Б.Навчаа: Би хошин урлагийн хүн биш юм байна гэсэн дүгнэлтэд хүрээд байгаа

Жүжигчин Б.Навчаатай завгүй хэдэн хормоос нь хуваалцаж уран бүтээлийнх нь талаар "Гол дүр" булан  сонирхлоо. “Мөрөөдлийн театр”-ийн хамт олон “Мөрөөдлийн баг дэлхийг аварна” нэртэй шинэ тоглолтоо үзэгчдийн хүртээл болгоод удаагүй энэ үед тус хамтлагийн жүжигчин бүсгүйтээ хувцсаа сольж, нүүрээ будах зуур нь ярилцаж амжсан юм. Өдөр бүр танхим дүүрэн үзэгчтэй тоглолт хийж байгаа уран бүтээлчийн хувьд цаг зав тун хомс байсан учир бид тоглолтын бэлтгэлээ хангангаа ярилцахаар шийдсэн нь энэ.

- Сошиал ертөнцөд "Мөрөөдлийн баг"- гэж нэрлэгдсэн хүмүүсийг дуурайсан танай тоглолтын  реклам олны анхаарал татаж байна. Энэ дүрүүд тогтлолтын номерт байгаа юу?

- Тоглолтын сурталчилгаа бол пароди буюу нөхөрсөг элэглэл.  Манайхан зарим зүйлийг туйлширч буруу ойлгож байгаа зүйл бол бий.  Үзэгчид янз бүрээр л хандаж байгаа. Хэн ч хэнийгээ нөхөрсөгөөр элэглэдэг. Энэ бол урлагтийн нэг төрөл болоод хөгжиж ирсэн. Бид нар ч өөрсдөө "Мөрөөдлийн баг" гэдэг нэр өгчихсөн юм биш. Сошиал ертөнцөд аль хэдийн ийм нэрээр танил болчихсон хүмүүс. Тоглолтын номерт дээрх дүрүүдээс орж байгаа.

- Санааг яаж олсон юм бэ?

- Санааг олох үед бол би яг байгаагүй. Яг энэ үед бол хамтлагтайгаа байж таараагүй. Эд маань юмаа бэлдээд эхэлчихсэн хойно би тоглолтынхоо бэлтгэлд орсон.

- Та ямар дүрд тоглож байна?

- Энэ удаагийн тоглолтонд  дөрвөн гаралт хийж байгаа. Эмнэлэгт хэвтээд гарсан болохоор энэ удаад ачааллыг хэсэгхэн хугацаанд багасгахаар шийдээд байна.

- Ажаад байхад жүжигчин бүсгүйчүүд өөрсдөө нүүр будалтаа хийчихдэг юм байна. Мэргэжлийн болж байна уу?

- Мэргэжлийн хүмүүс будахдаа гэрэл сүүдэр тавиад л их гоёоор буддаг. Бидний хувьд бол өдөр тутам ийм шаардлага гардаг учраас болж өгвөл сургалтанд суугаад сурчих хэрэгтэй л санагдаад байгаа юм. Би чинь өөрөө будаж чадахгүй болохоор шулам шиг будчихаад байдаг. /инээв/ Яахав өөрийнхөө хэмжээнд будчихаад хангалттай хөөрхөн болчихлоо гээд л тайз руугаа гарч өгнө шүү дээ. Уран сайхны кино бол мэргэжлийн нүүр будагчтай учраас  тос ч түрхэлгүй очдог. Тоглолтын нөхцөлд өөрсдөө л будахаас өөр арга байхгүй.

- Та хошин урлаг, кино урлагт аль алинд нь хүч үзлээ. Үзэгчид таны кинонд бүтээсэн сайхан сайхан дүрүүдэд чинь илүүтэй хайртай байгаа юм шиг харагддаг. Тэгэхээр кинонд тоглож байгаа юу?

