Б.Жавхлан: НӨАТ-ын буцаан олголтыг 0 рүү чиглүүлнэ

Манай улс 2015 оноос нэмэгдсэн өртөгийн албан татвараас хоёр хувийг буцаан олгодог болсон. Одоо бол иргэд улирал болгон НӨАТ-ын буцаан олголт авч байгаа. Үндсэндээ 10 хувийн татвар төлөөд 2 хувийг нь буцаан авч байгаа тул буцаан олголтын хэмжээг нэмэгдүүлэх тухай зарим гишүүд ярьдаг. Харин Сангийн сайд Б.Жавхлан буцаан олголтыг нэмэгдүүлэхгүй, харин ч 0 рүү чиглүүлэх бодлого барьж буйгаа илэрхийллээ. 

Тэрбээр "Манай улс бол НӨАТ-ын бага тарифтай улсын тоонд ордог. Манай урд хөрш 16 хувь, хойд хөрш 20 хувийн татвартай. Гэтэл манайх аравхан хувийн татвар авдаг байж хоёр хувийг нь буцаагаад өгчихдөг. Зарим нэг гишүүд НӨАТ-ын буцаан олголтыг нэмэх санал гаргадаг. Буцаан олголтын хувь хэмжээг нэмэх боломжгүй. Харин ч багасгах 0 рүү чиглүүлж хөдөлгөнө. Буцаан олголт аль болох байхгүй байх хэрэгтэй. НӨАТ тогтолцоо руу 2015 онд ороход хамрагдалт 45 хувьтай байсан. Одоо 67 хувьтай байна. Цаана нь бүртгэлгүй эдийн засаг 33 хувь байна гэсэн үг. Бидний зорилго НӨАТ-ын хамрагдалтыг 90 хувь болгох юм. Магадгүй 90 хувьд хүрсний дараа 2 хувийн асуудлыг эргэж харах бодлого хэрэгжүүлж болох юм. Тэр болтол буцаан олголтыг багасгаж магадгүй. Энэ бол далд эдийн засгийн бүртгэлийн татвар учраас төр маш хатуу бодлого баримтална" гэлээ.