ТОМИЛОЛТ: Хөгжилд хөтлөх спорт цогцолборын барилгын ажил 77 хувьд хүрчээ

Б.Эрхэс | Zindaa.mn
2018 оны 10 сарын 22

Дархан-Уул аймгийн Дархан сумын нутаг дэвсгэрт дэлхийн стандартад нийцсэн Спорт, соёл үйлчилгээний цогцолбор барьж, ашиглалтад оруулах тухай яриа арав гаруй жилийн өмнөөс сонсогдож эхэлсэн билээ. Тухайн үедээ зураг төсөл нь хүртэл гарчихсан гагцхүү газар шорооны болон барилга угсралтын ажлыг хэзээ эхлүүлэх, хэдэн онд барьж ашиглалтад оруулах зэрэг нарийвчилсан төлөвлөгөөгөө л хүлээж байв. Харин зураг төсөл гарснаас хойш гурван жилийн дараа буюу 2011-2012 онд газар шорооны ажлыг эхлүүлсэн юм. Ингэснээр дэлхийн жишигт нийцсэн Спорт, соёл үйлчилгээний цогцолбортой болох дарханчуудын мөрөөдөл хөрсөнд бууж эхэлсэн гэхэд болно.

Харамсалтай нь, газар шорооны ажил нь эхэлсэн ч төд удалгүй УИХ-ын 63 дугаар тогтоол гарч, барилгын ажлыг царцаасан байдаг. Гэвч Дархан-Уул аймгаас парламентад сонгогдсон Б.Жавхлан нарын гишүүдийн санал, хүчээр 2016 оноос барилга, угсралтын ажлыг эхлүүлсэн юм. Өнөөдөр тус сумын 14 багийн нутаг дэвсгэрт буюу "Дархан-50" цогцолбор болон Дархан хотын залуучууд театрын чанх голд баригдаж байгаа 2200 хүний суудалтай, олон улсын жишигт нийцсэн Спорт, соёл үйлчилгээний цогцолборын барилга, угсралтын ажил 77 хувьтай байна. 

СПОРТ, СОЁЛ ҮЙЛЧИЛГЭЭНИЙ ЦОГЦОЛБОРЫГ
ИРЭХ ОНД АШИГЛАЛТАД ОРУУЛНА


Энэхүү үйлчилгээний цогцолборын гүйцэтгэгч компаниар "Химон констракшн" болон "Нэмбар" ХХК ажиллаж байна. Тэд ирэх оны арваннэгдүгээр сарын 30-нд барилга, угсралтын ажлыг дуусгаж, ашиглалтад хүлээлгэж өгөхөөр ажиллаж байгаа аж. Барилга, угсралтын ажлын явцын талаар "Нэмбар" компанийн инженер Э.Энхцацрал "Манай спорт цогцолборын барилгын ажил 77 хувьтай явж байна. Бид олон улсын стандартад дөхүүлж барига, угсралтын ажлаа хийж байна. Энэ хүрээнд зарим нэг зураг төсөл нь хийгдэж байна. Удахгүй бид халаалтаа авна. Халаалтаа авсны дараа дотор ажил хийхэд ямар ч асуудалгүй болно. Ингэснээр ажил зогсолтгүй үргэлжилнэ" хэмээн ярилаа.


Боловсрол, соёл, шинжлэх ухаан, спортын яамны захиалгаар Дархан-Уул аймгийн Дархан сумын 14 дүгээр багийн нутаг дэвсгэрт баригдаж байгаа энэхүү Спорт, соёл үйлчилгээний цогцолбор нь дөрвөн блокоос бүрдэж байгаа аж. Нийт 25 мянган ам.метр талбайн 19800-д нь барилга, угсралтын ажлыг явуулж байна. Төсөвт өртөг нь нийт 21 тэрбум 443 сая төгрөг аж. Энэхүү үйлчилгээний цогцолборт 2200 хүний суудалтай дэлхийн стандартад нийцсэн ганц спортын тэмцээн бус урлаг, соёлын тоглолтыг хүртэл хийхэд тохиромжтой заалтайгаас гадна тамирчдын бэлтгэл хийх хоёр том заал, усан бассей зэрэг багтжээ.

