Макао коронавирустэй холбоотойгоор бүх казиногоо хаажээ

Макаогийн засаг захиргааны тэргүүн Хэ Ичэн хотын бүх казиног хоёр долоо хоногийн хугацаатайгаар хаахыг үүрэгджээ. Энэ нь коронавирусийн халдвараас урьдчилан сэргийлж байгаа арга зам аж. Мөн Макаод нийтийн тээврийн хэрэгслийг хязгаарласан байна.

Түүнчлэн хотын захиргаа өвчний тархалт ихтэй байгаа энэ үед иргэддээ гэртээ байж, хоол хүнсээ авахаас өөрөөр гадагш гарахгүй байхыг анхааруулжээ.

Макаод шинэ төрлийн коронавирусийн халдварын 10 тохиолдол илэрсэн юм. Шинэ төрлийн коронавирус нь тав хүртэлх хоногоор амьдрах чадвартай талаар Хятадын эрүүл мэндийн хорооны шинжээчид анхааруулсан билээ. Энэхүү вирус нь ханиалгах, найтаах үед агаар дуслын замаар болон өвчтөнд хүрэх, халдвар тээгчээс 1-2 метрийн зайнаас хүний биед халддаг юм.