17, 72 дугаар сургууль дээр орос хэлний төв нээгдлээ

Ерөнхий боловсролын 17, 72 дугаар сургуулиудыг түшиглэн ОШУСТ-ийн дэмжлэг дор орос хэлний төвүүдийг нээх ёслолын ажиллагаа боллоо.

72 дугаар сургуульд Боловсролын төв нээх, ЗХУ-ын сансрын нисэгч, ЗХУ-ын хошой Баатар, БНМАУ-ын Баатар, нисэх хүчний хошууч генерал В.Жанибековын нэрэмжит болгох ёслол дээр Монгол Улсын Баатар, ЗХУ-ын Баатар, сансрын нисэгч Жүгдэрдэмидийн Гүррагчаа баяр хүргэж, Владимир Александрович Жанибеков сургуулийн багш, сурагчдад видео мэндчилгээ дамжуулав.

Домогт сансрын нисэгчид Зөвлөлт-Монголын хамтарсан сансрын нислэгийн тухай ярьж, ард түмнүүдийн найрамдал ямар чухал болохыг онцлон, багш, сурган хүмүүжүүлэгч, сурагчдад сайн сурлага, олон улсын хамтын ажиллагааны уламжлалыг хадгалах ерөөлийг үг хэлэв.

Түүнчлэн ЕБ-ын 17 дугаар дунд сургуульд Орос хэлний төв нээх ажиллагаа нь Зөвлөлтийн нэрт зүтгэлтэн, цэргийн жанжин, ЗХУ-ын маршал, ЗХУ-ын гурван удаагийн Баатар Семен Будённыйн нэрэмжит болгох шийдвэрийг хэрэгжүүлэх явдалтай давхацсан юм. Семён Михайлович 1958 оноос Зөвлөлт-Монголын найрамдлын нийгэмлэгийн анхны тэргүүнээр ажиллаж байсан билээ. Энэ алдартай хүний нэрэмжит болох Монголын сургуулийнханд хандаж ЗХУ-ын маршал С.М.Буденныйн нэрэмжит Холбооны цэргийн академийн IT-технологийн кадетын сургуулийн сонсогчид видео мэндчилгээ ирүүлэв.

ОХУ-аас Монгол Улсад суугаа Элчин сайдын яамны Зөвлөх, Россотрудничество агентлагийн Монгол Улс дахь төлөөлөгчийн газрын тэргүүн, ОШУСТ-ийн захирал А.Базархандаев “Бид Монгол Улсад орос хэлний төвүүдийг нээх ажлыг үргэлжлүүлж байна. Өнөөдрийн байдлаар 53 дахь төв нээгдэж ажиллаж байна. Тэнд суралцсан монгол сургуулиудын сурагч нар өөрийн мэдлэгийн хүрээг тэлэх, боловсролоо дээшлүүлэх боломжтой болно. Орос хэлийг сурснаар Монголын сурагч, залуучуудын өмнө цаашид Оросын их, дээд сургуулиудад суралцах, боловсролын төсөл, уралдаан, олимпиадуудад амжилттай оролцох сайхан боломжийг нээнэ” гэлээ.