ВИДЕО: Гишүүдийг ҮАБЗ-ийн ЗӨВЛӨМЖ-ийг биелүүлэхийг уриалав

Автор | Zindaa.mn
2019 оны 01 сарын 11

УИХ-ын дарга М.Энхболдыг огцрохыг шаардсан “МАНАН дэглэмийн эсрэг Монгол түмний нэгдэл” жагсаалыг зохион байгуулагчид болох УИХ-ын гишүүн Л.Болд, Ж.Батзандан, Т.Аюурсайхан, Л.Оюун-Эрдэнэ нар дөнгөж сая Төрийн ордонд мэдээлэл хийлээ. Тэд Ерөнхийлөгч Х.Баттулгын 2019.01.04-нд өргөн мэдүүлсэн УИХ-ын чуулганы хуралдааны Дэгийн тухай, УИХ-ын тухай хуульд нэмэлт, өөрчлөлт оруулах тухай хуулийн төслийн бүх хэлэлцүүлгийг өнөөдөртөө багтааж хийх тухай Үндэсний аюулгүй байдлын зөвлөлийн зөвлөмжийг танилцуулаад, УИХ-ын гишүүдийг уг зөвлөмжийг биелүүлж, чуулганы хуралдаанд оролцохыг уриаллаа.



Энэ талаар УИХ-ын гишүүн Т.Аюурсайхан “Үндэсний аюулгүй байдлын зөвлөмжийг Ерөнхийлөгч, Ерөнхий сайд, УИХ-ын дарга гээд гурван гишүүн бүгд хүлээн зөвшөөрсөн цагт баталдаг. Тэгэхээр УИХ-ын дарга М.Энхболд УИХ-ын даргыг гишүүдийн олонхийн саналаар чөлөөлөх асуудлыг хэлэлцэж, шийдвэрлэх хуулийг өнөөдөртөө багтаж батлах нөхцөлийг зөвшөөрч, гарын үсэг зурсан гэсэн үг” гэж тайлбарлалаа.


 

Мөн УИХ-ын гишүүн Л.Болд “Монголын ард түмэн төв талбай дээр 50 мянгуулаа цуглалаа. Маш ноцтой нөхцөл байдал үүслээ. 1990 онтой дүйцэхүйц үйл явдал өрнөж байна. Үндэсний аюулгүй байдлын зөвлөмжийг сонсоод ард түмэн сэтгэл хангалуун тарцгаасан. Өнөөдөр Үндэсний аюулгүй байдлын зөвлөлийн гаргасан шийдвэр болон ард түмний хүслийг хүндэтгэж, чуулган хуралдах ёстой. УИХ-ын 40 гишүүн чуулгандаа орохоор ирээд байна. Харамсалтай нь, МАНАН-гийн талын гишүүд Хууль зүйн болон Төрийн байгуулалтын байнгын хорооны ирцийг хүргэхгүй, гацааж байна. Байнгын хорооноос болоод чуулган гацаж байна. Өнөөдөр бид Сүхбаатарын талбай дээр гэр барьж эхэлсэн. Маргаашнаас суулт үргэлжилнэ. Энэ замаар явах юм бол Монголын хувь заяа хүндэрнэ. Тэгэхээр УИХ-ын гишүүдийг чуулгандаа суухыг уриалж байна. Одоо 40 гишүүн байна. УИХ-ын дарга чуулганыг удирдах юм бол бид хуралдахад бэлэн байна” гэсэн юм.


 

УИХ-ын гишүүн Х.Нямбаатар “Ерөнхийлөгч Х.Баттулгын 2019.01.04-нд өргөн мэдүүлсэн УИХ-ын чуулганы хуралдааны Дэгийн тухай, УИХ-ын тухай хуульд нэмэлт, өөрчлөлт оруулах тухай хуулийн төслийг өнөөдөртөө багтаагаад байнгын хороогоор хэлэлцүүлж, чуулганы анхны хэлэлцүүлгээр батлахаар Үндэсний аюулгүй байдлын зөвлөл дээр ярьсан юм байна. УИХ-ын даргыг огцруулах хууль батлагдсан өдрөөсөө үйлчилж эхэлнэ. Ингэснээр УИХ-ын даргыг огцруулахыг шаардаж байгаа УИХ-ын 40 гишүүн албан бичгийнхээ толгойг өөрчилж, хуулийн дагуу дахин шаардлагаа тавих боломж бүрдэх юм” хэмээлээ.



Жич: Яг одоо чуулганы хуралдах ирц бүрдсэн байгаа ч чуулганы өмнө хуралдах ёстой Хууль зүйн болон Төрийн байгуулалтын байнгын хорооны ирц хараахан бүрдээгүй байгаа тул хуралдаанууд гацаанд ороод байна.



Сэтгэгдэл ( 5 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
zochin(66.181.188.83) 2019 оны 01 сарын 10

HUN HUN ADILGUI UCHRAAS NEG HUNII ZASAG HEREGGUI

0  |  0
соо(139.5.218.11) 2019 оны 01 сарын 10

Сайхан мэдээ байна, баярлалаа,

0  |  0
Irgen (103.212.119.175) 2019 оны 01 сарын 10

Haha hootoi ch yumaa da nogoo huraldaa suuhgui gishuud ni odoo huralda suuya geed nogoo heden gishuudee huraldaa suugaach geed guigaad elgiin yumaa

0  |  0
ард түмэн(139.5.217.122) 2019 оны 01 сарын 10

тэр ирцээ бүрдүүлэхгүй бга малнууд хурдан ирээд энэ хурал шүү юмаа хуралдуулаад энхболдыгоо огцруулаач ард түмэн шаардаж бна харж бна хүлээж бна

2  |  0
Top