26 тэрбумтны хөрөнгө дэлхийн хүн амын тал хувьд ногдох баялагтай тэнцэв

Дэлхийн хамгийн баян 26 хүний хөрөнгө хүн төрөлхтний тал хувийг бүрдүүлж буй ядуучуудад ногдох хөрөнгөтэй тэнцэж байна гэж Олон улсын буяны “Oxfam” нэгдсэн холбоо өнөөдөр /2019.01.21/ мэдээлэв. Иймээс улам бүр нэмэгдэж буй тэгш бус байдалтай тэмцэх үүднээс засгийн газрууд чинээлэг хүмүүсийн татварын нэмэгдүүлэхийг шаарджээ.

2019 оны нэгдүгээр сарын 22-25-нд Давос хотноо болох Дэлхийн эдийн засгийн форумын уулзалт эхлэхээс өмнө хэвлэгдэн гарсан тайлангаас үзвэл 2018 онд дэлхийн тэрбумтнуудын хөрөнгө өдөрт нийт 2.5 тэрбум ам.доллараар өссөн байна. 

Дэлхийн хамгийн чинээлэг эр, Amazon компанийн Гүйцэтгэх захирал Жефф Безосын хөрөнгө өнгөрсөн жилд 112 тэрбум ам.доллараар нэмэгджээ. Түүний хөрөнгийн дөнгөж нэг хувь нь 105 сая хүн амтай Этиоп улсын эрүүл мэндийн салбарын төсөвтэй тэнцэж байна. Амьжиргааны доод төвшинд амьдарч буй 3.8 тэрбум хүний баялаг 11 хувиар буурчээ. Баян, хоосны ялгаа нэмэгдэж буй нь ядуурлын эсрэг гаргаж буй хүчин чармайлтын үр дүнг бууруулж, эдийн засгийн өсөлтийн сааруулж, олон нийтийн бухимдлыг төрүүлж байна гэж “Oxfam” анхааруулав.

1980-аас 2016 оны хооронд дэлхийн орлогын нэг доллар тутмын 12 цент нь дэлхийн хүн амын тал хувийг бүрдүүлдэг ядуучуудад ногдож байсан бол дэлхийн хүн амын нэг хувийг эзэлдэг баячуудын халаасанд 27 цент нь оржээ.

Дэлхийн хамгийн чинээлэг, алдартай, нөлөө бүхий эрхмүүд Швейцарын алдарт цанын баазад хүрэлцэн ирэхтэй давхцан хэвлүүлсэн энэхүү тайланд чинээлэг хүмүүс, том корпорацуудад ногдуулах татварын хэмжээг нэмэгдүүлж, “ёроол руу унах уралдааныг” зогсоохыг засгийн газруудаас шаарджээ.

“Oxfam” байгууллага баян чинээлэг эрхмүүдийн татварыг 0.5 хувиар нэмэхэд сургуулиас завсардсан 262 сая хүүхдэд боловсрол олгож, эрүүл мэндийн үйлчилгээ авч чадахгүй байгаа 3.3 сая хүний амь насыг аврах хэмжээний мөнгө босгох боломжтой гэнэ.