Ардчилсан нам УИХ-ын ээлжит бус сонгууль явуулъя гэв

Ардчилсан намын Удирдлагын зөвлөл өнгөрсөн бямба гаригт /2019.01.05/ хуралдаж, УИХ, Засгийн газар, НИТХ-д үүсээд байгаа нөхцөл байдалтай холбоотойгоор "Улс төрийн шийдвэр" гаргажээ.

АН-ын улс төрийн шийдвэрийн талаар тус намын дарга С.Эрдэнэ тэргүүтэй удирдлагууд мэдээлэл өгөхдөө,

-"2016 оны ээлжит сонгуулиар УИХ-д 65 суудал авч, дийлэнх олонхийг бүрдүүлсэн МАН өнгөрсөн гурван жилийн хугацаанд амлалт болон мөрийн хөтөлбөрөө ор тас умартаж, төр удирдах чадваргүй болохоо харууллаа. Төрийн бүхий л шатны албан тушаалыг 60 тэрбумын гэх сүлжээгээр арилжаалж, ЖДҮ-ийг хөгжүүлэх сан гэх мэт иргэдэд шууд очих ёстой боломжийг хулгайлан, зохион байгуулалттай гэмт хэрэг үйлдсэн МАН-ын бизнес, улс төрийн бүлэглэлийн зөрчилдөөн нь монгол төрийг мухардалд оруулаад байна. Үүнээс үүдэж төрийн бүхий л шатанд эрх баригчдын талцал хуваагдал нүүрлэж, УИХ нь гишүүн дутуу, Засгийн газар нь бүрэлдэхүүн дутуу, нийслэл нь удирдлагагүй, 21 аймгийн ИТХ нь хуваагдмал байдалд орлоо. Иймд АН-аас үүссэн нөхцөл байдалд дүгнэлт хийн, мухардлаас гарах гарцыг УИХ-ын ээлжит бус сонгууль яаралтай зарлан явуулж, нийт ард түмнээр эрх баригчдын үйл ажиллагааг зайлшгүй дүгнүүлэх шаардлагатай гэж үзэж байна” гэсэн юм.