Жан-Клод Ван Дамм чихуахуа гөлөгний амийг аврав

Бельгийн жүжигчин Жан-Клод Ван Дамм чихуахуа үүлдрийн гурван сартай гөлөгийг унтуулахаас аварчээ. Бяцхан нохойн бичиг баримтад асуудал үүссэн тул энэ сарын 20-нд унтуулах ёстой байжээ.

“The Guardian” хэвлэлд мэдээлснээр, Рая гөлөгийг Болгараас Норвег улс руу шинэ эздэд нь өнгөрсөн есдүгээр сард явуулжээ. Гэтэл түүний паспорт хуурамч байсан тул холбогдох алба бүртгэж аваагүй байна. Норвег дахь шинэ эздэд нь чихуахуаг буцаахыг оролдсон ч Болгар улс Европын Холбооны амьтан тээвэрлэх дүрмийн дагуу хүлээн авахаас татгалзжээ. Тиймээс Раяг унтуулахаар болсон байна.

Энэ тухай олж мэдсэн кино од кампанит ажил өрнүүлэн, өөрийн чихуахуа нохойтой хамт нийгмийн сүлжээнд нөхцөл байдлыг тайлбарласан дүрc бичлэг цацжээ. “Миний төрсөн өдрийг тохиолдуулан энэ шийдвэрээ өөрчлөхийг хүсэж байна. Хэдийгээр бичиг баримтыг буруу бүрдүүлсэн ч бяцхан гөлөгийг унтуулахад хүргэх ёсгүй” гэж Ван Дамм ярьжээ. Эцсийн дүнд Болгарын эрх баригчид нохойг буцаан авахаар болжээ. Рая тэнд эрүүл мэндийн үзлэгт орж, шинэ эздэдээ очих боломжтой болох юм.