”Унадаг дугуй, алхалтыг дэмжье” уриатай “Автомашингүй өдөр” боллоо
Дэлхий даяар жил бүрийн есдүгээр сарын 22-нд уламжлал болгон тэмдэглэж ирсэн “Автомашингүй өдөр” өнөөдөр тохиож байна. Нийт 40 гаруй улс орны 1000 гаруй хотод зохион байгуулагдаж буй “Автомашингүй өдөр”-ийг манай улс анх 2009 оноос эхлэн тэмдэглэх болжээ.
Өдгөө найм дахь жилдээ тэмдэглэж байгаа энэхүү өдрийг “Автомашинаас татгалзаж, унадаг дугуй, алхалтыг дэмжье” уриан дор НЗДТГ, НЭМГ, НЦГ-аас хамтран зохион байгуулж байна. “Автомашингүй өдөр”-т зориулсан урлаг, спортын арга хэмжээний нээлтэнд НЗДТГ-ын Нийгмийн бодлогын хэлтсийн дарга М.Эрдэнэжаргал, Нийслэлийн Эрүүл мэндийн газрын дарга Л.Төмөрбаатар, ЦЕГ-ын Тээврийн Цагдаагийн албаны Урьдчилан сэргийлэх хэлтсийн ахлах мэргэжилтэн, цагдаагийн хошууч Б.Лхагважаргал, Нийслэлийн цагдаагийн газрын Урьдчилан сэргийлэх хэлтсийн дарга, цагдаагийн дэд хурандаа Л.Амармөрөн, Нийслэлийн Соёл урлагийн газрын Соёлын хэлтсийн дарга М.Мөнхсайхан болон албаны бусад хүмүүс оролцлоо.
Сүүлийн жилүүдэд нийслэл хот руу чиглэсэн шилжилт хөдөлгөөний улмаас хүн амын тоо эрчимтэй нэмэгдэхийн хэрээр автомашины тоо ихсэж, агаарын бохирдлыг нэмэгдүүлэн хүний эрүүл мэндэд сөргөөр нөлөөлөх хүчин зүйлийн нэг болж байна. Тиймээс энэхүү өдрийг тэмдэглэх нь агаарын бохирдол, автомашины хэрэглээг бууруулах, улмаар манай орны төдийгүй дэлхий нийтийн өвчлөл, тахир дутуу болох, нас баралтын тэргүүлэх шалтгааны нэг болж буй зам тээврийн осол гэмтлийг бууруулах, иргэдэд эрүүл амьдралын хэвшил, идэвхтэй хөдөлгөөнийг төлөвшүүлэх замаар халдварт бус өвчлөлийг бууруулах ач холбогдолтой юм.
“Автомашингүй өдөр”-ийн хүрээнд НЭМГ болон харьяа эрүүл мэндийн байгууллагууд иргэд, олон нийтэд автомашинаас татгалзах, унадаг дугуй, явган алхах, дасгал хөдөлгөөнөөр хичээллэх, идэвхтэй хөдөлгөөнийг төлөвшүүлэх тухай мэдээлэл, сургалт сурталчилгааг хүргэж буй бөгөөд “Үзэсгэлэнт Улаанбаатар өртөөт марафон” гүйлтийн тэмцээнд баг болон оролцож байна.
Мөн энэ өдөр Монголын улаан загалмайн нийгэмлэг, АШУҮИС, Цагдаагийн академи, Төмөр замын дээд сургууль, “Ач” болон “Этүгэн” дээд сургуулийн оюутан залуус, сайн дурын ажилтнууд, гишүүд дэмжигчид баярын жагсаал хийлээ. Нийслэлийн иргэд авто замаар явган зорчиж, хүүхэд хөгшид салхилж зугаалсан “Автомашингүй өдөр”-өөр төв талбайд “Хүүхэд бүриийг зам тээврийн ослоос хамгаалъя” шохойн зургийн уралдаан, “Хотын соёлыг хогийн савнаас” хөгжөөнт тоглоом, замын хөдөлгөөний аюулгүй байлдлыг сурталчилсан АХА тэмцээн, фитнесс бялдаржуулах, чийрэгжүүлэх төвүүдийн үзүүлбэр, дугуйн парад зэрэг олон төрлийн арга хэмжээ зохион байгуулагдаж байна.
Энэхүү өдрийн гол зорилго нь НҮБ-ын 64 дүгээр Ассамблейн “Дэлхийн замын аюулгүй байдлыг сайжруулах тухай” тогтоолыг хэрэгжүүлэх, автомашины хэрэглээг хязгаарлаж бусад нийтийн тээвэр, унадаг дугуй зэргийг сонгох, явган алхалтыг дэмжих, автозамын түгжрэлээс үүдэлтэй хүн амын дундах бухимдал, цаг алдалтыг багасгах, агаарын бохирдлыг бууруулах, эрүүл аж төрөх орчин нөхцлийг бүрдүүлэн идэвхтэй хөдөлгөөнийг дэмжих замаар иргэдэд халдварт бус өвчнөөс урьдчилан сэргийлэх, мэдлэг олгох, эрүүл зан үйл төлөвшүүлэхэд оршиж буй юм.
Дашрамд дурдахад, ДЭМБ-ын судалгаагаар жил бүр ойролцоогоор таван сая хүн осол гэмтэл болон гадны шалтгааны улмаас нас барж байна. Ялангуяа зөвхөн зам тээврийн ослын улмаас 1,2 сая гаруй хүн амь насаа алдаж, 20-50 сая хүн тахир дутуу болж байгаа бөгөөд энэ чиглэлээр тодорхой арга хэмжээ авахгүй бол 2020 он гэхэд автомашин хурдацтай хөгжиж буй улс орнуудад осол гэмтлийн түвшин маш аюултай хэмжээнд хүрч болзошгүй байгаа юм. Осол гэмтэлд өртөгсдийн 50 орчим хувь нь өсвөр насны буюу 10-24 насны залуучууд байгааг судалгаагаар тогтоосон байна.
Эх сурвалж: НЭМГ
Холбоотой мэдээ
Сэтгэгдэл ( 0 )