Д.Отгонбаяр: Бид дэлхийн тавцанд гарах цаг ирж байна

Дэлхийн хэмжээний охидын хамтлагийн сонгон шалгаруулалт Монгол улсад эхэлж байгаатай холбогдуулан БНСУ-ын "World K-pop Center" болон "Asian Idol Academy Mongolia", Нийслэлийн Соёл, Урлагийн Газар хамтран хэвлэлийн бага хурал хийлээ. 

БНСУ-ын “World K-pop Center”-ээс зохион байгуулж буй “Click The Star” хэмээх төсөл нь дэлхийн 32 оронд хэрэгжиж буй бөгөөд “Bling One” нэртэй 7 гишүүний бүрэлдэхүүнтэй охидын хамтлагт багтах авьяаслаг нэгнийг олох зорилготой уралдаан юм.

Хэвлэлийн бага хурлын үеэр Монгол Улсын Төрийн Соёрхолт, Гавьяат жүжигчин Д.Отгонбаяр : 

Маш сайхан цаг үе ирж байна. Монголын урлаг хөгжсөөр байгаа, өдрөөс өдөрт тэлсээр байна. Үүний тод жишээ бол Зүүн Өмнөд Ази, тэр дундаа к-поп ертөнцөд алдартай агентлаг Монголын соёл урлагийг анхаарч, авьяаслаг охид, хөвгүүдийн ур чадварыг дэлхийд гаргах энэхүү төсөл юм. Би хувийн зүгээс энэхүү төслийг ихэд дэмжиж байгаа. Бид телевизээр, олон нийтийн сүлжээгээр дэлхийн хэмжээний оддыг хардаг байсан бол Монгол охидоо дэлхийн хэмжээний тайзнаас харах боломжтой болж байна. Энэхүү төсөлд хамрагдаж буй 32 улсыг тойрсон аялан тоглолт хийх зэрэг олон ажлууд хэрэгжинэ. 

Цаашид маш олон боломж нээгдэнэ. Бид хичээх хэрэгтэй. Манай Монголчууд маш авьяастай. Тиймээс энэхүү төсөлд миний бие гар бие оролцож, Монгол талаас продюсероор ажиллахаар болсондоо маш их баяртай байна. “World K-pop Center”-ийн хамт олондоо Монголын соёл урлаг, хөгжим сонсогчид, хөгжимд хайртай мянга мянган залуусынхаа өмнөөс дахин дахин баярлаж, талархаж байгаагаа илэрхийлмээр байна.

Бид хичээх болно. Ямар ч байсан бид дэлхийн тавцанд гарах цаг нь ирж байна. Энэхүү төслөөр дамжуулан эх орноо сурталчлах олон талын боломжууд гарч ирнэ. Тиймээс энэ боломжийг бид яагаад ч алдаж болохгүй гэж харж байна гэлээ. 

Уралдааны сонгон шалгаруулалт: Анхан шатны сонгон шалгаруулалт онлайнаар явагдах ба шаардлага хангасан видео бичлэгийг World K-Pop Center хүлээн авч, шилдэг 30 оролцогч шалгаруулна. Эдгээр 30 оролцогч ганцаарчилсан үзүүлбэр үзүүлэх ба үүнээс шилдэг 10 оролцогч финалын шатанд шалгарч, БНСУ-ыг зорин дараах боломжуудын эзэн болно.  

• “World K-pop center”-ийн мэргэжлийн цогц сургалтад 3 сар суралцах
• Солонгосын соёлтой танилцах Сөүлийн аялалд  хамрагдах
• Сургалтын явцад 3 оролцогч хасагдаж, “Bling Оne” хамтлагийн 7 үндсэн гишүүн шалгарснаар анхны уран бүтээлээ олон нийтэд хүргэх буюу дебют хийнэ
• “K-pop click” платформоор дамжуулан хөгжмийн нэвтрүүлэг, реалити шоу зэрэг К-Поп контентод тогтмол оролцоно
• Энэ хүрээнд гарах бүх зардлыг Солонгосын “World K-pop center” хариуцна. / Сургалт, байр, хоол, унаа, даатгал,  онгоцны 2 талын тасалбар гэх мэт/

Хамрах хүрээ

Улаанбаатар хотын 9 дүүрэг

Төслийн хугацаа

2024.03.01 – 2024.09.01-ны хооронд явагдана.

ОРОЛЦОГЧДОД ТАВИГДАХ ШААРДЛАГА

1. 13-18 нас
2. Улаанбаатар хотын харьяалалтай
3. Дуулж, бүжиглэх сонирхолтой

Холбоо барих утас: 88109997, 90691134, 90901134 /Click the star төслийн баг/

ДЭЛГЭРЭНГҮЙ МЭДЭЭЛЭЛ