Эзгүй хээр их мөнгө хадгалаад ажиллаж байсан ганц эмэгтэйн амийг хамгаалаагүй ”Шунхлайнхан” буруутай

Энэ сарын 17-18-нд шилжих шөнө “Шунхлай” шатахуун түгээх станцын ажилтан эмэгтэй амь насаа алдсан хэрэг гарсан. Цагдаагийн байгууллагад  18-ний шөнийн 01 цагийн үед түгээгч амь насаа алдсан байна гэсэн дуудлага ирсэн юм байна. Уг шатахуун түгээх станц нь Улаанбаатараас 40 гаруй километрийн зайд Төв аймгийн наана эзгүй газар байдаг аж. Талийгаач эмэгтэй хоёр хүүхдийнхээ хамт нийтийн байранд амьдардаг өрх толгойлсон эмэгтэй байжээ.

Уг шатахуун түгээх станц нь дөрвөн хүний орон тоотой гэж байгаа ч тухайн үед хоёр хүн ээлжээр тулаа хийж ажилладаг байсан байна. Мөн ямарч камер ажилладаггүй, утасны холбоо барьдаггүй хонхор газар юм байна. Талийгаач бямба гарагт хоноод ням гарагт буух ёстой байсан ч ээлж хүлээлцэж авах хүн нь ирээгүй байна. Тиймээс ийн хонож байгаад ажлын байран дээрээ бусдад хорлогджээ.

 Тухайн өдөр Төв аймгийн телевизийнхэн хэргийн газар очиход Талийгаачийн дүү М.Оюунтунгалаг “Энд дөрвөн хүний орон тоотой гэж байгаа боловч хоёр хүн л ээлжээр гардаг байсан байна. Ганц эмэгтэй хүнийг хэдэн өдөр дарааллуулж ажиллуулчихаад зовдоггүй хүмүүс вэ. Энд утасны сүлжээ барьдаггүй, камер нь ч ажилладаггүй юм шиг байна.  Энэ ШТС-ыг хариуцан ажилладаг эрхлэгч нь манай эгчид ээлж хүлээлгэж өгөхөөсөө өмнө хоёр хоносон гэсэн. Тэгэхээр хоёрхон хүн тулаан хийж ажиллаж байсан нь тодорхой байна. “Шунхлай” группээс хэдэн хүн ирсэн боловч өөрсдийнхөө хэн болохыг хэлэхгүй арьсаа хамгаалаад суугаад байна. Даргынхаа утсыг ч өгөхгүй юм. Энд хүний амь нас хохирчихоод байхад тэд тоож байгаа шинж алга.  Бид их гомдолтой байна. Ингэж эсэргүүцээд байгаа нь хар төрүүлж байна. Энэ ШТС-д өмнө нь ажиллаж байсан хүмүүс би ч архи ууж байна миний өмнөөс гараад өгөөч гэдэг байсан. Тэр хүмүүсийн найз нөхөд энд ирж архи уудаг байсан нь тодорхой. Мөн хариуцаж байгаа хүн ч гэсэн эндээ хүн амьтан дагуулж ирж л байсан. Энэ бүх хүнийг сэжигтнээр татуулна” гэж ярилцлага өгсөн байна.

Тухайн үед нэг сейфэнд  гурван сая гаруй , нөгөөд нь  хоёр сая орчим төгрөг байжээ. Харин гэмт этгээд уг мөнгийг авалгүй талийгаачийн биед байсан бэлэн мөнгийг дээрэмдэн, орчноо хянадаг камерийн бичлэгийг утсгахын тулд комьпютрийн хардыг аваад бусад эд ангийг нь эзгүй байшинд аваачиж, эвдэлж хаясан байна. Гэхдээ яг хэдий хэмжээний бэлэн мөнгө талийгаачид байсан гэдэг нь одоогоор нарийн тогтоогдоогүй байгаа ч шатахуун борлуулсан заалтаас нь харахад ойролцоогоор нэг сая орчим төгрөг байсан гэх таамаг байгаа аж.

 Шатахуун түгээх станцуудад  сүлжээгээр бүгдийг хянах боломжтой систем байдаг юм байна. Мөн хамгаалалтын албаныхантай гэрээтээр ажилладаг бөгөөд тэд нэгж бүрийн бүхий л үйл ажиллагаа болоод аюулгүй байдлыг нь хянаж байдаг аж. Гэвч Шунхлай-н шатахуун түгээх станц орон нутаг дахь салбарууддаа уг системийг нэвтрүүлээгүй байгаа юм байна. Ямарч харуул хамгалалтгүй эзгүй хээр газар эмэгтэй хүнийг хонон өнжин ажиллуулж байхдаа санаа зовоогүйг гайхмаар байна. Шунхлайнхан мөнгөний төлөө хүний амь хайрласангүй, тэр их мөнгө хадгалаад, эзгүй газар шөнө ажиллаж байгаа ганц эмэгтэй хүний амь нас дээсэн дөрөөнд байгаа гэдгийг тэнэг хүнч ойлгомоор юм. Сүлжээгээр дамжуулдаггүй хөгийн тэрүүхэндээ хянадаг камераар хэнийг юуг хянах гэж байрлуулсан юм бэ. Зөвхөн ажилтанынхаа үйл хөдлөлийг хальсанаа буулгаад дараа нь хянадаг гэсэн үг үү.   Хүний амь нас хагаалах систем биш л бол тэр хуурамч камер хэнд хэрэгтэй юм бэ. Энэ талаар сурвалжлан хүргэх болно. Үргэлжлэл бий.

 Н.Ганаа