Зэсийн баяжмалын экспорт 25.9 сая ам.доллароор БУУРЧЭЭ
Үндэсний статистикийн хорооноос өгч буй мэдээллээс үзэхэд гуравдугаар сард экспорт, импортын зөрүү өмнөх саруудтай харьцуулахад ойртсон байна.
Гуравдугаар сард экспорт өмнөх сараас 28.8 сая ам.доллароор буурахад зэсийн баяжмалын экспорт 25.9 сая ам.доллароор буурсан нь голлон нөлөөлжээ. Оюутолгой төслийн уурхайд коронавирусний тохиолдол илэрсэнтэй холбоотойгоор БНХАУ-ын тал зэсийн баяжмалын татан авалтаа гуравдугаар сарын дундуур зогсоосон нь ийнхүү экспортын үзүүлэлтэд нөлөөлж байна.
Экспорт, импортын мэдээллийг тодотгон хүргэе. Монгол Улс 2021 оны эхний улиралд нийт 121 улстай худалдаа хийж, гадаад худалдааны нийт бараа эргэлт 3.5 тэрбум ам.доллар, үүнээс экспорт 2 тэрбум америк доллар, импорт 1.5 тэрбум америк доллароор хэмжигдэж байна. Нийт бараа эргэлтийн хэмжээ өмнөх оны мөн үеэс 1.3 (60.4%) тэрбум ам.доллароор, экспорт 964.6 (93.1%) сая ам.доллароор, импорт 362.1 (31.2%) сая америк доллароор тус тус өсжээ.
Харин гуравдугаар сард экспорт 665.8 сая ам.доллар, импорт 601.4 сая ам.доллар болж, өмнөх сараас экспорт 28.8 (4.1%) сая ам.доллароор буурч, импорт 138.0 (29.8%) сая ам.доллароор өссөн байна.
БНХАУ-д экспортолсон бараа бүтээгдэхүүний 34.3 хувийг чулуун нүүрс, 33.6 хувийг зэсийн баяжмал эзэлж байгаа бол Сингапур улсад экспортолсон барааны 96.6 хувийг чулуун нүүрс, ОХУ-д экспортолсон барааны 41.1 хувийг жонш эзэлж байна.
Экспорт 2021 оны эхний улиралд өмнөх оны мөн үеэс 964.6 сая ам.доллароор өсөхөд зэсийн баяжмалын экспорт 269.9 сая ам.доллар, нүүрсний экспорт 439.4 сая ам.доллароор нэмэгдсэн нь голлон нөлөөлсөн байна.
Эхэнд дурдсанчлан экспорт өмнөх сараас 28.8 сая ам.доллароор буурахад зэсийн баяжмалын экспорт 25.9 сая ам.доллароор буурсан нь голлон нөлөөлжээ.
Холбоотой мэдээ
Сэтгэгдэл ( 0 )