АНХААР: 142...!!!
142...!!!
Энэ тоо бол өнгөрсөн онд ахуйн хэрэглээний газ үнэрлэн хордсон хүүхдүүдийн тоо. Тэдний дундаас эрүүл мэндээрээ хохирсон болоод амь насаа хүртэл алдсан тохиолдол гарсныг албаныхан анхааруулж байна. Өдрөөс өдөрт, жилээс жилд ахуйн газ, цавуу болон бензин үнэрлэн мансуурдаг хүүхдүүдийн тоо өссөөр байгаа нь харамсалтай. Жишээ болгож, цагдаагийн газар бүртгэгдсэн зарим нэгэн хэргийн талаар дурдъя.
Газ үнэрлэж байсан таван хүүхдийн нэг нь амиа алдав
Хан-Уул дүүргийн 10 дугаар хороонд өнгөрсөн оны дөрөвдүгээр сарын 30-ны өдөр өсвөр насны хүүхэд газ үнэрлэж, нас барсан хэрэг гарч байв. Тодруулбал, тус дүүргийн 10 дугаар хороо буюу Төв цэвэрлэх байгууламжийн орчимд 17-18 насны таван хүүхэд газ үнэрлэж, нэг нь таталт өгөн эмнэлгийн тусламж авч чадалгүй амиа алдсан байна.
Газ нь дэлбэрч хоёр хүүхэд бэртжээ
Мөн л өнгөрөгч онд газтай холбоотой хэрэг цагдаагийн газар бүртгэгджээ. Тодруулбал, Баянзүрх дүүргийн 25 дугаар хороонд 16-18 насны хоёр хүүхэд газ үнэрлэж байхад газ нь дэлбэрч гэмтжээ.
Наймхан настай хүүхэд газанд мансуурав
2017 оны гуравдугаар сарын 09-нд БЗД-ийн долдугаар хорооны нутаг дэвсгэрт байрлах нэгэн орон сууцанд бага насны хоёр хүүхэд газ үнэрлэж байгаад үйлдэл дээрээ баригджээ. Тодруулбал, “Тус дүүргийн хоёрдугаар байрны нэгдүгээр орцонд хоёр хүүхэд газ үнэрлээд байна” гэсэн дуудлагын дагуу дүүргийн цагдаагийн хэлтсийн алба хаагчид хэргийн газарт очиход Сүхбаатар дүүргийн 13 хороонд суух 12 настай эрэгтэй О, 8 настай эрэгтэй О нар ахуйн хэрэглээний газ үнэртэж, мансуурсан байдалтай байсныг илрүүлжээ.
Газ үнэрлэн мансуурч байгаад баригджээ
Сүхбаатар дүүргийн наймдугаар хороонд байрлах "Өргөө-2" кино театрт сурагчид газ үнэрлэн мансуурч байсныг цагдаагийн байгууллагаас өнгөрсөн оны хоёрдугаар сард илрүүлж байв. Тодруулбал, Чингэлтэй дүүргийн 11 дүгээр хороонд оршин суудаг 14 настай, эрэгтэй А, мөн тус дүүргийн 19 дүгээр хороонд оршин суудаг 14 настай, эрэгтэй О нар ахуйн хэрэглээний газ үнэрлэж мансуурсан байжээ.
Газанд донтсон охин амиа алдав
Энэ хэрэг бүр 2012 онд гарч байсан юм. Сэрэмжлүүлэг болгон хэргийн талаар дахин дурдъя.
Баянхонгор аймгийн төвд оршин суугч, "газ үнэрлэдэг охин" гэдгээр нь аймгийнхан нь андахгүй н.Мөнхжаргал гэгч нас баржээ.
Аймгийн төв захын ойролцоох Айрагны гэрийн гаднаас охины цогцосыг олсон бөгөөд Цагдаагийн хэлтсийнхэн шалгалт хийж эхэлсэн байна.
Тэрбээр энэ жил 18 нас хүрсэн бөгөөд газ үнэрлэж мансуурдаг болоод 3 жил шахам болж байгаа аж. Баянхонгор аймгийн Цагдаагийн хэлтэс, харьяа хорооныхоо өрхийн эмнэлгийн хяналтад байдаг түүнийг 2011 онд аймгийн Хүүхдийн төлөө хэлтэс, Цагдаагийн газраас Улаанбаатар хотын Сэтгэцийн Эрүүл Мэндийн Үндэсний Төвд 30 хоног эмчилгээ сувилгаа хийлгэж байжээ. Эмчилгээнд яваад ирсэн даруйгаас нэлээд хэсэг хугацаанд мансуурах байдлаа орхиж, хэвийн болсон байсан бөгөөд төдөлгүй газаа үнэрлэж эхэлсэн байна. н.Мөнхжаргал охин сургууль завсардаад удаж байгаа бөгөөд тодорхой эрхэлсэн ажилгүй ээж, хойд эцэг бусад хүмүүсийн хамт гэр хороололд амьдардаг байжээ. Ар гэрийнхэн нь тоохоо больчихсон, асарч халамжлах дотны хүнгүй эмзэг бүлгийн амьдарлаар охин өнөөдрийг хүрчээ. Охин бага наснаасаа тааралдсан хүнээс 50, 100 төгрөг зэргээр мөнгө гуйж явдаг байсныг гэрчүүд хэлж байгаа юм.
Бас түүнийг байнга газ зууж явдаг байсан, шүднийхээ завсар газын хушууг хийж шахах маягаар донтдог байсан гэдгийг ярьж байна.
Энэ бол цагдаагийн газар хэдэн зуугаар бүртгэгдсэн газ үнэрлэсэн хүүхдүүдтэй холбогдох хэргийн хэдхэн жишээ. Үүний цаана илрээгүй хэрэг хэчнээн гарсныг хэлж мэдэхгүй нь. Өсвөр насны хүүхдүүд бусдад уруу татагдах, сониуч томоогүй зангаасаа болж энэ мэт хэрэгт өртөх нь элбэгшиж байгаа нь харамсалтай. Иймээс эцэг, эхчүүд хүүхэддээ тавих хараа хяналтаа сайжруулж, хүүхдээ хэнтэй, хаана юу хийж явааг нь хянах хэрэгтэйг албаныхан анхааруулсаар байна. Мөн ахуйн хэрэглээний газ борлуулдаг худалдааны төвүүд насанд хүрээгүй хүүхдэд газ худалдахгүй байх журмыг холбогдох газраас нь баталмаар байна. .
С.Баяр
Эх сурвалж: ZINDAA.MN
Холбоотой мэдээ
Сэтгэгдэл ( 0 )