Улаанбаатар хотын хөгжлийн алсын харааг олон нийтийн оролцоотой тодорхойлно

2018 оны 11 сарын 03

Улаанбаатар хотын цаашдын хөгжлийн чиг хандлага, алсын харааг тодорхойлох зорилгоор Улаанбаатар хотын 2040 он хүртэлх хөгжлийн ерөнхий төлөвлөгөөний концепц боловсруулах уралдааныг зарласан.

Уралдаанд хот төлөвлөлтийн судалгааны баг бүрдүүлж оролцох бөгөөд уралдаанд оролцох эрх авснаар судалгааны материал болох “Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 он хүртэлх хөгжлийн чиг хандлагыг дүгнэх, хот байгуулалтын үнэлгээ” болон  “Улаанбаатар хотыг 2040 он хүртэл хөгжүүлэх хөгжлийн ерөнхий төлөвлөгөөний Улаанбаатар бүс, хот орчмын хот төлөвлөлтийн суурь судалгаа” боловсруулах ажлуудын тайланг цахим хэлбэрээр авна.

Тус уралдаанаар Улаанбаатар хотын алсын хараа, хөгжлийн зорилго, зорилтууд, хөгжлийн тэргүүлэх чиглэл, ирээдүйн төсөөллийг тодорхойлсон “ШИЛДЭГ САНАА”-г шалгаруулах бөгөөд шилдэг санааг боловсруулсан хот төлөвлөлтийн судалгааны багийн төлөөллөөс сонгон 2040 он хүртэлх хөгжлийн ерөнхий төлөвлөгөөний концепц боловсруулах ажлын зохиогчийн баг, зөвлөхийн багт оролцуулж, хөгжлийн ерөнхий төлөвлөгөөний концепцыг “Нийслэлийн Зураг төслийн хүрээлэн” ОНӨААТҮГ-тай хамтран нарийвчлан боловсруулна.                             

Уралдаанд оролцох материалыг 2018 оны 11 дүгээр сарын 09-ны өдрийн 10:00 - 15:00 цагийн хооронд хүлээн авах байсан боловч Засгийн газрын хуралдаанаар 2018 оны 11 дүгээр сарын 09-ны өдрийг бүх нийтийн амралтын өдөр болгохоор шийдвэрлэсэн тул уралдаанд оролцох материалыг 2018 оны 11 дүгээр сарын 12-ны өдрийн 10:00 - 15:00 цагийн хооронд хүлээн авна.                               

Уралдаанд оролцож байгаа багуудын ирүүлсэн бүтээлүүдээр олон нийтэд нээлттэй үзэсгэлэн гаргаж иргэд, олон нийтийн санал, үнэлгээг авна. Шилдэг санааг шалгаруулахад иргэд, олон нийтийн оролцоо чухал юм.

Үзэсгэлэнгийн үеэр хот төлөвлөлтийн чиглэлээр судалгаа шинжилгээ явуулдаг эрдэмтэн судлаачид уралдаанд оролцож байгаа багуудын бүтээлтэй танилцаж шүүмж өгөх бөгөөд шилдэг шүүмжийг шалгаруулна.

Дэлгэрэнгүй мэдээллийг: Нийслэлийн Хот төлөвлөлт, ерөнхий төлөвлөгөөний газар /Улаанбаатар хот 15160, Чингэлтэй дүүрэг, 1 дүгээр хороо, Ц.Жигжиджавын гудамж-7/1, Хангарди ордон, 13 давхар, 1302 тоот/ 11-321943 утсаар болон www.mpa.ub.gov.mn сайтаас; “Нийслэлийн Зураг төслийн хүрээлэн” ОНӨААТҮГ /Улаанбаатар хот-15160, Чингэлтэй дүүрэг, Ц.Жигжиджавын гудамж 7/1, Нийслэлийн Засаг захиргааны II байр, Хангарди ордон 10 давхар, 1002 тоот/ 11-320753 утсаар болон updi.ub.gov.mn сайтаас тус тус лавлана уу.

 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top