Монгол-Чехийн бизнес уулзалт боллоо

Э.Тэргэл | Zindaa.mn
2018 оны 10 сарын 11

Монгол-Чехийн бизнес форумыг 2012 оноос жил бүр амжилттай хамтран зохион байгуулж байгаа бөгөөд энэхүү форумын зорилго нь хоёр орны худалдаа, эдийн засгийн хамтын ажиллагааг гүнзгийрүүлэх, хөрөнгө оруулалтыг нэмэгдүүлэх, шинэ бизнесийн боломжуудыг нээж өгөх явдал юм.

Энэ удаагийн бизнес форумд оролцохоор Чех Улсын бохир ус цэвэршүүлэх, машин тоног төхөөрөмж, хөдөө аж ахуйн жижиг оврын техник, банк, тээвэр, тээвэр зуучлал зэрэг чиглэлийн 10 орчим аж ахуйн нэгжийн 20 гаруй төлөөлөгч оролцохоор Монгол Улсад хүрэлцэн ирсний зэрэгцээ Монголын талаас 30 гаруй аж ахуйн нэгжийн төлөөлөл оролцож байгаа.

Манай хоёр улсын худалдаа, хөрөнгө оруулалтын өнөөгийн хэмжээ бодит боломжоос доогуур байгаа бөгөөд үүнийг цаашид нэмэгдүүлэх, экспортын нэр төрлийг олшруулах, хөрөнгө оруулалтыг дэмжих, эдийн засгийн хамтын ажиллагааг өргөжүүлэх нөөц бололцоо бүрэн байгаа билээ.

Монгол Улс, Европын Холбооны хоорондын Түншлэл, хамтын ажиллагааны хэлэлцээр 2017 оны 11 дүгээр сарын 1-ний өдөр үйлчилж эхэлснээр худалдаа, эдийн засаг, боловсрол, соёл, шинжлэх ухаан зэрэг олон салбарт хамтран ажиллах эрх зүйн таатай орчин.

Хоёр улсын эдийн засгийн хамтын ажиллагааг бүхий л салбарт идэвхжүүлэн хөгжүүлэхэд Худалдаа, эдийн засаг, шинжлэх ухаан, техникийн хамтын ажиллагааны Монгол, Чехийн Засгийн газар хоорондын хамтарсан комиссын хуралдаан чухал үүрэгтэй байдаг.

Энэхүү ЗГХХК-ын ээлжит хуралдаан энэ оны 4 дүгээр сарын 9-10-ны өдрүүдэд Чех Улсын Прага хотноо амжилттай зохион байгуулагдаж, уг хуралдааны үеэр хоёр талын худалдаа, хөрөнгө оруулалт, эдийн засгийн хамтын ажиллагааг өргөжүүлэх боломж, арга зам, санал санаачлага, тулгамдаж буй асуудлуудыг дэлгэрэнгүй хэлэлцэж, цаашид хамтран хэрэгжүүлэх үйл ажиллагааны чиглэл, зорилтыг тодорхойлсон.

Монгол, Чехийн хувийн хэвшил, бизнесийнхэний хооронд хөдөө аж ахуй, уул уурхай, эрчим хүч, дэд бүтэц, үйлдвэржилт, байгаль орчин хамгаалал, эрүүл мэнд болон бусад олон салбаруудад хамтран ажиллах бүрэн боломж байна.

Өнөөдрийн энэхүү бизнес форум нь хоёр улсын хувийн аж ахуйн нэгж, бизнес эрхлэгчдэд шинэ боломж, зах зээл, түншлэл, харилцаа холбоо тогтоох боломжийг бүрдүүлэх юм.

Эх сурвалж: Эрүүл мэндийн яам

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top