Түлшний үнийг дагасан ЗОХИЦУУЛАЛТ хэзээ өөрчлөгдөх вэ?
Дэлхийн зах зээл дээр өнөөдрийн байдлаар брент маркийн нэг баррель түүхий тосны ханш 83.37 ам.доллар буюу 0.94 хувиар унасан ханштай байна. Тэгвэл Монголын импортлогчид жижиглэнгийн үнээ нэмж, шинэ долоо хоногийг эхлүүллээ.
Хойд хөршөөс, нэг цоргоноос түлшээ авчирдаг импортлогчид энэ удаа үнэ нэмэх болсон шалтгаанаа нефтийн салбартайгаа уяхаас илүүтэй, ам.долларын ханшийн өсөлттэй холбохыг чухалчилж байх шиг байна. Түлшний үнэ бусад бараа үйлчилгээнд нөлөөлдөг суурь үнэ тул, анхаарал татсан сэдэв. Импортлогчдын ШТС-ууд АИ-92, АИ-95 түлшний үнийг 60-80 төгрөгөөр нэмж борлуулж эхэлжээ. Дизель түлшний үнэ ч өссөн байна.
Тэгэхээр импортлогчид ийн нийлж, нэгдэн арга хэмжээ авч буйтай зэрэгцэн төрийн зүгээс зохицуулалт хийгдэх үү гэдэг асуудал дагана. Өнгөрсөн жилүүдэд Засгийн газраас татварын түвшнийг өөрчлөх замаар шатахууны үнийг барьж ирсэн.
ШАТАХУУНЫ ҮНЭ, ХИЛИЙН ҮНЭ, ОАТ-ЫН СҮҮЛИЙН 7 ЖИЛИЙН ХЭЛБЭЛЗЛИЙГ ХАРЬЦУУЛСАН СУДАЛГАА
Мөн “Роснефть” компанид хандан нийлүүлэлтийн үнээ буулгаач гэж гуйсан хүсэлт тавьж ирсэн байдаг. Уг нь түлшний үнийг тогтоох боломж нөөц манайд бий. Дотооддоо нефтийн үйлдвэрүүдээ барьж, түлш хэрэглэх өртөг зардлаа бууруулах гарц ч бий. Гэвч ажил хэрэг болгохгүй байсаар өдийг хүрсэн. Энэтхэгийн зээлээр барих үйлдвэр ашиглалтад орох хугацааг наашлуулж харлаа гэхэд л 2022 он. Гэтэл манай улсын түлшний хэрэглээ үргэлж өсч байна. Жилдээ тэрбум илүү ам.долларыг түлш авахаар урсгаж байна.
Уул уурхай, хүнд үйлдвэр /УУХҮ/-ийн сайд Д.Сумъяабазар өнгөрөгч сард ОХУ-д айлчлах үеэр хэлэхдээ “Манай улсын хувьд шатахуун, түлш стратегийн чухал бүтээгдэхүүн. Тиймээс уг бүтээгдэхүүний нөөц хангамжийг зохих түвшинд байлгаж, гаалийн баталгаат агуулах нэмж барих шаардлага тулгарч байна. Түүнчлэн ард иргэдийн амьжиргаанд шууд нөлөөлдөг шатахууны үнийг тогтвортой байлгахад дорвитой арга хэмжээ авах боломжийг эрэлхийлж байна. Засгийн газрын шийдвэрээр Монгол Улсад нефть боловсруулах үйлдвэрийг БНЭУ-ын Экспорт-Импортын банкны санхүүжилтаар барьж байгуулахаар болсон. “Роснефть” компани нефть хайгуул, боловсруулах салбарт маш том туршлагатай. Энэ сарын сүүлээр тус компанийн үйлдвэрлэл хариуцсан орлогч дарга А.А.Романов тэргүүтэй мэргэжилтнүүд манай улсад барих нефть боловсруулах үйлдвэрийн талбай, байгалийн хий дамжуулах хоолой явах зарим газрууд болон олборлолт хийж буй “Петро Чайна Дачин Тамсаг” компанийн 19, 21 дүгээр талбайд очиж ажиллахаар боллоо” гэснийг дашрамд сануулъя.
Э.Болор
Холбоотой мэдээ
Сэтгэгдэл ( 0 )