УЕПГ: Одоогоор 10 хүнийг цагдан хорьж, 22 хүнд хилийн хориг тавьсан

УИХ-ын даргын захирамжаар өнөөдөр /2022.12.21/ Нүүрсний экспорт, тээвэрлэлттэй холбоотой асуудлаар холбогдох эрх бүхий байгууллагуудын тайлан, мэдээлэлтэй танилцах Ерөнхий хяналтын сонсголыг Төрийн ордны Их танхимд зохион байгуулж байна.

Энэ үеэр УЕПГ-ын Хэрэг бүртгэл, мөрдөн байцаалтын ажилд хяналт тавих хэлтсийн дарга Д.Баянжаргал 2013 оноос хойш шийдвэрлэсэн болон шалгаж байгаа хэргийн талаар танилцууллаа.

Тэрбээр "Прокурорын хяналтад 2013-2022 оны арванхоёрдугаар сарын 1-ний өдрийг хүртэлх хугацаанд нүүрсний олборлолт, экспорт, тээвэрлэлт, худалдан авах үйл ажиллагаатай холбоотой 36 гэмт хэрэг бүртгэгдсэн. Үүний 89%-ийг АТГ, 11%-ийг ЦЕГ шалгасан.

• АТГ нийт 32 гомдлоос 28-д нь хэрэг бүртгэлтийн хэрэг нээж, дөрөвт нь хэрэг бүртгэлтийн хэрэг нээхээс татгалзсан.

• ЦЕГ нийт дөрвөн гомдлын гуравт нь хэрэг бүртгэлтийн хэрэг нээж, нэгд нь хэрэг бүртгэлтийн хэрэг нээхээс татгалзсан.

Түүнчлэн 2012-2017 онд нийт долоо, 2018-2022 онд нийт 29 гомдол мэдээлэл хүлээн авсан.

Хэрэг бүртгэлтийн 32 хэргээс 16 хэрэгт холбогдох 72 хүнд эрүүгийн хэрэг үүсгэж яллагдагчаар татсан бол найман хэргийг хаасан. Мөн энэ хугацаанд мөрдөн байцаалтын 16 хэрэгт ажиллагаа явуулснаас гурван хэргийг шүүхэд шилжүүлж, хоёр хэргийг хэрэгсэхгүй болгож шийдсэн.

2022 оны арванхоёрдугаар сарын 19-ний өдрийн байдлаар 39 хэрэгт мөрдөн шалгах ажиллагаа явуулсны 22-т нь хэрэг бүртгэлтийн шатанд нотолгоо цуглуулж, 17 хэргийг мөрдөн шалгаж байна.
 

Тодруулбал,

• 2013 онд хамаарах хоёр хэрэг
• 2015 онд хамаарах нэг хэрэг
• 2017 онд хамаарах хоёр хэрэг
• 2018 онд хамаарах гурван хэрэг
• 2019 онд хамаарах нэг хэрэг
• 2020 онд хамаарах зургаан хэрэг
• 2021 онд хамаарах зургаан хэрэг
• 2022 онд хамаарах 14 хэрэг байна.

Энэхүү 39 хэргийн шийдвэрлэлтийн байдлыг авч үзвэл:

• 23 хүнд холбогдох дөрвөн хэрэгт яллах дүгнэлт үйлдэж шүүхэд шилжүүлсэн.

• 53 хүнд холбогдох 13 хэргийг мөрдөн байцаалтын ажиллагаанд шалгаж байна.

• 22 хэргийг хэрэг бүртгэлтийн ажиллагаанд шалгаж байгаа.

Нүүрсний гэх хэрэгт эрүүгийн хэрэг үүсгэн, 17 хэрэгт 76 хүнийг яллагдагчаар татсан.

• 36 нь нийтийн албан тушаалтан

• 31 нь ААН-ийн удирдах болон гүйцэтгэх албан тушаалтан болон бусад

• Долоо нь Монгол Улсын иргэн

• Хоёр нь БНХАУ-ын иргэн

Хойшлуулшгүйгээр 15 хүнийг сэжигтнээр баривчилсан. Мөн яллагдагчаар татсан 76 хүнээс: 

1. Арван хүнийг цагдан хорьсон.
2. 22 хүнийг Монгол Улсын хилээр гарахыг хориглосон.
3. 38 хүнд хувийн баталгаа гаргасан.
4. Гурван хүнийг тодорхой үйл ажиллагаа явуулах, албан үүргээ биелүүлэхийг түдгэлзүүлэх таслан сэргийлэх арга хэмжээ авсан.

Хамтарсан мөрдөн шалгах ажиллагааны багт АТГ-ын 25, ЦЕГ-ын 58 гээд нийт 83 мөрдөгч, НПГ-ын 12 прокурор хяналт тавин ажиллаж байна.

Өнгөрсөн хугацаанд хамтарсан ажлын хэсгийн мөрдөгчид 2,871 хүнээс гэрчийн мэдүүлэг авч, 139 үзлэг, 71 нэгжлэгийн ажиллагаа хийсэн. Нийтдээ 65,549 хуудас цаасан суурьтай баримтыг авч, шалгаж байна

Прокурорын байгууллагаас 118 зөвшөөрөл олгосон Үүнээс холбогдох байгууллагаас мэдээлэл гаргуулахад 18, нэгжлэг 78, хөрөнгийн шилжилт хөдөлгөөнийг хязгаарлах 22 зөвшөөрөл олгосон" гэлээ.