ТӨРД ОЧСОН "Хөтөлийн цемент шохой" 61 сая ам.долларын ЗЭЭЛТЭЙ

Авлигатай тэмцэх газрын Мөрдөн шалгах хэлтсээс Хөгжлийн банкнаас ирүүлсэн мэдээллийн хүрээнд 73 аж ахуйн нэгжийн зээл хуулийн дагуу олгогдсон эсэх, зориулалтын дагуу зарцуулсан эсэхийг мөрдөн шалгаж байгаагаа мэдэгдсэн.

Эдгээр аж ахуй нэгжид “Хөтөлийн цемент шохой”-н үйлдвэрийн асуудал багтаж байгаа ба өнөөдрийн Засгийн газрын хуралдаанаар тус үйлдвэрийн хувьчлалыг хүчингүй болгох шийдвэр гарлаа.

Гэвч тус компани Хөгжлийн банкнаас авсан 61 сая ам.долларын зээл авсан. Уг зээлийг Худалдаа хөгжлийн банк болон гаднаас авсан зээлийн төлбөрт шилжүүлсэн талаар Засгийн газрын хэрэг эрхлэх газрын дарга Ц.Нямдорж мэдэгдсэн. Тус үйлдвэрийн цаашдын хувь заяаны асуудлыг Төрийн өмчийн хороо авч хэлэлцэх аж.

Уг үйлдвэрийн эрхийг төр өөртөө шилжүүлэн авснаар Хөгжлийн банкнаас зээлсэн 61 сая ам.долларын эргэн төлөлт хэрхэх нь тодорхойгүй болж байна.

Засгийн газраас 2016 оны наймдугаар сард байгуулагдсан ажлын хэсэг Хөгжлийн банкны чанаргүй зээлийн асуудлаар хийсэн шалгалтын тайланд Хөтөлийн цемент шохойн үйлдвэрийн асуудлыг дурдсан байна.

Ингэхдээ, төсөл амжилттай хэрэгжсэн боловч Улсын комисс хүлээж аваагүй байгаа. Худалдаа, Улаанбаатар хотын банкуудад өндөр дүнтэй зээлийн өрийн үлдэгдэлтэй. Санхүүгийн хүндрэл, ханшийн тэгшитгэлээс ихээхэн хэмжээний алдагдал хүлээсэн. Үйлдвэр бүрэн хүчин чадлаар ажиллахгүй байгаа. Эргэлтийн хөрөнгө байхгүй байгаа зэргээс шалтгаалан зээлийн хугацааг 2 удаа сунгасан байна. 121 хоногийн хүүгийн хугацаа хэтрэлттэй гэж тэмдэглэжээ.