Монголын ганцхан ЖИНХЭНЭ ТЭРГҮҮН ХАТАГТАЙ

Сүүлийн үед Монголын эмэгтэй улс төрчид нэлээд шүүмжлэлд өртөх болсон билээ. Үлгэр дууриал авчихаар эмэгтэй улс төрч байхгүй байгаа нь энэ парламэнтийн нэг сул тал хэмээн олон нийт үзэж байна. Хамгийн олон эмэгтэй гишүүнтэй парламэнт учир нийгэмд хандсан олон талт үйл ажиллагаа явуулна гэдэгт иргэд нэлээд итгэсэн ч хувийн соёл, биеэ авч явах байдлаараа нийгэмд асуудал дагуулаад байна. Харин үүнд яруу найрагч Хулганайн Тэргэл сэтгэгдлээ илэрхийлснийг бүрэн эхээр нь хүргэе.

Монголын түүхэнд байсан ганцхан гайхалтай жинхэнэ тэргүүн хатагтай гэх алдарт тэнцэх чин сэтгэлтэй хүн бол АНАСТАСИЯ ЦЭДЭНБАЛ ФИЛАТОВА л байсан юм байна гэж би боддог. Зүс нь монгол биш атал зүрх сэтгэл нь Монголын үрсийн төлөө цохилж элдвээр хэлэгдэж явсан ч ихийг үлдээсэн хүн дээ бидэнд.

Монголын хөгжлийн төлөө ,Монгол хүний төлөө зүрх сэтгэл нь цохилсон жинхэнэ бахадмаар хатагтай.
Харин Монголчууд бид түүнд төмөр хогийн нүүрээ харуулж, төрхөмд нь хорон гашуун үгээр хангалттай занчин үдсэн дээ.

Чойном, Дашбалбар бол яруу найрагч бишээ гэж ирээд ичихгүй үгүйсгэсэн мундаг элийрэгчидтэй адил энэ хүнийг үгүйсгэе гээд Найрамдал зуслан, Пионерын ордон, Хуримын ордон, Хөгжим бүжгийн сургууль, 3, 4- р хорооллыг бүгдийг нурааж газрын хөрснөөс арчиж байж л үгүйсгэнэ дээ.

Ядруу зутруу амьдралаар үлдсэн насаа өөрийн эх орондоо эдлээд энэ хорвоогоос буцатлаа Монголын төлөө ,Монголын хүүхдүүдийн төлөө зовнисоор хорвоог орхисон гэдэг энэ хүн.

Үүнээс хойш өчнөөн харваас л Монгол эмэгтэй нар төрийн тэргүүний дэргэд байв. Хаана байна тэр гайхуулдаг Монгол эмэгтэйн хатан ухаан чинь тэгээд?

Чойном найрагчийн хэлсэнчлэн ҮНЭН ГЭЖ ХААНА БАЙНА ,ҮЗЧИХЭЭД ЭРГҮҮЛЭЭД ӨГӨЕ ...гэдэг шиг .

Гайхалтай биш юмаа гэхэд дөнгүүр сэтгэл гаргасан Монгол эхнэрийг нэрлээд өгөөч таминь ээ. Очирбат, Багабанди, Энхбаяр, Элбэгдоржийн хажууд байсан хатан ухаантан нараас. Хэнийг нь энэ хүн шиг шүтэх вэ бид.

Ийм байж л ичихгүй Монголчууд бид л мундаг, Монгол эмэгтэйчүүд л ганцаараа хатан ухаантай гэж ирээд элийрцгээх. Суралцацгаавал яасан юм бэ бусдаас. Өөрсдөө ухаан, сэтгэл муутай байж алийн болгон дөвийлгөсөөр байх вэ бусдаас өөрийгөө дээр тавьж.

Үнэхээр жинхэнэ хатан ухаантай нэг ч болох нээ улс төрч эмэгтэйг, төрийн тэргүүний ухаан төгс гэргийг олж үзэх юмсан амьд даа.

