Монгол ”Рэкетир”-ийг бүтээнэ

Кино сонирхогчдоос өндөр үнэлгээ авсан Казахстаны "Рэкетир" киноны хоёрдугаар анги саяхан Монгол Улсад нээлтээ хийсэн билээ. Уг киноны гол дүрийн жүжигчид болох Мурат Бисенбин /Руслан/, Саят Исембаев /Саян/ болон энэхүү киног бүтээсэн "Satai film" компанийн захирал Анна Чакиртова нар Монгол Улсад ирж шүтэн бишрэгчидтэйгээ уулзсан бөгөөд энэ нь гаднын жүжигчид киноныхоо нээлтэнд оролцохоор манайд ирсэн анхны тохиолдол юм. Тэгвэл тэдний айлчлалын үеэр "Тэнгэрийн Модун" ТББ болон "Хасmedia Entertainment"-ынхан Казахстаны "Satai film"-тэй хамтран ажиллах гэрээ байгуулжээ. Товчхоноор хэлэхэд, "Рэкетир"-ийн Монгол хувилбарыг бүтээхээр болсон бололтой. "Рэкетир 2"-ийг Монгол Улсад албан ёсны эрхтэйгээр үзэгчдийн хүртээл болгож буй "Тэнгэрийн Модун" ТББ болон "Хасmedia Entertainment"-ынхан тус киноны Монгол хувилбар буюу рэкетчдийн тухай өгүүлэх шинэ кино хийж Монголын жүжигчдийг Азид гарах сайхан боломжийг нээх гэж байна. Энэ кинонд Казахстан болон Монголын жүжигчид тоглох ба Мурат Бисенбин, Саят Исембаев нар Монголын шилдэг жүжигчидтэй хамтран тоглох бололтой. Түүнчлэн энэ киноны зураг авалтыг Монгол Улсад хийхээр төлөвлөсөн нь нэгэн хэвийн кинонд дасаад байсан монголын кино сонирхогчдод бэлэг дээр бэлэг болж байна.  Тун ч удахгүй Монголын кино урлагийг шинэ шатанд гаргасан шилдэг кино Монгол, Казахстанд нээлтээ хийж цаашлаад Азид түгэх бололтой. Түүнчлэн Казахстаны шилдэг жүжигчид Монголд зочилсон шиг Монголын шилдэг жүжигчид Казахстанд зочилж, тэндхийн кино сонирхогчдын дунд хүндэтгэл хүлээх Монголын жүжигчдийн эхлэлийг тавих биз ээ. 

Э.Төгс