Талийгаач Т.Гомбосүрэнгийн аав өвчний улмаас таалал төгслөө

Өнгөрөгч 2018 оны наймдугаар сарын 9-ны өдөр Зам тээврийн хөгжлийн яамны байранд гарсан хүн амины хэргийн хохирогч, талийгаач Т.Гомбосүрэнгийн аав Р.Төмөрхуяг өвчний улмаас таалал төгссөн харамсалтай мэдээлэл ирлээ. Талийгаач хүүгээ нас барахаас сар гаруйн өмнө хүнд хагалгаанд ороод байсан бөгөөд өнгөрсөн хугацаанд сэтгэл санааны гүн хямралд орсны улмаас түүний хууч өвчин сэдэрч өвчнөө даалгүй нас барсан байна.

Тэрээр 2018 оны арванхоёрдугаар сарын 11-ний өдөр хэвлэлийн хурал хийх үеэрээ “Манай гэр бүлийн хувьд хүүгийнхээ ясыг өндөлзүүлээд дахин хэвлэлийн хурал хийхээс өөр аргагүй байдалд хүрлээ. Хууль хяналтын байгууллагаас  үнэн зөв шийдэх байх гэж хүлээсэн. Эхэндээ шүүх хэргийг шалгаж , тодорхой нэмэлт байцаалт явуулж байсан ч хэрэг удаашрах тусам үнэн зөвөөр шийдэгдэнэ гэдэгт итгэл алдарч эхэллээ.

Бидний зүгээс хууль хяналтын байгууллага бүрэн ажиллахгүй, зарим нотлох баримтуудыг авч хэлэлцэхгүй байна. Хэргийн мөрдөн байцаалтыг дутуу явууллаа. Маш богино хугацаанд шалгаад, бидэнд мэдэгдэхгүй шүүхэд шилжүүлэхээр болсон байна. Хэрэг үйлдэхэд хамт байсан хоёр хүний хэргийг хэрэгсэхгүй болгож, Б.Махбалын хэргийг анхны зүйл ангиар хөнгөн шийтгэх гэж байна. Бид нар хүүгээ албан тушаалын улмаас санаатай алсан гэсэн байр суурьтай хэвээрээ байгаа. Тэр мэдээллийг дэд сайд байсан Б.Цогтгэрэл ил болгосон.

Миний хүүгийн албан тушаалыг авах гэж санаатай алсан шүү дээ. Мөн цаанаас нь улс төрийн гар орж ирээд шийдэх гээд байгаа гэж хардах нөхцөл байдал үүссэн. Тийм учраас бид та нарт хандаж байгаа юм. Энэ хэргийг үнэн зөвөөр шийдэж өгөхийг хүсэж Хуульзүй дотоод хэргийн сайд Ц.Нямдоржид хандаж 14 хоногийн хугацаатай өргөдөл өгөхөөр болоод байна” хэмээж байсан юм.

Б.ЦОГ

WWW.ZINDAA.MN