- Нэг шинэ  киноны уран бүтээлийн ажилдаа орох гээд л бэлтгэлээ хангаад яваад байна. Нэгэнт хийснийх час хийсэн уран бүтээл хийчих юмсан гэсэн уран бүтээлчийн чинь зорилго байна. Мэдээж час хийсэн уран бүтээл хийхийн тулд цаг хугацаа их шаарддаг. Багаа бүрдүүлэх, санхүүгийн асуудлаа шийдэх гэх мэт ажлууд бий. Одоогийн байдлаар зохиолын санаа гарчихсан, ярилцаж тохиролцоод л явж байна. Кино үйлдвэрлэлийн үйл ажиллагаа таван сарын дундуур эхэлчих болов уу гэсэн төлөвлөгөө байна даа.

- Таньд кино урлаг, хошин урлаг хоёрынхоо аль нэгийг сонгоно гэсэн бодол байдаг уу?

- Миний хувьд анх жүжигчин болж төгсөөд хошин урлаг, кино хоёрын аль алинд нь тоглодог байлаа. Одоо бол их төсөөрсөн байна. Аливаа дүрийг энгийн тоглох гээд байдаг болсон байна. Эд нарыгаа бодвол арай өөр чиглэлээр тоглочих гээд болсон гэдэг ч юм уу өөрийгөө их ажиж анзаарч байна. Тэгэхээр би ер нь хошин урлагийн жүжигчин биш юм байна гэдэг дүгнэлтэнд хүрээд байгаа. Урлагийн хүн өөрийгөө голох, чамлах хэрэгтэй. Тэгэхээр цаашдаа түлхүү уран сайхны коно талруугаа явах байх гэсэн бодолтой байна. Гэхдээ хүн нэг л юмаа хийгээд байвал жүжигчин хүн хөгжих боломж нь хязгаарлагдах учраас аль аль салбарт хүчээ сорьж байх нь зөв. Үнэхээр дуулж чаддаг бол мьюзикльд ч тоглож үзэх ч юм уу. Ингэж тал бүрлүү үсэрч үзэж байж энэ дундаасаа би бол яг л энэ төрөлд тохирох хүн байна гэж өөрийгөө олж авах нь чухал.

- Та саяхан "21000 реалити шоу"-нд оролцож үзэгчдийн анхаарлын төвд байлаа. Нэвтрүүлэг өнөөдөр ч гарч байгаа болохоор таныг их завгүй байгаа мэтээр төсөөлж байгаа байх. Та шоуныхаа тухай төрсөн сэтгэгдлээ бидэнд дэлгэвэл?

- Шоуны бичлэг дуусаад удаж байна. Сарын өмнө зураг авалт дуусч, багаггүй хугацаанд монтажин дээрээ ажлаад ард түмэнд хүрч байгаа.  Ямар ч байсан шоугаа амжилттай дуусгасан.

- Шоуны онцлог, нөхцөл зарим хүмүүсийн хувьд хүндхэн тусдаг. Таныг саяхан эмнэлэгт хэвтсэн гэж сонслоо. Шоутай холбоотой юу?

- Шоутай холбоогүй ээ. Өөр шалтгаантай.

- Та сүүлийн үед их эрчтэй жингээ хаясан талаар уншигчид сонирхож байгаа. Шоунд орсноор хэдэн кг хаясан бэ?

- Шоунд орсноороо жин хаяагүй. Ерөнхийдөө урьд нь уран бүтээлдээ зориулж жингээ хасч байсан.

- Та боксоор хэр удаан хичээллэж байгаа вэ. Яагаад боксыг сонгосон шалтгаанаа бидэнд сонирхуулвал?

- Боксоор хичээллэхийн нэг давуу тал бол иргэж жин нэмдэггүй. Фитнессээр идэвхтэй хичээллээд буцаад больсон үед жин нэмэх тохиолдол олон байдаг. Мэдээж судалж үзсэн. Маш олон юм идэж үзнэ. Болсон болоогүй юм ам хамар руугаа хийж үзнэ. Хамгийн найдвартай арга нь бокс байсан.