Энэ яваа насандаа ганц мундаг хатан ухаант тэргүүн хатагтай ,төрийн түшээ, сайдыг харахсан. Биширч бахадмаар байна Монгол эмэгтэйгээр. Харагдаж үзэгдэж өгдөггүй айхтар тэр хатан ухааныг чинь харчих юмсан .Үзээд хараад баясах шүтэх заяа байна уу бидэнд ер нь та минь ээ. Их хурлын гишүүд, сайд дарга хийж байгаа гайхалтай хатан ухаантай эмэгтэйчүүдээ нэрлээд өгнө үү. Их хурлын гишүүдийн ард "нуугдаад" сууж байдаг тэр мундаг хатан ухаантай бүсгүйчүүдийн гайхалтай ухаанаас нь жаахан хэлтэрхийг ч болохноо олж үзэхсэн.

Үзчихээд ,магтчихаад, бахадчихаад өгөе бүгдээрээ таминь ээ. 

Эсрэгээрээ л болхи, мунхаг, сэтгэлгүйг нь л харахгүйсэн гэхэд л харагдаад байх юм. Яахаараа ч харагдаж өгдөггүй нууцын авдарт дараастай айхтар хатан ухаан байдаг юм. Одоо шинээр сонгогдох ерөнхийлөгч гуайн эхнэр нь нууж хаагаад байлгүй тэр хатан ухаанаа нэг харуулаад өгөөсэй билээ дээ гэж л залбирах юм даа. Өөрсдөөсөө ичих юм даа. Ямар улс гэхээрээ ийм наад захын эхийн сэтгэл, энэрэл хайрыг үзүүлчих ганц эмэгтэй олддоггүй юм энэ улс оронд. Эх орноо гэх чин сэтгэлд нээх сүртэй хатан ухаан мухаан хэрэггүй ш дээ уг нь бол. 

Үр хүүхэддээ мууг хүсдэггүй сэтгэлийнхээ өчүүхээн хэлтэрхийг түмний төлөө жаахан ил гаргачихад л болоод явчихна шүү дээ "Хатан" ухаантан нараас минь.

Хороо ч зуур, өөрсдөө ч баяж, гэхдээ бас ард түмэн улс орноо жаахан ч атугай бод. Ядаж энэ хөшөө болон үлдсэн ухаант Орос бүсгүйгээс суралцаасай.  Энэ хүн бидэнд эхийн сэтгэлээр хандсан юмаа.Гайхуулах ухаанаас илүү гайхамшигтай эхийн сэтгэл агуу уужим даа уг нь бол. Эх орныхоо төлөө гаргаж чадахгүй хатан ухаан, эхийн сэтгэлээр ч яалтай. Эрх мэдэлтэй байсаар байж зүгээр л нэг гэрийн авгай байхыг хэн ч чадна шүү дээ. 

Харин энэ хүн шиг байх ямар амархангүй вэ гэдгийг өнгөрсөн дөрвөн ерөнхийлөгч, ерөнхий сайд нарын эхнэрүүд, улсын их хурлын эмэгтэй гишүүдээс хангалттай харагдана.

Бүгдээрээ нийлээд ч эрх мэдэлтэй байсан байгаа Монгол эмэгтэйтэйчүүд энэ хүний хөлийн чигчий хуруунд ч хүрэхээрийг хийсэнгүй ээ. Ийм байж л нэг л их эхийн ач , хатан ухаан дуу шүлэг, залхмаар гэж. Ядаж үнэнд ойр амьдрахсан. Өөрсдийгөө дөвийлгөн магтаж бахдаж, өрөөлийг доош хийх маань дэндлээ. Өөрсдөөсөө ичиж амьдарцгаая. Миний лав бөгс улайж байна өөрсдөөсөө ичсэндээ. Таных яадгийг би мэдэхгүй. Монгол эмэгтэйтэйчүүд бид бүр улам, жинхэнэ нүдэнд харагдахуйц, гарт баригдахаар мундаг болмоор байна. Ялангуяа эрх мэдэлд хүрсэн нь.

www.zindaa.mn