Хөдөлмөрийн баатар Н.Удаанжаргал та, хүний нутагт хоргодох ямар гэм хийчих вэ?

“Тавантолгой төмөр зам” ХХК-ийн гүйцэтгэх захирал Н.Удаанжаргалыг “Хил давж зугтсан байж болзошгүй” гэх мэдээлэл ойрын өдрүүдэд олон нийтийн дунд тархаад байна.

Энэ талаар мэдээллийн сайтууд түгээгээд эхэлсэн ч Н.Удаанжаргал өдөр тутмын сонинд “Би хил давж зугтаагүй. БНСУ-д инженерүүдийнхээ хамт туршлага судлаад явж байна” гэх мэдээллийг өгсөн. Тэгвэл Н.Удаанжаргал гэгч энэ эрхэм одоо хаана байгаа. Үнэхээр ажил хэргийн шугамаар хилийн дээс алхсан уу. Эсвэл хуулийн байгууллагын хяналт шалгалтаас зугтав уу. Зугтсан бол ямар хэргийн улмаас ийм үйлдэл хийх үндэслэлтэй зэрэг олон асуулт ар, араасаа хөвөрнө. Иймээс дээрх асуултад хариулт авах зорилгоор албан болон албан бус эх сурвалжуудаас тодруулахыг зорилоо.

Н.Удаанжаргал есдүгээр сард БНСУ руу явсан ч...

“Тавантолгой төмөр зам” ХХК-ийн гүйцэтгэх захирал Н.Удаанжаргалын талаарх мэдээллийн үнэн, худлыг тодруулахын тулд хамгийн түрүүнд өөртэй нь холбогдохыг зорив. Түүний 8811.... дугаартай утас руу залгасан боловч “Холбогдох боломжгүй” байсан юм. Тиймээс “Тавантолгой төмөр зам” ХХК-ийн ажилтнаас тодруулахад “Манай захирал ажил дээрээ ирэхгүй байгаа. Өнгөрөгч есдүгээр сард эрүүл мэндийн шалтгаанаар БНСУ явсан. Дундуур нь манай компанийн дарга нар очиж, БНСУ-ын хоёр ч компанитай хамтын ажиллагаа эхлүүлэх уулзалт хийсэн. Улмаар тийшээ явсан инженерүүд эргээд ирсэн. Гэхдээ захирал ирээгүй” гэх мэдээллийг өгсөн юм. Үүнээс үзвэл Н.Удаанжаргал хилийн цаана байгаа гэх мэдээлэл үнэний ортой аж.

Мөн өөр нэгэн эх сурвалжийн мэдээлснээр “Тавантолгой төмөр зам” ХХК-ийн удирдах албан тушаалтнууд хил давцгаасан гэнэ. Тодруулбал, тус компанийн Хүний нөөцийн дарга, Аудитын газрын дарга тэргүүтэй эрхмүүд Турк улс руу аялахаар явсан гэх мэдээлэл ч байна. Засгийн газраас “Эрдэнэс Тавантолгой” ХК-д онцгой дэглэм зарласан энэ үед стратегийн хамгийн том ач холбогдолтой нэгж хэсгийнхэн болох төмөр замын дарга нар нь ийнхүү хил давцгааж байгаагийн учир юу вэ. Зүгээр нэг тохиолдол уу, эсвэл зохион байгуулалттай томилолтууд уу. Магадгүй “Тавантолгой төмөр зам”-ын дарга нарт хилийн цаана хэлэлцэж тохирох асуудал үүссэн байхыг ч үгүйсгэх аргагүй.

