“Ээж” киноны аймшигт Ченгиз буюу жүжигчин Беркай Атеш

  Үзэгчдийг дэлгэцийн өмнө уясаар байгаа Туркийн “Ээж” олон ангит киноны аймшигт хойд эцэг, үл бүтэх этгээд, харгис нөхөр Ченгизийн дүрийг жүжигчин Беркай Атеш бүтээсэн. Ченгизийн дүрийг үзэн ядалт төрүүлж, үзэгчдийн шар үс бостол бүтээсэн түүний талаарх үзэгч таны мэдэхгүй зарим баримтыг сонирхуулъя.

 Беркай Атеш 1987 оны хоёрдугаар сарын 19-нд Истанбулд төрсөн. Туркийн кино, театрын жүжигчин.

Беркай 22 дахь удаагийн “Алтан бөмбөлөг” кино наадмын “Амжилттай залуу жүжигчин” шагналтай. Тэрбээр жүжиглэхийн сацуу өөрөө кино бүтээдэг.

Беркай Атеш театрт ихэвчлэн хүнд дүр бүтээдэг шигээ нэлээд хэдэн дэлгэцийн бүтээлд үзэгчдийн сэтгэлийг сэртхийлгэм дүр бүтээсний нэг нь "Ээж" киноны Ченгиз.

Жүжигчин залуу дэлгэцийн том бүтээлд анх 2015 онд “Abluka” киноны Ахметийн дүрд тоглосноор илүү танигджээ. Уг дүрийн дараа найруулагч нарын анхаарал Беркай руу чиглэх болж, “Истанбулын гудамжууд” кинонд урьсан байна.

Беркай Атеш болон Туркийн алдартай жүжигчид болох Жансу Дере, Гонжа Вуслатери, Вахиде Перчин нарын хамтран тоглосон “Ээж” кино 2016 онд дэлгэцнээ гарсан ч одоог хүртэл Туркийн сериалуудын нэгдүгээрт бичигдсээр байна.

Түүнийг “Ээж” кинонд тоглож байхад нь болон киноны дараа Инстаграм хаяг руу нь олон удаа заналхийлэл ирж байжээ. Үүнээс Беркай киноны дүрийг амьдрал дээрх жинхэнэ хүн мэтээр бүтээж чадсаныг, олны үзэн ядалтыг төрүүлснийг харж болно.

Беркай Атешийн хувийн амьдрал нууцлаг. Түүнийг үзэгчид “Ээж” кинонд хамтран тоглосон эмэгтэй жүжигчдээс өөр эмэгтэй хүнтэй олж хараагүй байдаг аж.

О.Чанцалдулам