Р.Отгонтулга: 30 удаа азтан болсон тохиолдол байхгүй, ташаа мэдээлэл

НӨАТ –ын сугалааны  ээлжит тохирол есдүгээр сарын 17 буюу өнгөрөгч бүтэн сайн өдөр явагдсан. Энэ удаагийн тохиролд  2017 оны наймдугаар сарын 1 –нээс 31 –ний өдрийн хооронд худалдан авалт хийж, есдүгээр сарын 16 –ны өдрийн 23:59 минутаас өмнө Цахим Төлбөрийн баримтын системд бүртгүүлсэн НӨАТ –ын баримтыг хамруулжээ.

Тус сугалаагаар:
20 мянган төгрөгийн азтан 13 000
100 мянган төгрөгийн азтан 1 330
500 мянган төгрөгийн азтан 130
4 сая төгрөгийн азтан 19
20 сая төгрөгийн азтан 1
100 сая төгрөгийн азтан 1 тус тус  тодорсон билээ.

Тохиролд 100 сая төгрөгийн азтан нэг тодорсон. Зарим азтан өөрийгөө зарлахыг хүсдэггүй учраас тухайн азтан өөрийгөө зарлахыг зөвшөөрсөн тохиолдолд нийтэд мэдээлдэг байна.

НӨАТ –ын сугалааны тохиролтой холбогдуулан "Гааль татварын мэдээллийн технологийн төвийн ажилтан  Р.Отгонтулга 30 удаагийн тохиролд азтан болсон" гэдэг мэдээлэл олон нийтийн сүлжээнд цацагдах болсон. Энэ талаар түүнээс тодруулахад " Миний зурагтай мэдээлэл худлаа. Ийм мэдээлэл анх 2016 оны есдүгээр сарын 14-нд гарч байсан. Тухайн үед технологийн ажилчид шалгуулсан. Манайхаас 20 болон 100 мянган төгрөгийн азтан тодорсон байдаг. Харин 30 удаа азтан болсон тохиолдол байхгүй гэдгийг албан ёсоор хэлье.  Өнөөдөр энэ нийгэм дээр ямар нэгэн гэгээлэг зүйл хийх гэж байгаа бол чи чулуун зүрхтэй байх ёстой болжээ. Чи цэцэг усласан ч шүүмжлүүлнэ, чи цэцэг тарьсан ч харааж зүхүүлнэ. Товчхондоо бол чи юу ч хийсэн бусдын таашаалд үл нийцнэ гэдэг үг үнэн юм" гэлээ. 

Б.Алтжин