“Тавантолгой төмөр зам” ХХК дээр “Бодь"-ийнхон оволзож байгаа сурагтай

“Таван толгой төмөр зам” ХХК Тавантолгой өртөөнөөс Гашуунсухайт чиглэлийн төмөр замын цогцолбор төслийг 2020 оны гуравдугаар сард эхлүүлэн 2022 онд бүрэн ашиглалтад оруулахаар төлөвлөж ажилласан байдаг. Захиалагчийн хяналтыг хэрэгжүүлэхээр “Тавантолгой төмөр зам” ХХК, Ерөнхий гүйцэтгэгчээр “Бодь Интернэшнл” компаниуд сонгогдон ажилласан түүхтэй. Тийм ч учраас “Бодь"-ийнхон өнгөрсөн хугацаанд тус компанитай нягт хамтарч ажилласан. Тэгвэл ойрын өдрүүдэд “Бодь Интернэшнл” бичиг цаасныхаа ажлыг дуусгахаар “Тавантолгой төмөр зам” ХХК дээр “оволзож” байгаа сурагтай. Харин ийм эгзэгтэй үед “Тавантолгой төмөр зам” ХХК-ийн хамгийн чухал нэгж, хэлтсийн дарга нар алба, амины аль нь мэдэгдэхгүй ажлаар гадаад руу гараад явчихсан гэдэг нь хачирхалтай. Ямартай ч тус компанийн удирдлагуудтай холбоотой, тэр тусмаа захирал Н.Удаанжаргалыг хууль хяналтын байгууллагаас шалгаж байгаа эсэхийг лавлахаар АТГ болон прокурорын байгууллагатай холбогдов. Харин тус газруудаас “Энэ талаарх мэдээллийг өгөх боломжгүй” гэсэн юм. Албан бус эх сурвалжийн мэдээлснээр бол АТГ-аас “Тавантолгой төмөр зам” ХХК-ийн нэр бүхий эрхмүүдийг шалгаж байгаа. Удахгүй хэргийг нь шүүх, прокурорын шатанд шилжүүлэх тухай ч өгүүлсэн юм.

Н.Удаанжаргал гэж хэн бэ

Дуулианы эзэн болоод буй Н.Удаанжаргалын хувьд өнгөрсөн онд Монгол Улсын Хөдөлмөрийн баатар хэмээх эрхэм цолоор энгэрээ мялааж явсан хүн. Түүнийг Тавантолгой Гашуунсухайт чиглэлийн төмөр замын төслийг богино хугацаанд амжилттай хэрэгжүүлсэн хэмээн Х.Баттулга Ерөнхийлөгч байхдаа ийнхүү өндрөөр үнэлсэн байдаг. Харин Н.Удаанжаргалын удам судрыг судлаад үзвэл түүний аав Төрийн албаны зөвлөлийн анхны дарга агсан Ж.Норовсамбуу аж. Ж.Норовсамбуу агсны хувьд Улсын бага хурал болон УИХ-ын гишүүнээр ажиллаж байсан төдийгүй Санхүүгийн зохицуулах хорооны Тамгын газрын дарга, Буянт-Ухаа дахь Гаалийн газрын даргаар ажиллаж байсан төр нийгмийн зүтгэлтэн хүн байжээ. Харин түүний хүү Н.Удаанжаргал МАН-ын Шинэчлэлийн хорооны ерөнхий нарийн бичгийн дарга, Монголын Оюутны холбооны Ерөнхийлөгч зэрэг сонгуульт ажилд сонгогдож явжээ. Н.Удаан­жаргалын хувьд төмөр замтай нэр холбогдсон цагаас хойш буюу сүүлийн хоёр жилийн хуга­цаанд түмний дунд нэр нь түгсэн ч, түүний энэ карьер хэрхэн өндөр­лөхийг харах л үлдлээ. Учир мэдэх улсын хэлж буйгаар МОХ угшилтай нөхөд Монголын улс төрд суудал нь өнцөгдсөн. Буруу замаар будаа тээсэн бол буцахдаа шороондоо хутгалдах жамаас зугтаж чадахгүйг ч өчиж байна.

Ө. Баяр

Эх сурвалж: ӨГЛӨӨНИЙ СОНИН