“Капитал”-д  хадгаламж эзэмшигч иргэд УИХ-ын гишүүдэд хандав

Капитал банкинд хадгаламж эзэмшигч иргэдийн төлөөлөл өнөөдөр /2019.04.22/ мэдээлэл хийв.

Итгэж хадгалуулсан мөнгөө яаралтай авах шаардлагатай байна гэж тэдгээр иргэд хэлж байна. Мөн Т.Аюурсайхан Х.Нямбаатар нарын нэр бүхий таван гишүүнд хандан өөрсдийнхөө эрх ашгийг хамгаалж өгөөч гэсэн хүсэлт тавьж буйгаа илэрхийлэв. Хадгаламж эзэмшигч иргэдийн хувьд Төв банк Капитал банкны үйл ажиллагаанд зөв зүйтэй хяналт тавьж чадсангүй гэх байр суурийг илэрхийлж байна.

Харин Төв банкны хувьд “Капитал банк” ХХК-д  авч хэрэгжүүлсэн арга хэмжээний талаар дараах мэдээллийг өгч буй. Капитал банк нь банкны үйл ажиллагааны зохистой харьцааны зарим шалгуур үзүүлэлтүүдийг хангаж чадахгүй болж эхэлсэн буюу 2015 оны аравдугаар сараас 2019 оны дөрөвдүгээр сар хүртэлх хугацаанд Монголбанкнаас зөрчил дутагдлыг арилгах, банкны засаглалыг сайжруулах талаар холбогдох хууль, журмын дагуу шат дараатай, урьдчилан сэргийлэх арга хэмжээнүүдийг тухай бүр авч байсан гэж мэдэгдэж байна. Үүнд:

• Төлбөр түргэн гүйцэтгэх чадвар, өөрийн хөрөнгийг нэмэгдүүлэх хугацаатай үүрэг даалгаврыг өгөх;
• Tоргууль ногдуулах;
• Эрсдэлийн сан нэмж байгуулах;
• Зөрчил шалган шийдвэрлэх хуулийн дагуу зөрчлийн хэрэг үүсгэх;
• Банкны эрхлэх үйл ажиллагааны зарим зөвшөөрлийг зогсоож, зөрчлийг арилгах хугацаатай үүрэг даалгаврыг өгөх;
• Банкны удирдлага, зохион байгуулалт, үйл ажиллагааны эрсдэлийн удирдлага, дотоод хяналтыг сайжруулж, бэхжүүлэх арга хэмжээ авахыг даалгах;
• ТУЗ болон Гүйцэтгэх захирлын цалин, урамшууллыг зогсоох;
• Зээл төлүүлэх, татан төвлөрүүлсэн хөрөнгийн хэмжээг нэмэгдүүлэхгүй байлгах;
• Зарим хөрөнгийг худалдах, банкны нэгжийг татан буулгахыг шаардах;
• Монголбанкны хянагч, тусгай төлөөлөгч томилох;
• Шаардлагатай гэж үзсэн бусад арга хэмжээг авсан гэж мэдэгдэж байгаа юм.