ДАШТ-д түрүүлсэн Монголын даамчид эх орондоо иржээ

Зуун буудалт даамын өсвөр, залуучуудын ДАШТ Польш улсын Полице хотод болж, аваргууддаа тодрууллаа. Тус тэмцээнд оролцсон Монгол Улсын баг өнөөдөр /2023.11.07/ эх орондоо ирсэн байна.

18 орны 350 тамирчин оролцсон энэ тэмцээнд Монгол Улсаас 31 тамирчин 10 насны ангилалд орж 6 алт, 3 мөнгө, 3 хүрэл медаль хүртэж нийлбэр дүнгээр тэргүүлжээ.

Тодруулбал, хөвгүүдийн 5-8 насанд Н.Хангай, 9-10 насанд Г.Санчир, охидын 5-8 насанд Б.Эрмүүнзаяа, 11-13 насанд Э.Даариймаа, 14-16 насанд Б.Есүй, 17-19 насанд Б.Мөнхжин нар алтан медаль хүртэж дэлхийн аваргын болзлыг хангалаа.

Мөн хөвгүүдийн 5-8 насанд М.Дөлхүс, охидын 5-8 насанд Б.Энхмаа, 17-19 насанд Б.Мишээл нар мөнгөн медаль хүртсэн бол охидын 09-10 насанд Э.Номунзаяа, хөвгүүдийн 11-13 насанд Т.Энхсүлд, 14-16 насанд А.Дашчирэв нар хүрэл медаль хүртжээ.