Нислэгийг нь хориглосон “Тулуй Хаан” онгоцны үзүүлэлт!

Этиопт болсон “Boeing 737 MAX  8” онгоцны ослоор 157 хүн амиа алдсан хэрэг олон улсын авиа компаниудын анхаарлыг татсан асуудал болоод байна.  Өмнө нь Индонезид мөн уг онгоц осолдож, олон хүн амиа алдсан. Дараалан ноцтой ослууд гарсны улмаас Хятадын Иргэний агаарын тээврийн удирдах алба  авиа  компаниуддаа “Boeing 737 MAX 8” онгоцыг ашиглахыг түр хугацаанд хориглосон шийдвэр хүргүүдээд байгааг мэдээлсэн. Тэгвэл манай улсын МИАТ компани ч “Boeing 737 MAX 8” загварын сүүлд ирсэн онгоцны нислэгийг түр зогсоох шийдвэр гаргажээ. Индонези болон Этиопт болсон ослуудын шалтгаан нарийвчлан тодорхой болоогүй, манай талаас Boeing компаниас тайлбар хүсээд байгаа аж.

Дэлхийн улс орнуудын анхаарлыг татаад буй “Boeing 737 MAX 8” онгоцны үзүүлэлтүүдийг хүргэе.

МИАТ ТӨХК агаарын хөлгийн парк шинэчлэлийн хүрээнд энэ оны хоёрдугаар сарын 1-нд  АНУ-ын Boeing компанид үйлдвэрлэсэн сүүлийн үеийн технологи бүхий В737МАХ8 агаарын хөлгийг хүлээн авсан. В 737 МАХ-8 агаарын хөлөгтэй болсноор  нийт 7 ширхэг агаарын хөлөгтэй болсон юм.

ЕI-MNG бүртгэлийн дугаартай“Тулуй Хаан” В 737 МАХ8 агаарын хөлгийг багш нисгэгч Ч.Нямсайхан, Ч.Хуяг, II нисгэгч З.Ганзориг, Г.Баатарцогт нарын бүрэлдэхүүнтэй баг АНУ-аас Монголд авчирсан.

ЕI-MNG бүртгэлийн дугаартай “Тулуй Хаан” В 737 МАХ 8 агаарын хөлгийн үзүүлэлт:
 

• Түлшний зарцуулалт 14 хувиар багассан.
• Дуу чимээ 40 хувиар багассан.
• 737MAX-8 бизнес 12, энгийн 150 суудалтай боловч 189 энгийн суудалтай болгох хувилбартай. Суудал бүр USB цэнэглэгчтэй.

Байгаль орчинд ээлтэй технологи:
 

•  Агаарт ялгаруулах нүүрс хүчлийн хий харьцангуй бага тул байгальд ээлтэй тээврийн хэрэгсэлд тооцогддог.

Зорчигчийн тав тухын хувьд:
 

• Onboard wi-fi-тай /зорчигч өөрийн гар утас, таблетаараа Wi-fi сүлжээ ашиглан агаарын хөлгийн үзвэрийн системтэй холбогдож Hollywood-ийн кино, үзвэрээс сонгон үзэх боломжтой/
• Зорчигчийн бүхээгийн гэрэлтүүлэг тав тух хуучин загвараас илүү сайжирсан.

Техникийн үзүүлэлтийн хувьд:
 

Их биеийн онцлох өөрчлөлт шинэчлэлтүүд:
 

•  Хөдөлгүүрийг шинэчлэн CFM LEAP-1B хөдөлгүүртэй болсон, хөдөлгүүрийн хэмжээ томорсноор хүчин чадал сайжирсан.
•  Сүүл болон далалвчны дизайн шинэчлэн сайжирснаар аеродинамикийн үзүүлэлт нэмэгдсэн.
•  Нисэгчийн бүхээг доторх хянах самбар дэлгэцүүдэд дэвшилтэт технологийн дэлгэцээр солигдсон.
•  Дээрх өөрчлөлтүүдийн тусламжтайгаар нислэгийн алслалт тодорхой хэмжээгээр нэмэгдсэн.

Дэлхийн агаарын тээвэрлэгч бүр эдийн засгийн өндөр үр өгөөжтэй, найдвартай ажиллагаатай, тохь тухтай агаарын хөлгийг эрэлхийлж буй өнөө үед В737МАХ-8 агаарын хөлөг нь агаарын тээврийн зах зээлд хамгийн их борлуулалттай байгаа дундын зайн агаарын хөлөг юм.