Энэ талаар "Нэмбар" ХХК-ийн инженер Э.Энхцацрал "Энэхүү цогцолборын усан бассейг Итали стандартаар хийж байна. Аливаа олон улсын чанартай тэмцээн явуулахад тусгай стандарттай юм билээ. Тэр л стандартад нийцүүлж барьж байна. Харин спорт заалны шаланд тусгай шаардлага тавьдаг юм билээ. АНУ-ын дэлхийн стандартад нийцсэн шалыг хийж байна" гэв.

Б.ЖАВХЛАН ГИШҮҮН ТОЙРГЫНХОО ТАВАН ТЭРБУМЫГ
СПОРТ ЦОГЦОЛБОРТ ЗАРЦУУЛЖЭЭ


Спорт, соёл үйлчилгээний цогцолборын барилга угсралтын ажлын явцтай УИХ-ын гишүүн Б.Жавхлан өнгөрсөн бямба /2018.10.20/ гарагт танилцсан юм. Тэрбээр энэ үеэрээ "Спорт, соёл үйлчилгээний цогцолборыг барихад нийт 21 тэрбум төгрөг болно гэж тооцоод 2013 оны төсөвт тодотгол хийсэн. Тухайн оныхоо байдлаар 14 тэрбум төгрөгийн санхүүжилтийг нь шийдсэн. Харин 2016 оноос хойш хөөцөлдсөөр үлдэгдэл 6.4 тэрбум төгрөгийг нь шийдсэн. Жишээ нь, өнгөрсөн онд манай тойрогт хуваарилсан гишүүний таван тэрбум төгрөгийг энэхүү бүтээн байгуулалтын ажилд зарцуулсан. Орон нутагт хийх бүх бүтээн байгуулалтаа хойш нь тавьж байгаад 80 хувийг нь энэхүү байгууламжид зарцуулсан гэж ойлгож болно" хэмээн хэллээ. 

Түүнчлэн "Манай спорт цогцолбор ашиглалтад орчих юм бол ОХУ-ын Буриад, Эрхүү зэрэг мужтай олон спортын чиглэлээр харилцан тэмцээн, уралдаан зохион байгуулж болно. Өөрөөр хэлбэл, том хэмжээний тэмцээн, бүсийн хэмжээний уралдааныг зохион байгуулах боломжтой болох юм. Олон улсын стандартад нийцсэн хөдөө, орон нутагт баригдсан анхны цогцолбор болно" гэв.

СПОРТ ЦОГЦОЛБОР АШИГЛАЛТАД ОРСНООР 76 ХҮН АЖИЛТАЙ БОЛНО


Энэхүү Спорт, соёл үйлчилгээний цогцолбор нь ашиглалтад орсноор шинээр 76 ажлын байр бий болох аж. Цогцолборын ашиглалтын зардал нь 10-15 сая төгрөг гарна гэж тооцжээ. Гэхдээ Спорт, соёл үйлчилгээний цогцолбор дангаараа энэ их хэмжээний мөнгийг төлж чадахгүй гэнэ. Тиймээс аймгийн удирдлагууд барилгын С, D гэсэн хоёр блокт төрийн захиргааг оруулахаар төлөвлөжээ. Өөрөөр хэлбэл, түрээслэх хэлбэрээр ашиглалтын зардлаа гаргаж авахаар төлөвлөөд байгаа юм байна.


Б.ЭРХЭС

WWW.ZINDAA.MN

Сэтгэгдэл ( 1 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Дарханы иргэн (64.119.17.173) 2018 оны 10 сарын 22

Дарханчууд шинэ барилгын ажлыг анхааралтай ажиглаж байгаа . Жавхлан гишүүнд талархаж байна монголын хоёр дахь хот хөгжилгүй их удлаа Харин гишүүн минь эмнэлгийг өргөтгөх талаар анхаарахыг хүсье хот хөгжөөд эмнэлэг багадаад байна даа

0  |  0
Top