Дэлхийн аварга Д.Лхагва Н.Төгсцогтод АМЖИЛТ ХҮСЭВ

Н.Төгсцогт мэргэжлийн боксын рингэнд хөл тавьснаасаа хойш дөрвөн жилийн дараа IBO буюу Олон улсын боксын холбооны алтан бүсийн төлөө тулалдах гэж байна. Монголчуудын төдийгүй мэргэжлийн боксын хүрээнд дэлхий нийтийн анхаарлыг татаж байгаа энэ тулаан маргааш /2019.01.27/ болно. Монголын цагаар 08.30 цагаас эхэлнэ.

АНУ-ын Нью-Йорк хотын Бруклин дүүрэгт орших “Barclays Center”-т болох тулааныг үзэхээр 200 гаруй монголчууд тасалбар худалдан авчээ. АНУ-д ажиллаж, амьдарч буй монголчууд Н.Төгсцогтыг дэмжихээр олноороо цуглаж байгаа бол Монголоос ч мөн олон дэмжигчид Нью-Йорк хотыг зорин очиж байна. Тухайлбал, олимпийн аварга Э.Бадар-Ууган, улсын аварга Ч.Санжаадамба, “TV Cocktail”  хамтлагийн жүжигчин Э.Цолмонбаяр нар өчигдөр /2019.01.25/ нисэв.

Тэд Нью-Йорк явах замдаа нэгэн ховор эрхэмтэй уулзжээ. Энэ хүн Монгол Улсаас тодорсон анхны мэргэжлийн боксын тамирчин, WBA буюу Дэлхийн боксын холбооны Дэлхийн аварга (WBA, супер хөнгөн жин - 1999 он, WBA, хөнгөн жин - 2004 он) Дугарбаатарын Лхагва байв. Пан Азийн аварга Д.Лхагва олимпийн аварга Э.Бадар-Уугантай БНСУ-д уулзаж, Олон улсын боксын холбооны алтан бүсийн төлөө тулалдах гэж байгаа Н.Төгсцогтод зөвлөгөө дамжуулж, амжилт хүсчээ.

Монгол Улсын Гавьяат тамирчин Д.Лхагва мэргэжлийн боксын рингэнд 26 тоглолт хийхдээ 21-д нь ялж, 18 тулаанд өрсөлдөгчөө нокаут буюу хүнд цохилтоор буулган авч байв. Тэрбээр карьертаа дөрвөн ялагдал, нэг тэнцээтэй тулалдсан байдаг.

Пан Азийн аварга Д.Лхагва 14 настайгаасаа буюу 1985 оноос боксын спортоор анх хичээллэж, сонирхогчдын боксын ОУХМ болжээ. Дэлхийн аварга шалгаруулах тэмцээнд хоёр удаа, Дэлхийн цомын тэмцээнд нэг удаа шилдэг наймд шалгарч, “Байгал-89”, Краснокаменский болон Сафрановын нэрэмжит болон Хятад, Алма-Ата, Сөүлийн цом, Тайландын эзэн хааны нэрэмжит тэмцээнээс алтан медаль хүртэж байсан.

1995 онд Өмнөд Солонгост болсон "Сөүлийн цом"-ын тэмцээнд түрүүлэх үеэрээ Дэлхийн боксын холбооны дэд ерөнхийлөгч, Пан Азийн боксын холбооны ерөнхийлөгч Ян Сун Шимтэй 10 жилийн хугацаатай гэрээ байгуулж, мэргэжлийн бокст шилжсэн. Ингээд 1996 оны хоёрдугаар сард Индонезын Жакарта хотноо Макс Крайвойтой тулалдаж, дөрөв дэх үед хүнд цохилтоор цэвэр ялснаар 61,2 кг-ын жинд Пан Азийн аварга болж байсан түүхтэй.