"БНСУ-д ажиллах иргэд эхлээд цахимаар бүртгүүлнэ"

БНСУ-д хөдөлмөр эрхлэх хүсэлтэй иргэдийн солонгос хэлний түвшин тогтоох шалгалтын бүртгэл өчигдөр /2019.03.11/ эхэллээ. Бүртгэлийг Хөдөлмөр, нийгмийн хамгааллын яамны харьяа Хөдөлмөр, халамжийн үйлчилгээний ерөнхий газар зохион байгуулж байна. Хэлний шалгалтын бүртгэлийг зөвхөн нийслэлийн есөн дүүрэгт хоёр үе шаттай явуулах аж. Цахим бүртгэл өчигдөр, өнөөдөр /2019.03.11-12/ хоёр өдөр 09:00 – 18:00 цагийн хооронд үргэлжилж, цахимаар бүртгүүлсэн иргэд энэ сарын 13, 14, 15-ны өдрүүдэд харьяа дүүрэгтээ очиж, бүртгэлээ баталгаажуулах ёстой аж. Харин орон нутгийн иргэдийн хувьд тухайн аймагтаа энэ сарын 13, 14, 15-ны өдрүүдэд бүртгүүлэх юм байна. БНСУ-д хөдөлмөр эрхлэх хүсэлтэй иргэдийн солонгос хэлний түвшин тогтоох шалгалтын бүртгэл эхэлсэн холбоотойгоор Чингэлтэй дүүргийн Хөдөлмөр, халамжийн үйлчилгээний хэлтсийн Хөдөлмөр эрхлэлтийн албаны дарга Ш.Саранчимэгтэй ярилцлаа. 

-Солонгос хэлний түвшин тогтоох шалгалтын бүртгэл нийслэлд хоёр үе шаттай явагдана гэдгийг тодруулахгүй юу?

-Хөдөлмөр нийгмийн хамгааллын яам, БНСУ-ын Хөдөлмөрийн яамны хооронд байгуулсан хөдөлмөр эрхлэх гэрээний дагуу ажилтан илгээх үйл ажиллагааг 15 дахь жилдээ зохион байгуулж байна. Энэ жилийн онцлог нь хөдөлмөр эрхлэх хүсэлтэй Улаанбаатар хотын иргэд нь солонгос хэлний түвшин тогтоох шалгалтын бүртгэлд хамрагдах эрхээ цахимаар авна. Цахим бүртгэлд өчигдөр, өнөөдөртөө багтаан бүртгүүлсэн иргэд энэ сарын 13, 14, 15-ны өдрүүдэд харьяа дүүрэгтээ очиж анкетаа бөглөж, албан ёсоор бүртгэлээ хийлгэнэ.

Иргэд хэлний шалгалтад бүртгүүлэх гэж хонож өнждөг, асуудал үүсдэг. Олон нийтийн дунд шүүмжлэл өрнөдөг. Тиймээс энэ асуудлыг таслан зогсоох үүднээс өмнө нь цахимаар бүртгэлийг хийж, бүртгэлд орох эрхээ авна гэсэн үг. Цахимаар бүртгүүлсэн иргэдийг дараа нь дүүрэг бүр дээр нь анкетыг нь бөглүүлж бүртгэлийг баталгаажуулна. Харин 21 аймагт өмнөх жилүүдэд явуулж байсан шиг уламжлалт аргаар  бүртгэл 13, 14, 15-ны өдрүүдэд явагдана.

-Нийслэлийн есөн дүүрэгт цахимаар бүртгээд, дахиж дүүрэг дээрээ ирж анкет бөглөнө. Шууд дүүрэг дээр ирээд бүртгүүлэхээс давуу тал юу байна вэ?

-Цахимаар бүртгэл хийгдсэний дараа, Хөдөлмөр халамж үйлчилгээний газрын мэдээлэл технологийн мэргэжилтнүүд иргэдийг дүүрэг бүрээр нь ялгачихна. Тухайлбал, манай Чингэлтэй дүүргийн 5000 иргэнийг тусад нь ялгачихна гэсэн үг. Тэгээд 5000 иргэнийг гурав хувааж нэрсийг нь гаргаад, энэ сарын 13, 14, 15-ны өдрүүдэд бүртгэлийг баталгаажуулж, анкетыг хүлээж авна. Эхний өдөр бүртгэлд хамрагдахаар нэр нь хуваарилагдсан бол тэр өдрөө ирж бүртгүүлнэ. Тиймээс өмнөх шиг ямар нэгэн дараалал үүсэх, дараалал дайрах зүйл гарахгүй байх.

Цахимаар бүртгүүлсэн иргэдийг дараа нь дүүрэг бүр дээр нь анкетыг нь бөглүүлж бүртгэлийг баталгаажуулна. Харин 21 аймагт өмнөх жилүүдэд явуулж байсан шиг уламжлалт аргаар  бүртгэл 13, 14, 15-ны өдрүүдэд явагдана.

-Цахимаар бүртгүүлж байгаа иргэдийн дунд санал, гомдол хэр байна?

-Хөдөө орон нутгийн иргэд хотод шалгалт өгөхөөр цахимаар бүртгүүлэхээр хандаж байна. Цахим бүртгэлийн системд олон хүн хандахаар хурд нь саарсантай холбоотойгоор “Программ удаж байна”, “Мэдээллээ оруулсан байтал болохгүй байна” гэсэн гомдол санал манай хэлтэс дээр цөөнгүй ирж байна. Гэхдээ цахим бүртгэлийн систем хэвийн ажиллаж байгаа.

-Солонгос хэлний шалгалтыг хэзээ авах вэ?

-Шалгалтыг дөрөвдүгээр сарын 5-наас зургадугаар сарын 6-ны хооронд явуулна. Солонгос хэлний шалгалтын бүх дүн зургадугаар сарын 13 гэхэд гарч дуусна. Шалгалтын хуваарийг гуравдугаар сарын 26-нд зарлах юм.

Солонгос хэлний шалгалтад очиж бүртгүүлэх иргэд нь иргэний үнэмлэхний хуулбар /эсвэл гадаад паспорт/, гадаад паспортын зураг 2 хувь, мэргэжил чадварын үнэлгээг гэрчлэх баримт материал, бүртгэлийн хураамж 24 ам.долларыг авч очих ёстой ажээ.

2019 ОНЫ 15 ДАХЬ УДААГИЙН СОЛОНГОС ХЭЛНИЙ ТҮВШИН ТОГТООХ ШАЛГАЛТЫН

БҮРТГЭЛ ХИЙХ ГАЗРУУД (3 ДУГААР САРЫН 13, 14, 15-НЫ ӨДРҮҮДЭД АЖЛЫН ЦАГААР)

ДҮҮРЭГ