УИХ-ын гишүүн А.Ундраа Даамын Азийн аварга шалгаруулах тэмцээнд медаль авсан тамирчдад баяр хүргэлээ

УИХ-ын гишүүн, Монголын даамын холбооны ерөнхийлөгч А.Ундраа даамын Азийн аварга шалгаруулах тэмцээнд медаль авсан тамирчдыг Төрийн ордонд хүлээн авч уулзан баяр хүргэлээ.

БНХАУ-ын Шаньдун мужийн Шинтай хотноо дөрөвдүгээр сарын 21-26-ны өдрүүдэд даамын Ази тивийн аварга шалгаруулах тэмцээн болж өндөрлөлөө. Зуун буудалт даамын үндсэн, рапид, блиц төрлүүдээр зохиогдсон тус тэмцээнд Монгол, БНХАУ, Казахстан, Кыргызстан, Узбекистан, Туркменистан, Пакистан, Сингапур, Япон, Тайланд зэрэг 10 улсын тамирчид 36 багц медалийн төлөө ухаанаа уралдуулсан юм.  

Манай улсаас нийт 67 тамирчин зургаан насны ангилалд өрсөлдсөн бөгөөд 13 алт, 19 мөнгө, 16 хүрэл, нийт 48 медаль хүртэж, багийн дүнгээр зохион байгуулагч орны дараа хоёрдугаар байрт орсон байна.

Тэмцээний төрөл тус бүрээр ангилбал үндсэн төрөлд 17 медаль (4 алт + 6 мөнгө + 7 хүрэл), рапид буюу түргэн тоглолтын төрөлд 16 медаль (6 алт + 6 мөнгө + 4 хүрэл), блиц буюу түргэвчилсэн тоглолтод 15 медаль (3 алт + 7 мөнгө + 5 хүрэл) авчээ. Манай даамчдаас 28 тамирчин медаль хүртсэн бөгөөд Б.Мөнхжин, Б.Мишээл, Г.Дүүрэнбилэг, С.Мөнх-Оргил, Г.Буяндэлгэр, Б.Энхрийлэн нар оролцсон төрөл болгоноосоо медаль зүүжээ.    

Тэмцээний эрэгчтэйчүүдийн насанд хүрэгчдийн ангилалд Ц.Отгонбилэг хоёрдугаар байр эзэлж Олон улсын мастер, эмэгтэйчүүдийн нээлттэй ангилалд гуравдугаар байрыг залуучуудын алтан медалийн хамт хүртсэн 12 настай Э.Хүслэн Дэлхийн даамын холбооны мастер цолын болзлыг биелүүллээ. Эдгээр тамирчид 2019 оны насанд хүрэгчдийн ДАШТ-д оролцох эрхийг авсан юм.

Зүүн гар талаас арын эгнээ

1. Б.Уудамбаатар – блицын хүрэл медаль - залуучууд
2. Ц.Хашчулуун – рапидын аварга –насанд хүрэгч
3. Б.Анужин – рапидын аварга - залуучууд
4. Б.Мөнхжин – 2 хүрэл, 1 алт - залуучууд
5. Р.Манлай – ерөнхий нарийн бичгийн дарга
6. Г.Хэрлэнмөрөн – блицын хүрэл – насанд хүрэгч
7. А.Ундраа- Даамын холбооны Ерөнхийлөгч
8. Б.Сэлэнгэ –рапидын аварга, блицын хүрэл – 14-16 нас
9. Б.Энхрийлэн – мөнгө, түргэн тоглолтын хошой аварга – 11-13 нас
10. С.Мөнх-Оргил – аварга, түргэн тоглолтын алт мөнгөн медаль - 14-16 нас өмнөговь аймаг
11. Б.Пүрэвжаргал – хүрэл, рапидын аварга – залуучууд Дорноговь аймаг
12. Г.Ганжаргал – нарийн бичгийн дарга
13. Ц.Отгонбилэг – мөнгөн медаль – насанд хүрэгч

Зүүн гар талаас урд эгнээ

1. Б.Шандас – рапидын мөнгө – 8-10 нас Хөвсгөл аймаг
2. Г.Марал – хүрэл медаль – 8-10 нас
3. Б.Лхагватогтох – блицын мөнгө – 8-10 нас Өвөрхангай аймаг
4. П.Эрхэмбилэг – блицын хүрэл – 11-13 нас
5. Э.Энххүслэн – рапидын хүрэл – 8-10 нас
6. Б.Мишээл – бүх төрөлд мөнгөн медаль - залуучууд
7. Р.Нармандах - БЗД-ийн дасгалжуулагч
8. Б.Одмөнх – рапидын хүрэл – 5-7 нас Баянхонгор аймаг
9. З.Аргабилэг – хос мөнгөн медаль -5-7 нас

zindaa.mn

Д.Дорж