“Хотын бүлэг” хоёр С-ийн хэнийг сонгох вэ?

Шинэчлэл тийш зорьсон гэхээсээ илүүтэй ярихад илүү анхаарч байгаа үзэгдэх МАН-ынхантай хамаатай дотоод сонгууль үргэлжилж буй бөгөөд  МАН-ын  Нийслэлийн намын хорооны дарга хэн бэ байх вэ гэдэг асуудал яригдаж байна. Гэхдээ яригдаж байгаа хувилбар цөөн бөгөөд тодорхой. Нэг бол экс дарга Ц.Сандуй суудалдаа үлдэнэ. Үгүй бол УИХ-ын гишүүн Д.Сумъяабазар  удирдлагаар ирнэ. Эсвэл  У.Хүрэлсүхэд харьяалагддаг залуучуудын фракциас нэг нь гарч ирнэ гэсэн гурван хувилбар байна. Тэгэхээр нэр нь тодорхой байгаа хоёр хүн дээр  нэр нь үл мэдэгдэх нэг нөхөр нэмэгдээд нийт гурван этгээд энэхүү марафоны замд гараад байгаа харагдана. Ямартай ч одоогоор нэр нь тодорхой байгаа нөхдүүдийн хэн нь хэн билээ гэдгийг харъя.

 Экс Ц.Сандуй ба ирэх хүсэлтэй Д.Сумъяабазар

Улаанбаатарын унаган иргэн Цэндсүрэнгийн Сандуй “Хотын бүлэг”-т харьяалагддаг. Түүнийг Нийслэлийн МАН-ыг удирдаад яв гэх саналыг Г.Мөнхбаяр анх тавьсан гэж тэр өөрөө хэлдэг. Тэрбээр энэ талаараа  “...Мэдээж хотод ажиллаж байсан хүн бол арай давуу талтай байх гэсэн үүднээс сонгосон байх. Намын удирдлагуудаас намайг анх Г.Мөнхбаяр дарга дуудсан. Хамгийн эхэлж дуудсан. “За ингээд бид бол сонгуульд ялагдлаа. Би намын даргын хувьд улс төрийн хариуцлагаа хүлээнээ. Чамд хотын намын хорооны дарга гэдэг энэ хариуцлагатай, хүндтэй албыг өгнө өө. Маш хүнд үед чамд шилжүүлж байна гэж хэлсэн. Надад яг тухайн үед халшрах сэтгэл төрсөн. Би өөрөөсөө хотын намын хороог авч явж чадах уу, үгүй юу гэж асууж байсан. Ер нь бол надад цэлийсэн том   далайн эрэгт очоод хөлөө дүрээд зогсч байна. За тэртээд нэг сайхан арал байгаа, тийшээ ингээд сэлээрэй  гэсэн ийм л даалгавар өгсөн юм шиг санагддаг.” хэмээн ярьсан байдаг юм. Үнэхээр ч тэр том далайд хөлөө дүрсэн ч, хол явж чадаагүй дүр зураг харагдаад байгаа юм. Тэрбээр хотын экс дарга Ц.Батбаярыг өвдөг шороодуулан байж энэ суудалд суусан ч нийслэлийн МАН бахь байдгаараа өдийг хүрэв.

Тэгвэл түүний суудалд суух хүсэлтэй байгаагаа ил тод илэрхийлж буй УИХ-ын гишүүн Д.Сумъяабазарт өөрчлөлт шинэчлэлт хийж дийлэх чадамж бий юу гээд  харахаар дүүрэн итгэл төрөхгүй байгаа юм. Хэдийгээр тэрбээр  “Нийслэлийн МАН-ын хороог би удирдая. Хотыг бүхэлд нь гартаа оруулж байж л нэгдсэн бодлого явуулж чадна. Та нар намайг зөвхөн бөх гэдэг нүдээр битгий хар. Нийслэлийг бүхэлд нь удирдах амбиц надад байна” гэхчлэн хэлж ярьсан гээд байгаа ч, түүний амбицаар ажил хэрэг цэвэрхэн, зөв урагшилж дийлэх үү гэдэг нь эргэлзээтэй байна. Тэгээд гол нь МАН-ын толгойд “Хотын бүлэг”-ийн аугаа том удирдагч болох М.Энхболд сууж байна. Түүний дараагийн суудалд болох Генсекийн сандалд Т.Бадамжунайгийн шууд татаасаар орж ирсэн Ж.Мөнхбат байж байна. Тэд МАН-ыг бол шинэчлэнэ л гэж байгаа. Түүнчлэн  Нийслэлийн МАН-ын өнгө зүсийг өөд татах тал дээр ч тусгайлсан бодлоготой суугаа нь лавтай биз ээ.

Б.Итгэлт