Сайжруулсан түлшнээс дээж авч, шинжлүүлжээ

Э.Тэргэл | Zindaa.mn
2018 оны 12 сарын 14

Ерөнхий сайд У.Хүрэлсүхийн хэлснээр Монголчуудын тэр дундаа нийслэлчүүдийн хамгийн том “дайсан” бол утаа. Сүүлийн 20-иод жил утааны талаар ярьж, бичиж, тэмцэж байгаа ч төгс шийдлийг олоогүй. Харин Монгол Улсын Засгийн газраас гаргасан 62 дугаар тогтоол хэрэгжсэнээр агаарын бохирдол 50 хүртэлх хувиар буурна гэж судлаачид үзэж байна. Тодруулбал, ирэх оны 5 дугаар сарын 15-аас Улаанбаатар хотод үйл ажиллагаа явуулж байгаа цахилгаан, дулааны эрчим хүч үйлдвэрлэх тусгай зөвшөөрөлтэй аж ахуйн нэгжээс бусад иргэн, аж ахуйн нэгж, байгууллагуудыг түүхий нүүрс хэрэглэхийг хориглох шийдвэр гарсан билээ. Энэ хүрээнд МХЕГ, НМХГ хамтран “Тавантолгой түлш” ХХК-ийн сайжруулсан шахмал түлшний үйлдвэрүүдийн үйл ажиллагаатай танилцан, өнгөрөгч 09, 10 дугаар сард гүйцэтгэсэн хяналт шалгалтын үеэр илэрсэн дутагдлыг арилгуулах, гарч болох эрсдэлээс урьдчилан сэргийлэх, борлуулсан түлшний уутыг шатаалгахгүй байх талаарх зөвлөмж өгч, цаашид байгаль орчин, хөдөлмөрийн эрүүл ахуй, аюулгүй байдлын чиглэлээр хамтран ажиллах төлөвлөгөө боловсруулан ажиллахаар тохиролцов.

Мөн тус компанийн үйлдвэрлэж буй сайжруулсан түлшнээс дээж авч Геологийн төв лабораториор шинжлүүлэхэд “Сайжруулсан түлш” MNS 5679:2014 стандартын чанарын шаардлагыг хангасан дүн гарчээ.

Одоогоор уг үйлдвэр нь бүтээгдэхүүнээ Сонгинохайрхан дүүргийн сайжруулсан шахмал түлш борлуулах цэгт 25 килограмыг нь 3750 төгрөгөөр борлуулж байгаа аж. Хэрэглэгчид “Сайжруулсан түлш нь эдийн засгийн хувьд нүүрснээс 3 дахин хэмнэлттэй буюу нэг уут шахмал түлш 3 уут нүүрстэй тэнцдэг, илчлэг чанар нь өндөр, утаа ялгаруулалт эрс багассан” хэмээн ярьж байна. Сайжруулсан шахмал түлш үйлдвэрлэх хоёр үйлдвэр нь 2019 онд бүрэн хүчин чадлаараа ажиллаж жилдээ 700 мян тн утаагүй, илчлэг өндөр түлш үйлдвэрлэхээр төлөвлөж байгаа аж. Улаанбаатар хотод 220 мянган айл жилд нэг сая 200 мянган тн түүхий нүүрс түлдэг бол сайжруулсан шахмал түлш 600 мянган тонныг түлснээр агаарын бохирдлыг 50 хүртэлх хувиар бууруулах боломжтой гэж судлаачид тооцож байна.

Эх сурвалж: Мэргэжлийн хяналтын ерөнхий газар

Сэтгэгдэл ( 2 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
555(122.201.20.178) 2018 оны 12 сарын 14

ШАХМАЛ ТҮЛШ БОЛ УБ-Н УТААГ БУУРУУЛАХ МАШ ТОМ БОЛОМЖ,,,ХЭРВЭЭ ЭНЭ БОЛОМЖЫГ БҮРЭН АШИГЛАЖ ЧАДВАЛ УТААГ 70-80 БУУРУУЛНА. МАНАЙ ЭРДЭМТЭД ШУА-Н ЕРӨНХИЙЛӨГЧ БИД УТААГ БУУРУУЛАХ МЭРГЭН АРГА ОЛСОН ЭНЭ БОЛ ГЭРЭЭ ДУЛААЛАХ ЯВДАЛ ДААНЧ ЗГ ТООХГҮЙ ЮМ ГЭЭД УЙЛАГНААД ЗОГСОЖ БАЙХ ЮМ ҮҮНИЙГ ЭД НАРТАЙ ҮГҮЙ ЗАХЫН ЧАВГАНЦ МЭДЭЖ БГАА..ИЙМ ЭРДЭМТЭДИЙГ ТЭЖЭЭЖ БАЙДАГ ХАЙРАН ТАТВАР ТӨЛӨГЧДЫН МӨНГӨ....

0  |  0
Хотын иргэн(66.181.179.169) 2018 оны 12 сарын 13

Утаа утаа л гэнэ. Нуурс тулэхээ л боль л доо. Утаагаар далимдуулж тэрбум тэрбумаар нь менге идэх боломжийг л олгохгуй байя л даа. Заавал хотод бугэж нуурс тулэх ямар шаардлагатай юм бэ? Газар нутаггуй биш дээ. Нутагтаа очоочээ. Цаана чинь хятадууд малын эзэн суугаад байна ш дээ

0  |  0
Top