч, галыг хөгжөөгчид бүгд сайнаас сайн мэдэж байгаа. Гэсэн хэдий ч өөрсдийн эрх ашиг, суудлын төлөө Монгол Улсын ирээдүйг зольж байгаад харамсаж байна.

Сөрөг хүчний үүрэг гүйцэтгэж буй С.Эрдэнийг тэмцлийн “нууц ноёнтон” гэх хардлага нийгэмд давалгаалаад буй. Үнэн худлыг бүү мэд. Хэрвээ үнэн бол түүний хувьд ч яахав, Монголын нийгэм нуран унаж, ард иргэд өлсөж ундаасч байсан ч хамаагүй зүтгэх болно. “Нууц ноёнтон”-ы санаа бол нийгэм эдийн засгийн байдлыг энэ хэрээр унагааж, ард иргэдийг элдэв тэмцэлд турхирч, эрх баригчдыг муу муухай харагдуулах нь түүнд ашигтай. Үнэнийг хэлэхэд туйлын хүсэл нь болох ирээдүйд Ерөнхий сайдын суудал руу ямар ч үнээр хамаагүй очихоор зүтгэж байгаа нэг муу улстөрч, хоосон мөрөөдөгч.

Багш нар ойлгох хэрэгтэй. Ерөнхий сайдын суудал зүүдэлсэн ганц улстөрчийн золиос болж ирээдүй болсон хүүхэд багачуудаа хорлож, өөрсдийнхөө ажил амьдралаар дэнчин тавих хэрэггүй. Дутуу гачуу ч гэсэн та нарын амьдрал болохоос С.Эрдэнийн амьдрал биш. Тэд хэрвээ хүслээ гүйцэлдүүлж чадвал маргааш нь та нарыг тоохгүй орхино, улс төр өөрөө ийм шүү дээ. 

Үүнээс гадна С.Эрдэнийн хавсран гүйцэтгэгчээр ажиллаж байгаа хэмээн нийгэмд хардагдаж буй Х.Амгаланбаатар бол Үйлдвэрчний эвлэл хэмээх олон жилийн түүхтэй байгууллагаар нэгэн шат хийж улс төрд орох гэсэн нэгэн “Том санаатан”. Түүнээс багш нарт хайртайдаа гүйгээд байгаа хэрэг огт биш. Монголын үрсийг боддоггүй юм гэхэд ажил төрөл, ар гэрээ бод. Нэг муу улстөрд санаархагчийн хүслийг гүйцэлдүүлэх гэж багшийн диплом өвөртлөөгүй юм байгаа биз дээ. Хэн нэгэн хэнээрхэгчийн төлөө ар гэр, амьдралаа золиослож болохгүй гэж бодлоо.

Нөгөө талаас хийх ажилгүй, их улс төрд гишгих газаргүй болсон Н.Энхбаяр бас юу вэ, тэнд оччихсон тууж явах юм. “Багш нарынхаа цалинг нэмэж ахуй амьдралыг бодох цаг нь болсон. Багш нар ямар Оюутолгой, Тавантолгойг өг гэж нэхэж байгаа биш, цалингаа нэмүүл” гэж шаардаж байна гээд улайх ч үгүй ярьж зогсоно лээ. Соёлын сайдаас эхлээд Төрийн бүхий л өндөрлөгт заларч “хаан” мэт явахдаа багш нарын ахуй амьдралд ямар тус хүргэсэн хүн бэ гэж багш нараасаа асуухад хүргэнэ. Цалин нэмлээ гэхэд Н.Энхбаяр нэмэхгүй, багш нарын ахуй амьдралыг сайжрууллаа гэхэд Н.Энхбаяр сайжруулахгүй. Түүнд ямар эрх мэдэл байгаа юм бэ. Зүгээр л та нараар дамжуулан нийгэмд нэр нүүрээ өсгөх гэсэн карьер нь унтарсан нэг нөхөр. Багш нарыгаа нэг муу карьер нь дууссан улстөрчийн нэр хүндийг өсгөх гэж энд суугаагүй гэж бодно.

Сүүлдээ бүр улс төр сонирхогч, карьерээ өсгөх гэж ядсан аль адгийн шаарнуудын зугаагаа гаргадаг зүйл нь та нарын тэмцэл боллоо. Одоо босоод ахуй амьдралаа бод. Эцэст нь хэлэхэд, энэ тэмцлийн үр дүнг дээрх хэдэн нөхөд л чамгүй сайн хүртэж харагдана. Тэд та нараас авах юм аа аваад ор тас алга болно гэдгийг сайн санах хэрэгтэй.

С.Ууганбаяр

www.zindaa.mn