Азийн мисс Ц.Аззаяагийн тухай таны сонирхлыг татах мэдээллүүд

Ази болон Евразийн 25 орны гоо бүсгүйчүүд эх орноо төлөөлөн оролцсон "Miss Asia 2018" уралдаан Энэтхэг улсад бүтэн сар орчмын хугацаанд зохион байгуулагдаж, энэ сарын 10-нд шилдгүүдээ тодруулсан. Азийн гоо бүсгүйчүүдийн тэмцээнд Монгол Улсаа төлөөлөн оролцсон мисс, жүжигчин Ц.Аззаяа тэргүүн байр эзэлж, ялагчийн титмийн эзэн болсныг өмнө бид мэдээлсэн билээ.

Ц.Аззаяа Азийн гоо сайхны тэргүүн алтан титмийг авчирсан сэтгэгдлээ сошиал хуудаснаа хуваалцаж, “Надад итгэж байсан бүх хүмүүсийн итгэлийг алдахгүйн тулд бүх чадлаараа хичээсэн. Тэргүүн миссээр хэн тодрох бол гэж хөтлөгч асуухад зааланд байсан бүх хүн "Монголия" гэж орилоход нь нулимсаа барьж дийлээгүй. Зөвхөн тэр мөчийн төлөө өнөөдрийг хүртэл шантралгүй зүтгэжээ. Алдаа дутагдал их байгаа учраас цаашдаа илүү хичээх болно. Надад урам зориг өгч байсан бүх сайхан сэтгэлт хүмүүст баярлалаа“ гэсэн юм.

 “Азийн Мисс-2018” уралдааны тэргүүн титмийг эх орондоо авчирсан жүжигчин, мисс Ц.Аззаяагийн тухай таны сонирхлыг татах шинэ мэдээллийг хүргэе!

• Цогт-Очирын Аззаяа Соёл урлагийн их сургуулийн хөгжимт театрын жүжигчний ангийг 2016 онд төгссөн. Жүжигчин, дуучин, бүжигчин гэсэн хосолсон мэргэжилтэй.

• Тэрбээр 2013 онд 18 насандаа миссийн уралдаанд оролцож байжээ. Анхны уралдаандаа тусгай байр эзэлсэн төдийгүй "Авьяаслаг мисс"-ээр шалгарсан.

• 2015 онд "Мисс Монголиа" уралдааны тэргүүн шагнал хүртсэн.
  

• Ц.Аззаяагийн ээж нь дуучин Д.Ширмэнтуяа. Харин түүний эмээ нь Монгол Улсын Гавьяат жүжигчин Л.Чаминчулуун

• 2001 онд “Вансэмбэрүү” кинонд Батцэцэгийн бага насны дүрд тоглож байсан.
  

• Соёл урлагийн их сургуулийг төгссөнийхөө дараа “Рэкет” кинонд ээрүү охины дүр бүтээсэн байдаг.

• Тэрбээр мөн найруулагч Д.Галбаярын бүтээл “Киносутра ” кинонд гол дүр бүтээжээ.

• Азийн шинэхэн мисс бүсгүй биеийн жингээ барихдаа 18:00 цагаас хойш хоол идэхгүй байх дэглэм барьдаг. Түргэн хоол болон хийжүүлсэн ундаанаас татгалздаг.

Б.АМИРДАА

WWW.ZINDAA.MN