Засагт залгамжлагчид хэн байх вэ

Улс төрийн тэнгэрт үүл хуралдаж эхэлснийг манай сайт урьд нь мэдээлж байсан. Харин тэр үүлнээс аянга цахилаа.

АН-ын Гүйцэтгэх зөвлөл баасан гарагт хуралдаад МАН-тай байгуулсан гэрээгээ цуцлахыг УИХ дахь намын бүлэгтээ үүрэг болголоо. Өнөөдөр энэ шаардлагаа МАН-ын бүлэгт албан ёсоор хүргүүлнэ. Ингэснээр олон хоног дуншсан Засаг задрах тухай яриа бодит биеллээ олох нөхцөл бий болж байна. МАН-ын хувьд уригдаж ирээд хөөгдөж гарах дээрээ тулж байгаа нь  ийм шийдвэрийг дэмжсэн намынх нь эрх баригчдын алсын хараагүй, улс төрийн мэдрэмжгүй алхам байсныг батлан харуулж байх шиг. Харин хашир туршлагатай хүний хувьд АН-тай Засагт хамтрахыг хамгийн их эсэрэгүүцэж байсан хүн нь Ц.Нямдорж байсан бөгөөд тэр “АН хэзээнээсээ хамтарч чаддаггүй. Тиймээс адууны хулгайд хамт явах хэрэггүй” гэдгийг удирдах зөвлөлдөө ил цагаан хэлж байсан билээ. Одоо түүний хэлснээр болж байна.

Ер нь хамгийн тогтворгүй Засаглал АН-ыг эрх барьж байх үед л байдаг. Яг л тэр янзаараа болж байна. Хорин жилийн тэртээх томоогүйтэл нь өнөө ч хэвээрээ байгаа юм байна. Сандал ширээ, албан тушаалын төлөөх улангасал энэ намд хэр хүчтэй байдгийн нэг илрэл нь урьж ирүүлсэн хамтрагчаа хөөж гаргаж байгаа энэ араншин нь.  Нэг сонгуулийн хугацаанд  буюу 1996 онд Засгийн газар нь дөрвөн удаа солигдож байсан жишээ бий. Энэ удаа ч тэр жишгээрээ явах нь тодорхой болж байна.  Засаг нь лавтайяа гурван удаа холбирох бололтой. МАН-тай байгуулсан гэрээгээ цуцлах тухай чих дэлссэнээс хойш дараагийн сайд нарын марофон АН-д далдхан хэрнээ хүчтэй өрнөж байгаа гэх.

МАН-тай байгуулсан гэрээгээ цэцалснаар наанадаж 6 сайд, 7 дэд сайдын албан тушаалаа суллаж авна. Үүн дээр Төрийн нарийн бичгийн дарга нар болон агентлагийн удирдлагуудын  цөөнгүй албан тушаал АН-ын халаасанд орж ирнэ. Тэр бүгдийн хуваарилалт хэдийнэ хийгдсэн хэмээн шар ордноор ярьж байна.

Ч.Сайханбилэгийн засгийг хэвээр байлгах ч гагц тэнд багтан ажиллаж байгаа МАН-ын сайд нар огцорно. Энэ удаад АН засгаа “Шударга ёс” эвсэл болон ИЗН-тай хамтран байгуулах нь тодорхой. МАН-тай толгой хүзүү холбохдоо хатавчинд жийж, хаалгаар гаргах нь холгүй байсан мөнөөх хуучин хамтрагчид нь одоо эргээд аминд нь орж байгаа бололтой. Харин МАН-ын огцорсон сайд нарын оронд хэн хэн “угсаа” залгамжлах вэ?

Дуулдаж  буйгаар Шадар сайд У.Хүрэлсүхийн халааг экс Ерөнхихй сайд Н.Алтанхуягт өгөхөөр нам  дотроо тохиролцсон гэх. “Хуучин бууны хугархай” Н.Алтанхуягийн хувьд  Засгийн газарт жин нөлөө их, хэрэгтэй хүн гэдэг нь хэнд ч тодорхой.  

Д.Арвин МАН-аас урваж АН-ын суудлын тоог нэмснийхээ хариуг энэ удаа хүртэх магадлал өндөр байна. Түүний нэр С.Чинзоригийн оронд Хөдөлмөрийн сайдаар яригдаж байгаа гэх мэдээлэл бий. Зам Тээврийн сайдаар ажиллаж байгаа Н.Төмөрхүүгийн оронд  УИХ-ын зөвлөх А.Гансүхийг эргүүлэн томилно гэсэн яриа нэлээд хүчтэй дуулдаж байсан ч сүүлийн хэд хоног салхи эргэж, нэр өөрчлөгдөж  Т.Болдбаатар гэдэг нэр түлхүү дуулдаж байна. Нийгэмд бол “битүү морь” энэ эрхэм эдүгээ ЭМС-ын яамны дэд сайдаар ажиллаж байгаа юм. Түүнчлэн Барилга, Хот байгуулалтын яамыг МАХН-д өгөх сурагтай. Тус яаманд Ц.Шаравдоржийн нэр яригдаж байна. Гэхдээ Барилга хот байгуулалтын яаманд УИХ-ын гишүүн Г.Баярсайханы нэр бас нэлээд түлхүү яригдаж байгаа гэх мэдээлэл бий. Д.Арвин, Г.Баярсахйан нар УИХ-ын дарга З.Энхболдын тэргүүлдэг “Шонхор” фракцийн хүмүүс гэдгийг бас санах учиртай байх.

Харин Байгаль орчин, ногоон хөгжил, аялал жуулчлалын яамыг уламжлал дагуулж ИЗНН-ын дарга Ц.Ганхуягт өгнө гэсэн мэдээлэл байна. Гэхдээ эн суудлыг эхлээд УИХ-ын гишүүн С.Дэмбэрэлд санал болгосон ч тэр татгалзсан гэх сураг байна. Сангийн сайдаар хэнийг дэвшүүлэх нь тодорхойгүй байгаа ч өмнөх уламжлалыг дагаж МАХН-д өгөх магадлал бий гэнэ. МАХН-аас энэ суудалд хамгийн тохирох хүн бол Ч.Улаан. Түүнд туршлага мэдээлэл, зангараг аль аль нь бий. Хэдхэн хоногийн өмнө Улан-Үдэд Итгэл хамбад мөргөхөөр ирсэн МАХН-ын дарга Н.Энхбаяртай  УИХ-ын дэд дарга Р.Гончигдорж, УИХ-ын гишүүн Д.Арвин нар очиж уулзсан гэх мэдээлэл дуулдаад байгаа. Хэрэв энэ үнэн бол хамтарсан Засгийн газрынхаа суудлыг тохиролцсон байж таарна.