- Хэр удаан хичээллэж байна? Үр дүн ямар байна?

- Хоёр сар гаруй хичээллэсэн. Яг одоо бол завсарлачихсан байна. Үр дүн бол илт харагдсан. Жоохон яваад л ядарч сульддаг байдал ард хоцорч, одоо болж өгвөл алхаад баймаар болсон. Үнэхээр эрүүл гоолиг байя гэвэл хөдөлгөөнд донтох хэрэгтэй гэж спортын хүмүүс хэлдэг. Донтож чадвал үр дүнд хүрнэ.

- Таныг ажаад байхад цагаан хоол, зөв хоололтыг илүүд үздэг юм шиг санагдсан.  

- Яг амьдрал дээр цагаан хоол иднэ гэж байхгүй. Шоуны хувьд 10 хоногийн хугацаанд яаж хямд төсөр аргаар амьдрах вэ гэдэг дээр л анхаарал татаж байгаа болохоос биш цагаан хоолтой холбоогүй. Цагаан хоол идээд туранхай байна гэдэг бол хүн хүний биеийн онцлогоос хамаарах байх. Миний биеийн онцлог бол хоолноос хамаарал багатайгаар хөдөлгөөн их хийх шаардлагатай байсан. Миний жин хасах гол хүчин зүйл бол спорт. Ер нь бол боксоор хичээлэсний үр дүн. Тэрнээс биш шоунд ороод өлсөөд, турсан юм бол байхгүй. Өдөр өдөртөө хоолоо идээд л яваад байгаа учраас ямар нэг хүндрэл байгаагүй. Гэхдээ яахав жин нэмэхгүй гэдэг зорилго тавьчихсан байсан учраас хөнгөн төрлийн хоол хийж идэх мөн түүнийгээ сонирхолтой болгох үүднээс төрүүдийг нь олон байлгахыг л хичээсэн дээ.

- "Мөрөөдлийн баг дэлхийг аварна" тоглолт эхлээд багаггүй хугацаа өнгөрлөө. Уур амьсгал ямар байна, үзэгчдид хэр хүлээж авч байна?

- Үзэгчид сайхан хүлээж авч байгаа. Инээд хөөр, алга ташилт дүүрэн байна. Ажлын өдрүүдэд яг суудал дүүрэхгүй байгаа ч амралтын өдрүүдэд тасалбарын эрэлт ихтэй. Танхим дүүрэн үзэгчидтэй л тоглолтоо хийж байна даа. Номеруудаа бодож төлөвлөж хийсэн болохоор сэтгэл хангалуун байна.

- Энэ удаагийн тоглолт юугаараа онцлог вэ?

- Бид зөвхөн хошин урлагаас гадна дундуур нь өөр номерууд бэлдсэн. Анх удаа шахуу бүрэн бүрэлдэхүүнээр тоглож байна. Зөвхөн Аяаа эгч маань байхгүй байгаа. Мөн Соёлын Төв Өргөөний тайзнаа анх удаа тоглолтоо тавьж байгаагаараа онцлогтой. Анхны, анхны тодотголтой олон онцлогтой сайхан тоглолт болж байна. 

- Хошин урлагийнхан маань нийгмийн болохгүй зүйлийг тодоор шүүмжилж, олон нийтэд зөв мессеж түгээж байдаг. Юуг үзүүлэхийг зорьсон бэ?

- Номер болгон дээр л үзэгчиддээ зөв дохио илгээхийг зорьсон. Жишээлбэл тоглолтын төгсгөлд байгаль эхээ хайрлаасай, газар нутгаа алтны төлөө битгий их сэндийчээсэй, бид эцэст нь үр хүүхэддээ юу үлдээх гээд байна  гэх мэт санаанууд гарч байгаа.

- Ярилцсанд баярлалаа.

 Д.Янжмаа