ОХУ-ын Батлан хамгаалахын сайд С.Шойгу пүрэв гаригт ирнэ

   ОХУ-ын Батлан хамгаалахын сайд, армийн генерал С.Шойгу энэ пүрэв гарагт буюу аравдугаар сарын 18-нд Монгол Улсад албан ёсны айлчлал хийнэ.

Батлан хамгаалахын сайд Н.Энхболд 2018 оны дөрөвдүгээр сард ОХУ-д болсон Олон улсын аюулгүй байдлын Москвагийн бага хуралд оролцох үеэр С.Шойгу Монгол Улсад айлчлах төлөвлөгөөтэйгээ илэрхийлж байжээ. 

Монгол Улс, ОХУ-тай батлан хамгаалахын салбарт нягт хамтын ажиллагаатай.  ОХУ цэргийн боловсон хүчин бэлтгэх, цэргийн хамтарсан сургууль хийх, цэрэг, техникийн хамтын ажиллагаагаа бэхжүүлэхэд Монгол Улсад туслалцаа, дэмжлэг үзүүлж ирсэн. Ийнхүү хойд хөршийн Батлан хамгаалахын сайд, армийн генерал С.Шойгу манай улсад айлчлал хийх болсон нь багагүй анхаарал татаж байгаа үйл явдал юм.

С.Шойгу гэж хэн бэ?

В.Путины хамгийн итгэлт хүний нэг хэмээдэг. Түүнийг монгол цустай гэдэг бөгөөд Сергей Кужугетович Шойгу нь Тувагийн автономит мужийн Чадан хотод 1955 оны тавдугаар сарын 21-ний өдөр төржээ. Аав нь тува, ээж нь орос.

1977 онд Красноярскийн политехникийн институтыг барилгын инженер мэргэжлээр төгсч, Красноярск хотод мэргэжлийнхээ дагуу 15 жил ажиллажсан.

1990 онд Москва хотод Архитектор, барилгын улсын хорооны орлогч даргаар томилогдсон.

1991-1994 онд ОХУ-ын иргэний хамгаалалт, онц байдлын улсын хорооны дарга, 1994-2012 онд ОХУ-ын Онц байдлын сайд,  2012 оны 4-11-р сарын хооронд Москва мужийн захирагчаар ажиллаж байсан.

2012 оны арваннэгдүгээр сарын 6-ны өдөр ОХУ-ын Батлан хамгаалахын сайдаар дахин  томилогдсон. 

1977 онд дэслэгч цолтой байсан С.Шойгу 1993 онд шууд хошууч генерал цол хүртэж байжээ.

"Нэгдмэл орос" намыг үүсгэн байгуулагчдын нэг бөгөөд Ерөнхийлөгч В.Путин, Ерөнхий сайд Д.Медведев нарын улстөрчид эл намд  багтдаг. С.Шойгу ОХУ-ын Зэвсэгт хүчнийг шинэчлэх эрс бодлого, чиглэлийг бодит амьдралтай нийцүүлэн өөрчилж байгаа хэмээн үнэлэгддэг. 

Д.Дамдин

www.zindaa.mn